मधेशकाे मुख्यमन्त्री लिएर सत्तामा फर्किंदै जनमत, एमालेसँग आलाेपालाेकाे सहमति जुट्ने सम्भावना

मधेशकाे मुख्यमन्त्री लिएर सत्तामा फर्किंदै जनमत, एमालेसँग आलाेपालाेकाे सहमति जुट्ने सम्भावना

A+ A A-

मधेश प्रदेशमा जनमत पार्टीले प्रदेश सरकारको नेतृत्व गर्ने सम्भावना बढेको छ । एमाले र माओवादी केन्द्रका नेताहरूसमेतको छलफलमा उक्त विषयले प्रवेश पाएको हो । केन्द्रीय गठबन्धनमा भएको सहमतिअनुसार जनमतका संसदीय दलका नेता चन्दन सिंह मुख्यमन्त्री बन्ने सम्भावना बढेको हो । स्रोतका अनुसार जनमत र एमालेबीच मुख्यमन्त्री आलोपालो गर्ने गरी सहमति जुटाउने प्रयास भएको छ ।

एमाले स्रोतका अनुसार चन्दन सिंहलाई पहिलो खेपको मुख्यमन्त्री बनाउने र दोस्रो चरणमा एमालेले नेतृत्व गर्ने गरी छलफल अघि बढेको छ । एमाले अध्यक्ष केपी ओली, माओवादी केन्द्रका अध्यक्ष तथा प्रधामनन्त्री पुष्पकमल दाहाल प्रचण्ड र जनमत पार्टीका अध्यक्ष सीके राउतबीच पटकपटक यसबारे छलफल भइसकेको छ । एमाले स्रोतको दाबी अनुसार जनमतले मधेशमा सरकारको नेतृत्व गरेसँगै संघीय सरकारमा पनि सहभागी हुनेछ ।

त्यतिबेला उपेन्द्र यादव नेतृत्वको जसपा पनि सरकारबाट बाहिरिनेछ । मधेश प्रदेश र केन्द्र सरकारबाट एकसाथ बाहिरिने सम्भावना बढेको जसपा स्रोतको पनि बझाइ छ । जसपालाई जतिसक्दो चाँडो सत्ताबाट बाहिर निकाल्दा विभाजित अशोक राईको समूहलाई पनि फाइदा पुग्नेछ । मुख्यमन्त्री नभएपछि प्रदेशका सांसदहरू पनि उपेन्द्र यावदलाई छोडेर राईको समूहमा लाग्ने सम्भावना हुन्छ ।

प्रदेश सांसदलाई दल रोज्ने समय १७ दिन छ । त्यसैले, अहिले नै सरकार ढाल्ने र प्रदेश सांसद संख्या थप्ने रणनीतिमा राई समूह पनि सक्रिय छ । त्यसैले, अहिले जसपा केन्द्रदेखि प्रदेशसम्म चेपुवामा परेको छ । अहिलेसम्म राई समूहमा जसपाबाट ६ जना प्रदेश सांसद जाने अनुमान गरिएको थियो । तर, सरकार ढलेपछि भने संख्या बढ्ने अनुमान गरिएको छ ।

जनमत पनि जसपाका सांसदहरूको संख्या घटाएर ऊभन्दा ठूलो पार्टी हुने रणनीतिमा लागेको छ । त्यसैले, अहिले चन्दन सिंह पनि जसपाभित्र रणनीतिक चालबाजीमा लागेका छन् । त्यसमा सत्ता गठबन्धनका दलहरूसमेत सक्रिय भएका कारण मधेशको राजनीति निकै पेचिलो हुन थालेको छ ।