कर्णाली प्रदेश विकास परिषद्को पहिलो बैठकः दश मस्यौदामाथि छलफल

A+ A A-

कर्णाली प्रदेश विकास परिषद्को पहिलो बैठक प्रदेश राजधानी वीरेन्द्रनगरमा सुरू भएको छ । परिषद् अध्यक्ष मुख्यमन्त्री महेन्द्रवहादुर शाहीको अध्यक्षतामा बिहान साढे ९ वजेदेखि सुरू भएको बैठकमा प्रदेश योजना आयोगले तयार गरेको कर्णाली प्रदेशको प्रथम पञ्चवर्षीय योेजनाको मस्यौदाका बारेमा सदस्यहरूको सुझाव तथा मार्गदर्शन लिइने बताइएको छ ।

बैठकमा परिषद्को सदस्यका रूपमा प्रदेश सरकारका मन्त्रीहरू, विपक्षी कांग्रेस संसदीय दलका नेता जीवनबहादुर शाही, प्रदेश सभा संसदीय समितिका अध्यक्षहरू, गाउँपालिका, नगरपालिका र जिल्ला समन्वय समितिका प्रमुखहरूको सहभागिता रहेको छ ।

बैठकको सुरूमा कर्णाली प्रदेश योजना आयोगका उपाध्यक्ष प्रा.डा. पुण्यप्रसाद रेग्मीले आवधिक योजना तर्जुमा, निर्माण प्रक्रिया र मस्यौदा सम्वन्धी आधारपत्र प्रस्तुत गर्ने कार्यतालिका रहेको छ । उपाध्यक्ष रेग्मीको आधार पत्र प्रस्तुतिपछि दिनभर नै आवधिक योजनाको मस्यौदामाथि वैठकका सहभागी परिषद सदस्यहरूको छलफल तथा सुझाव लिइने कार्यक्रम रहेको आयोगका प्रवक्ता सुदिश अर्यालले जानकारी दिए ।

कर्णाली प्रदेश योजना आयोग (गठन तथा कार्यसञ्चालन) आदेश २०७५ को दफा ७ को प्रावधानबमोजिम गठित प्रदेश विकास परिषद्को बैठक पहिलो पटक सुरू भएको हो ।

कर्णाली प्रदेशको विकास र समृद्धिको मार्गचित्रका रूपमा योजना आयोगले तयार गरेको प्रथम पञ्चवर्षीय योजना (आव२०७६/७७–२०८०/८१) मस्यौदामा १० वटा परिच्छेद रहेका छन् । पञ्चवर्षीय योजनाको मस्यौदामा स्थानीय तथा प्रदेश तहका जनप्रतिनिधि, विज्ञ एवं सरोकारवालाहरूको सुझाव लिएर स्वीकृतिका लागि प्रदेश सरकारलाई पेस गरिनेछ ।

मुख्यमन्त्री महेन्द्रवहादुर शाही अध्यक्ष रहेको प्रदेश विकास परिषद्का पदाधिकारीहरूमा सहअध्यक्ष आर्थिक मामिला तथा योजना मन्त्री र सदस्यहरूमा प्रदेश सरकारका विभागिय मन्त्रीहरू, कर्णाली प्रदेश योजना आयोगका उपाध्यक्ष, प्रदेशसभामा प्रतिनिधित्व गर्ने संसदीय दलका नेता, प्रदेशसभाका समिति अध्यक्षहरू, प्रदेश योजना आयोगका सदस्यहरू, जिल्ला समन्वय समितिका प्रमूखहरू, नगरपालिकाका प्रमुखहरू, गाउँपालिकाका अध्यक्षहरू, प्रदेश सरकारद्वारा मनोनित ५ जना सदस्यहरू, प्रदेश सरकारका सचिवहरू रहने व्यवस्था गरिएको छ ।

आर्थिक मामिला तथा योजना मन्त्रालयका सचिव सदस्य सचिव रहेको विकास परिषद्मा कर्णाली प्रदेश सरकारले विभिन्न क्षेत्रमा योगदान पुर्‍याएका ५ जनालाई सदस्यमा मनोनयन गरेको छ । परिषद् सदस्यहरूमा डा. राधिका बुढ्थापा (जुम्ला), उषा लामा (हुम्ला), चन्द्रा अधिकारी (जाजरकोट) मध्यपश्चिमाञ्चल विश्वविद्यालयकी एसाेसियट प्रोफेसर यशोदा थापा र उद्योग वाणिज्य महासंघ कर्णाली प्रदेश अध्यक्ष पदमबहादुर शाहीलाई सरकारले मनोनयन गरेको थियो ।

प्रकाशित मिति: शुक्रबार, माघ १०, २०७६ १०:१९