कर्णालीका यी सात निर्वाचन क्षेत्र, जहाँ हुँदैछ रोचक प्रतिस्पर्धा

A+ A A-

आगामी प्रतिनिधिसभा निर्वाचनमा कर्णालीका सातवटा निर्वाचन क्षेत्रमा हेभिवेट नेताको उम्मेदवारी र उनीहरूका प्रतिस्पर्धीका कारण रोचक प्रतिस्पर्धा हुने देखिएको छ । कर्णालीमा १२ प्रतिनिधिसभा सदस्यका लागि ७४ जना चुनावी प्रतिस्पर्धामा उत्रिएका छन् । मंसिर ४ मा हुने निर्वाचनको मिति नजिकिएसँगै कर्णालीमा चुनावी अंकगणितकाे हिसाबकिताब गर्न थालिएको छ । राष्ट्रिय राजनीतिमा ख्यातिप्राप्त नेताको निर्वाचन क्षेत्रलाई विशेष चासोका साथ हेरिएको छ ।

प्रदेश राजधानीसमेत रहेको सुर्खेतको क्षेत्र नम्बर १ मा कांग्रेस उपसभापति पूर्णबहादुर खड्का सत्तारुढ गठबन्धनबाट साझा उम्मेदवार बनेका छन् । २०७४ को निर्वाचनमा खड्कालाई हराएका एमालेका ध्रुवकुमार शाही फेरि उनैसँग प्रतिस्पर्धामा उत्रिएका छन् । अघिल्लो पटक झण्डै ३ हजार मतान्तरले पराजित भएका खड्का गठबन्धनको आडमा यसपटक शाहीलाई हराएर हारको बदला लिने दाउमा छन् ।

खड्कालाई सघाएको नेकपा माओवादी केन्द्रबाट २०७४ मा प्रदेशसभामा विजयी भएका ठम्मर विष्ट एमाले प्रवेश गरेपछि माओवादीबाट खड्कालाई जाने भोट एमालेमा जान सक्ने खतरा पनि उत्तिकै छ । यद्यपि गठबन्धनमा गडबड नभए खड्काले स्वत: चुनाव जित्ने सुर्खेत कांग्रेसको आकलन छ । २०७४ मा माओवादीकै कारण चुनाव हारेका खड्का यसपालि उही माओवादीलाई साथमा लिएर चुनावी मैदानमा उत्रिएका छन् ।

६ पटक प्रतिनिधिसभा चुनाव लडेका खड्का पाँच पटक विजयी भएका छन् । साविक मालारानी गाविसका अध्यक्ष रहेका शाही पनि बलियो जनाधार भएका नेता मानिन्छन् । २०७४ मा पहिलोपटक खड्कालाई हराएर प्रतिनिधिसभामा डेब्यु गरेका शाही फेरि जित निकाल्ने दाउमा छन् ।

गठबन्धनको बलमा चुनावमा होमिएका खड्का र शाहीबीच रोचक चुनावी प्रतिस्पर्धा हुने देखिन्छ । तर, बाजी कसले मार्ने हो त्यो भने अहिले नै भन्न सकिने अवस्था छैन । गत वैशाखमा सम्पन्न स्थानीय तहको निर्वाचनमा कांग्रेस र एमालेले ३-३ पालिका जितेका छन् ।

यस्तै, अर्को रोचक मानिएको जिल्ला रुकुम पश्चिम हो । एक प्रतिनिधिसभा रहेको रुकुम पश्चिमबाट गठबन्धन दलबाट माओवादी केन्द्रका उपमहासचिव तथा अर्थमन्त्री जनार्दन शर्मा उम्मेदवार बनेका छन् । माओवादीको बलियो पकड क्षेत्र मानिएको रुकुम पश्चिममा शर्मालाई शिक्षकबाट राजनीतिमा आएका एमाले रुकुम जिल्ला अध्यक्ष नन्दलाल देवकोटाले चुनौती दिनेछन् । शर्माले २०७४ मा वाम गठबन्धनबाट कांग्रेसका गोपालजंग शाहलाई हराएका थिए ।

पूर्वगृहमन्त्री एवम् माओवादी उपमहासचिव शक्तिबहादुर बस्नेतलाई जाजरकोटबाट यसपालि एमालेका निरज आचार्यले चुनौती दिइरहेका छन् । गठबन्धनबाट उम्मेदवार बनेका बस्नेतलाई एमालेका आचार्यसँगै जीवन रुपान्तरणका प्रवर्द्धक तथा सामाजिक अभियन्ता नरबहादुर कार्कीले पनि चुनौती दिनेछन् ।

युवा नेता आचार्य जाजरकोटमा लोकप्रिय नेताका रूपमा चिनिन्छन् । तत्कालीन नेकपा विभाजनपछि एमालेभित्र विवाद हुँदा माधव नेपाल खेमामा उभिएका आचार्य १० बुँदे सहमतिपछि एमालेमै बसेका थिए । आचार्य एमाले केन्द्रीय निर्वाचन विभागका उपप्रमुख हुन् भने कार्की पछिल्लो समय युवापुस्ताको रोजाइ बन्दै गएका नेता हुन् । कार्की यसअघि माओवादी केन्द्रमा थिए । तर, पछिल्लो समय कार्की स्वतन्त्र उम्मेदवारी दिएर चुनावी प्रचारमा लागेका छन् ।

यस्तै, अर्को रोचक क्षेत्र हो जुम्ला । गठबन्धनका तर्फबाट उम्मेदवार बनेकी माओवादी नेतृ गोमा गौतम (कुँवर) लाई एमालेका रतननाथ योगी र राप्रपाका प्रवक्ता ज्ञानेन्द्र शाहीले चुनौती दिँदैछन् । तर, यो क्षेत्रमा गठबन्धन बलियो मानिन्छ । एमाले जुम्लामा कमजोर छ । राप्रपाका शाहीले पछिल्लो समय जनाधार बटुल्दै गएका छन् । शाही र योगीले गठबन्धनलाई कडा चुनौती आकलन गरिएको छ ।

यस्तै, चुनावी प्रतिस्पर्धामा सल्यानबाट बलियो उम्मेदवार बनेका नेता हुन् प्रकाश ज्वाला । ज्वालाको प्रतिस्पर्धीका रूपमा एमालेका राजेन्द्रवीर राय मैदानमा उत्रिएका छन् । ज्वाला संसदीय अभ्यासमा फ्लोर क्रस गराउने पहिलो नेता हुन् । तत्कालीन माओवादीका महेन्द्रबहादुर शाही नेतृत्वको सरकार अल्पमतमा परेपछि ज्वालाको नेतृत्वमा एमालेका चार जना सांसदले फ्लोर क्रस गरेका थिए । एमाले विभाजनपछि उनी समाजवादीमा लागेका हुन् ।

ज्वालाको गृहजिल्ला रहेको सल्यानमा पूर्वसहकर्मी रायले कडा चुनौती दिनेछन् । यस्तै, हेभिवेट नेता नभए पनि दैलेख क्षेत्र नम्बर १ मा पनि पूर्वसहकर्मीबीच रोचक चुनावी प्रतिस्पर्धा हुने देखिएको छ । तत्कालीन एमालेका अमरबहादुर थापा र रवीन्द्रराज शर्माबीच चुनावी प्रतिस्पर्धा हुँदैछ । लामो समय एमालेमा काम गरेका शर्मा र थापा पहिलोपटक प्रतिनिधिसभा चुनावमा प्रतिस्पर्धीका रूपमा मैदान उत्रिएका हुन् । छ महिना भौतिक पूर्वाधारमन्त्रीसमेत बनेका थापा नेकपा समाजवादीका प्रदेश अध्यक्ष हुन् ।

दैलेखमा माओवादीको जनाधार कमजोर छ । दैलेख जिल्ला अध्यक्षसमेत रहेका शर्मा माओवादीको कमजोर जनाधार रहेकाे र कांग्रेसको मत लिएर चुनाव जित्ने दाबी गर्छन् ।

यस्तै, कालीकोटमा माओवादी केन्द्रका महेन्द्रबहादुर शाहीलाई एमालेका नागेन्द्र शाही (नेसनल) ले चुनौती दिँदैछन् । २०७४ मा वाम गठबन्धनबाट निर्वाचित भएका महेन्द्रलाई एमालेका नागेन्द्र यसपालि भारी हुने आकलन गरिएको छ ।कालीकोट इन्चार्जसमेत रहेका नागेन्द्र एमाले कालीकोटका प्रभावशाली नेताका मानिन्छन् ।

प्रकाशित मिति: सोमबार, असोज ३१, २०७९ १३:५५