न्यूजिल्याण्डसँग प्रतिस्पर्धा गर्दै इंग्ल्याण्ड, अस्ट्रेलिया इंग्ल्याण्ड हारोस् भन्ने कामना गर्दै

न्यूजिल्याण्डसँग प्रतिस्पर्धा गर्दै इंग्ल्याण्ड, अस्ट्रेलिया इंग्ल्याण्ड हारोस् भन्ने कामना गर्दै

A+ A A-

टी-२० विश्वकप क्रिकेटको समूह-१ मा आज (मंगलबार) न्यूजिल्याण्ड र इंग्ल्याण्डले प्रतिस्पर्धा गर्दैछन् । तर यता, आयोजक राष्ट्र अस्ट्रेलिया भने इंग्ल्याण्डको हारको कामना गरिरहेको छ ।

ब्रिसबेन क्रिकेट मैदानमा न्यूजिल्याण्ड र इंग्ल्याण्डबीचको खेल दिउँसो १ः४५ बजे सुरु हुनेछ । इंग्ल्याण्डलाई पराजित गरे न्यूजिल्याण्ड विश्वकप क्रिकेटको सेमिफाइनलमा प्रवेश गर्नेछ । तर, न्यूजिल्याण्ड पराजित भए यो समूहमा सेमिफाइनल यात्रा निकै रोचक बन्ने छ ।

न्यूजिल्याण्ड निकै लयमा छ । आफ्नो पहिलो खेलमा नै अस्ट्रेलियालाई ८९ रनले पराजित गरेको न्यूजिल्याण्डले दोस्रो खेलमा भने अफगानिस्तानसँग वर्षाका कारण अंक बाँडेको थियो । तेस्रो खेलमा न्यूजिल्याण्डले श्रीलंकालाई ६५ रनले पराजित गरेको थियो ।

यता, इंग्ल्याण्डले भने आफ्नो पहिलो खेलमा अफगानिस्तानलाई पाँच विकेटले पराजित गरेको थियो । दोस्रो खेलमा आयरल्याण्डसँग पाँच रनले हारेको इंग्ल्याण्डले तेस्रो खेलमा भने अस्ट्रेलियासँग वर्षाका कारण अंक बाँडेको थियो ।

न्यूजिल्याण्डलाई पराजित गर्दै इंग्ल्याण्ड सेमिफाइनल पुग्ने दाउमा छ । तर, अस्ट्रेलिया भने इंग्ल्याण्डको हारको कामना गरिरहेको छ । इंग्ल्याण्ड हारे न्यूजिल्याण्ड सेमिफाइनलमा पुग्नेछ । यता, इंग्ल्याण्ड हारेसँगै अस्ट्रेलिया सेमिफाइनल नजिक पुग्नेछ । त्यसैले अस्ट्रेलियाका खेलाडी आज इंग्ल्याण्ड हारेको हेर्न चाहन्छन् ।

तीन खेलमा दुई जित र एक खेलमा अंक बाँड्दै न्यूजिल्याण्ड पाँच अंक बनाएर समूह–१ को शीर्ष स्थानमा छ । चार खेलबाट पाँच अंक बनाएको अस्ट्रेलिया दोस्रो स्थानमा रहँदा तीन खेलबाट तीन अंक जोडेको इंग्ल्याण्ड तेस्रो स्थानमा छ । चौथो स्थानमा आयरल्यान्ड, पाँचौँमा श्रीलंका र छैटौँ स्थानमा अफगानिस्तान छन् ।

प्रकाशित मिति: मंगलबार, कात्तिक १५, २०७९ ११:५२