पर्यटक भित्र्याउन पर्यटन बोर्डले सुरु गर्‍यो आन्तरिक टुरिजम मार्ट

A+ A A-

नेपाल पर्यटन बोर्डले भारतीय पर्यटक भित्र्याउन सातै प्रदेशमा आन्तरिक टुरिजम मार्ट सुरु गरेको छ ।

बोर्डका प्रमुख कार्यकारी अधिकृत धनन्जय रेग्मीले पर्यटन प्रवर्द्धनका लागि सातै प्रदेशबाट भारतीय पर्यटक भित्र्याउन आन्तरिक टुरिजम मार्ट सुरु गरिएको बताएका हुन् ।

मंगलबार न्युज एजेन्सी नेपालसँग कुराकानी गर्दै रेग्मीले भारतका विभिन्न शहरका पर्यटक घुम्न आतुर रहेकाले ती पर्यटकलाई नेपालको आन्तरिक तथा सीमा क्षेत्रको पर्यटन प्रवर्द्धनका लागि टुरिजम मार्टका माध्यमबाट ल्याउने अभियान सुरु गरिएको बताए । उनले पछिल्लो समय भारतीय पर्यटक नेपाल सरकारको कुनै प्याकेजबिना नै अत्यधिक मात्रामा आउने गरेकाले थप व्यवस्थित बनाएर पर्यटक बढाउन टुरिजम मार्ट अभियान सुरु गरिएको बताए ।

कोरोना महामारीपछि भारतीय पर्यटक घुम्न उपयुक्त गन्तव्यको खोजिरहेकाले त्यो गन्तव्य समयमा नै नेपाल बनाउनु पर्ने आवश्यक रहेको रेग्मीले बताए । उनले बोर्डले भारतका विभिन्न शहरका टुर अपरेटरसँग सहकार्य गरेर टुर अपरेटरका माध्यमबाट नेपालमा भारतीय पर्यटक बढाउने योजना बनाएको बताए । पछिल्लो समय भारतीय पर्यटक बढ्दै गएकाले सीमावर्ती क्षेत्रमा ठूला होटल तथा मनोरञ्जन जोनसमेत सञ्चालनमा आएको जानकारी दिए ।

उनले कोरोना महामारीका कारण थला परेको पर्यटन उद्योगलाई नयाँ सोचका साथ प्रवर्द्धन गर्ने उद्देश्यले बोर्डले नयाँ तरिकाबाट काम गर्न लागेको बताए । रेग्मीले सरकारले पर्यटन प्रवर्द्धन गर्न नयाँ तरिकाबाट नेपालमा भएका सबै गन्तव्यको प्रचार गरेर त्यही अनुसारको प्याकेज बेच्न सक्नुपर्ने बताए ।

नेपालका विभिन्न प्रदेशका पर्यटन व्यवसायीहरूको व्यवसायिक गतिविधिको विकास, विस्तार र अन्तर्राष्ट्रिय स्रोत–बजारका टुर अपरेटरहरूसँग व्यवसायिक सम्बन्ध स्थापित गर्न प्रत्येक प्रदेशमा ‘प्रादेशिक ट्राभल मार्ट‘ को आयोजना गरेर भारतीय पर्यटन बढाउने बोर्डले योजना बनाएको उनले बताए ।

प्रकाशित मिति: मंगलबार, चैत ८, २०७८ १६:५४