शिशु बिक्री प्रकरण : योजना बनाएरै जन्माइएको थियो शिशु

A+ A A-

भदौ १ गते विराटनगरस्थित ग्रीनक्रस हस्पिटलमा कार्यरत स्त्री तथा प्रसूति रोग विशेषज्ञ डा. तपेश्वरलाल कर्ण पक्राउ परे ।

अविवाहित युवतीबाट जन्मिएको नवजात शिशु अस्पतालबाटै हराएपछि मोरङ प्रहरीले उपचारमा संलग्न ६८ वर्षीय डा. कर्णसहितलाई पक्राउ गरेको थियो । डा. कर्णले ५ लाख रुपैयाँमा उक्त नवजात शिशु बेचेको खुलासा भएपछि प्रहरीले डा. कर्णसहित ६ जनालाई पक्राउ गरेको छ ।

पक्राउ पर्नेमा नवजात शिशु खरिद गर्ने, अस्पतालकी नर्स, शिशु बेच्ने डा. कर्ण, डा. कर्णका सहयोगी नर्स, नवजात शिशुका बुबा रहेकाे मोरङ प्रहरीका प्रवक्ता डीएसपी रन्जनकुमार दाहालले जानकारी दिए ।

के थियो घटना ?

भोजपुरको हतुवागढी गाउँपालिका–४ घरका २७ वर्षीय गोविन्द राई र २६ वर्षकी युवती करिब दुई वर्षयता प्रेममा थिए । यौन सम्बन्ध भयो । युवती गर्भवती भइन् । गर्भ बसेपछि गोविन्दले प्रेमिकालाई साउन १३ गते विराटनगरस्थित डा. कर्णको क्लिनिकमा लिएर आए ।

यतिबेला युवतीको गर्भ ९ महिनामा चलिरहेको थियो । युवतीलाई ब्यथा लाग्ने औषधि खुवाएर डा. कर्णले आफ्नो क्लिनिकनजिकै रहेको ग्रीनक्रस अस्पतालमा भर्ना गरे । युवतीले छोरी जन्माइन् । साउन १४ गते उनी अस्पतालबाट खाली हात डिस्चार्ज भइन् ।

कसरी पक्राउ परे ?

युवती डिस्चार्ज भएको एक हप्ता बितिसक्दा पनि बच्चा नपाएपछि उनी अस्पताल पुगेकी थिइन् । अस्पतालको रेकर्डमा बच्चा उनका प्रेमीले बुझेको देखिएको थियो । तर, युवती र उनका प्रेमी सुत्केरीपछि खाली हात अस्पतालबाट फर्किएका थिए ।

यहीबीचमा उनले प्रहरीलाई खबर गरिन् । र, प्रहरीले अनुसन्धान सुरु गरेको डीएसपी दाहाल बताउँछन् । उनी भन्छन्, ‘यो कुरा थाहा पाएपछि हामीले अनुसन्धान सुरु गरिरहेका थियौँ । केही तथ्य फेला परेपछि पीडितले उपचारमा संलग्न डाक्टर र प्रेमीविरुद्ध ३२ साउनमा जिल्ला प्रहरी कार्यालय मोरङमा किटानी जाहेरी दिनुभएको थियो । त्यसैका आधारमा हामीले उहाँहरूलाई पक्राउ गरेका छौँ ।’

प्रेमीले सुत्केरी अवस्थामा आफूलाई अलपत्र पार्दै डाक्टरसँगको मिलेमतोमा आफ्नो बच्चा बेचेको आरोप युवतीले लगाएकी छन् ।

कसले लियो नवजात शिशु ?

कटहरी गाउँपालिका– २ मा बस्दै आएको एक सामान्य परिवारले उक्त शिशु आफूहरूले खरिद गरेको स्वीकार गरेको डीएसपी दाहाल बताउँछन् ।

उनी भन्छन्, ‘लामो समयसम्म बच्चा नभएपछि उहाँहरूले बच्चा खरिद गरेको अनुसन्धानका क्रममा खुलेको छ । कतिमा खरिद गरेको भन्ने ठ्याक्कै पत्ता लागिसकेको छैन । कसैले ५ लाख भन्नुभएको छ । र, कसैले योभन्दा पनि ठूलो रकम भनिरहनुभएको छ । अहिले यो पनि अनुसन्धानकै क्रममा छ ।’

थप अनुसन्धान हुँदै

प्रेमीले बिहे गर्ने प्रलोभन देखाएर योजनाबद्ध रूपमा गर्भवती बनाएको प्रराम्भिक अनुसन्धानले देखाएको डीएसपी दाहाल बताउँछन् । उनले भने, ‘बिहे नै नगरेको व्यक्तिबाट बच्चा जन्मिएको छ । अहिलेसम्मको अनुसन्धानमा योजना बनाएर बच्चा जन्माएको देखिन्छ । अझै थप अनुसन्धान भइरहेको छ ।’

चिकित्सक र गोविन्दविरुद्ध व्यक्ति बेपत्ता पार्नेसम्बन्धी कसुरमा अनुसन्धान भइरहेको छ । कसुर पुष्टि भएमा डा. कर्णलाई १५ वर्षसम्म कैद र ५ लाख रुपैयाँसम्म जरिवाना हुन सक्छ ।

त्यस्तै, बिक्री गरिएको शिशुको उद्धार गरी जन्मदिने आमालाई हस्तान्तरण गर्ने तयारी आफूहरूले गरिरहेको डीएसपी दाहालले बताए ।

को हुन्, डा. कर्ण ?

डा. कर्ण स्त्री तथा प्रसूति रोग विशेषज्ञ हुन् । कोशी अस्पतालमा मेडिकल सुपेरिटेन्डेन्ट (मेसु) भएरसमेत काम गरिसकेका छन् । सरकारी सेवाबाट अवकाश लिएका डा. कर्ण निजी क्लिनिक संचालन गर्दै आइरहेका छन् ।

डा. कर्णले रकम लिएर निःसन्तान दम्पतीलाई बच्चा बिक्री गर्दै आएको सूचना पाएपछि प्रहरीले यसतर्फ थप अनुसन्धान गरिरहेको छ ।

प्रकाशित मिति: बुधबार, भदौ ६, २०८० १७:३३