अखिल नेपाल महिला संघमा नयाँ नेतृत्वको खोजी, काे–काे छन् दाबेदार ?

A+ A A-

एमालेनिकट महिला संगठन अखिल नेपाल महिला संघ (अनेमसंघ) नयाँ नेतृत्व चयनको खोजीमा लागेको छ । छैटौँ सम्मेलन भएको ११ वर्षपछि सातौँ सम्मेलन गरेर नयाँ नेतृत्वको खोजी थालेको हो । २५ चैतमा सम्मेलन सुरु हुन लागेको छ ।

अनेमसंघको अध्यक्षका लागि अहिले नेतृ थममाया थापा, नेतृ टुका हमाललागयतले चाहना राखेका छन् । सुजिता शाक्यले पनि अध्यक्षको चाहना राखे पनि उनीभन्दा सिनियर महिला नेतृहरूले नै दाबी गरेपछि उनी महासचिवको दाबेदार बनेकी छिन् ।

अनेमसंघको सम्मलेन आयोजक समितिको संयोजक थममाया थापामगर अहिले प्रमुख दाबीमा छिन् । उनलाई चुनौती दिनेमा टुका हमाल छन् । यसअघि संयोजक सीता पौडेल थिइन् । पौडेल २०७८ मा प्रदेश प्रमुख नियुक्त भएपछि सहसंयोजक रहेकी थापा संयोजक भएकी थिइन् ।

अनेमसंघको इतिहासमा झन्डै १७ वर्ष विद्यादेवी भण्डारी अध्यक्ष थिइन् । २०७२ मा भण्डारी राष्ट्रपति निर्वाचित भएपछि संयोजकमा पौडेल आएकी थिइन् । निरन्तर अध्यक्ष हुँदै आएकी भण्डारीलाई चुनौती दिने उर्मिला अर्यालले पार्टी छोडेर हिड्नुपर्ने अवस्था आयो । त्यसैले महिला संघमा भण्डारीको आलोचना गर्ने नेतृ अटाउने संभावना हुँदैन थियो ।

भण्डारीका प्रभाव भएको संगठनमा उनकै चाहना अनुसार नेतृत्व चयन हुने चर्चा पनि भइरहेको छ । भण्डारीनिकट पौडेल पुनः अध्यक्ष हुन सक्ने अवस्था नभएका कारण थापाको पक्षमा भण्डारी खुलेमा उनी अध्यक्ष हुन सक्ने अनुमान भइरहेको छ ।

थममाया थापा २०७४ मा भण्डारीकै कोटामा मन्त्री भएकी थिइन् । सोहीकारण भण्डारीको साथ थापालाई हुनसक्ने विश्लेषण भएको हो । त्यसो त, टुका हमाल पनि एमालेमा प्रभावशाली नेतृ हुन् । उनीहरूबीचमा सहमति नभए तेस्रो व्यक्ति अध्यक्षमा आउन सक्ने पनि आकलन भइरहेको छ । शिलापत्रसँगको कुराकानीमा थापाले आफूले अध्यक्ष हुने चाहना राखेको तर पार्टीले गर्ने निर्णय स्वीकार्य भएको बताइन् । उनले भनिन, ‘सम्मेलन आयोजक समितिको संयोजक भएको नाताले एकपटक निर्वाचित अध्यक्ष हौँ भन्ने लागेको छ ।’

प्रकाशित मिति: बिहीबार, चैत २३, २०७९ १३:०७