बागमती सरकारले ‘एक वडा, एक पशु स्वास्थ्यकर्मी’ कार्यक्रम सञ्चालन गर्ने

A+ A A-

बागमती प्रदेश सरकारले ‘एक वडा, एक पशु स्वास्थ्यकर्मी’ कार्यक्रम सञ्चालन गर्ने भएको छ ।

स्थानीय तहको वडासम्मै प्राविधिक सेवा विस्तार गर्ने उद्देश्यले ‘एक वडा, एक पशु स्वास्थ्यकर्मी’ कार्यक्रम कार्यान्वयनमा ल्याउन लागिएको प्रदेश कृषि तथा पशुपन्छी विकास मन्त्रालयले जानकारी दिएको छ ।

पशुपन्छी तथा मत्स्यमा लाग्ने रोगहरूको अन्वेषण, नियन्त्रण, रोकथाम तथा उन्मूलनका लागि प्रदेश सरकारले ‘एक वडा, एक पशु स्वास्थ्यकर्मी’ कार्यक्रम अघि सारेको मन्त्रालयका सचिव डा. शरणकुमार पाण्डेले जानकारी दिए ।

प्रदेश सरकारको साझा न्यूनतम कार्यक्रममा समेटिएको ‘एक वडा, एक पशु स्वास्थ्यकर्मी’ कार्यक्रमलाई मन्त्रालयले आफ्नो मार्गचित्रमा पनि समावेश गरिसकेको छ । कृषि तथा पशुपन्छीमन्त्री बसुन्धरा हुमागाईंले पनि कृषि, पशुपन्छी तथा मत्स्य क्षेत्रको रुपान्तरणको लागि भन्दै ५१बुँदे मार्गचित्र सार्वजनिक गरेका थिए । ‘एक वडा, एक पशु स्वास्थ्य क्लिनिक’ स्थापनाका लागि लागिरहेको मन्त्रालयले अब ‘एक वडा, एक पशु स्वास्थ्यकर्मी’ कार्यक्रम पनि सञ्चालन गर्ने भएको हो ।

मार्गचित्रमा ‘एक वडा, एक पशु स्वास्थ्यकर्मी’ कार्यक्रमसहित चारवटा विषय थप गरिएको मन्त्रालयले जनाएको छ । गठबन्धन सरकारको नेतृत्व गरिरहेका मुख्यमन्त्री राजेन्द्र पाण्डेले साझा न्यूनतम कार्यक्रममा समेट्दै यसलाई छिट्टै कार्यान्वयनमा लैजान निर्देशन दिइसकेका छन् ।

मार्गचित्रमा पशु स्वास्थ तथा क्लिनिकल सेवालाई विस्तार गर्न स्थानीय तहसँगको समन्वयमा ‘एक वडा एक पशु स्वास्थ्य क्लिनिक’ सञ्चालनमा जोड दिइएको हो । नेपाल सरकारले पशु स्वास्थ्य सेवालाई अत्यावश्यक सेवाका रुपमा घोषणा गरेको सन्दर्भमा प्रदेश सरकार एक वडा एक पशु स्वास्थ्य क्लिनिक स्थापनामा लागेको मन्त्रालयका सूचना अधिकारी अनुप अधिकारीले बताए ।

ग्रामिण क्षेत्रमा पशु सेवा प्रदायक र कृषकबीचको दूरी कम गर्दै पशुपन्छी क्षेत्रको विकासका लागि ‘एक वडा, एक पशु स्वास्थ्यकर्मी’ र पशु क्लिनिक कार्यक्रम ल्याइएको मन्त्रालयले जनाएको छ । स्थानीय तहको वडासम्मै पशु सेवालाई सहज, सरल, पहुँचयोग्य बनाई छिटोछरितो र गुणस्तरीय सेवा प्रदान गर्न कार्यक्रम ल्याइएको मन्त्रालयका सचिव पाण्डेले जानकारी दिए ।

कार्यक्रमबाट व्यवसायिक पशुपन्छीपालनका आधुनिक प्रविधिमा कृषकको पहुँच पुग्नुका साथै पशुमा लाग्ने रोगहरूको न्यूनीकरण र निराकरण गर्न सहज हुने सचिव पाण्डेले बताए । मन्त्रालयले ‘एक वडा एक पशु स्वास्थ्य क्लिनिक’ स्थापनाका लागि सम्बन्धित स्थानीय तहसँग समन्वय गरी वडा प्रस्ताव गर्न आफ्ना मातहतका कार्यालयलाई परिपत्र गरिसकेको जनाएको छ ।

मन्त्रालयले प्रारम्भिकमा वडाहरू प्रस्तावका लागि पशु स्वास्थ्य प्राविधिक हुनुपर्ने, पशु स्वास्थ्य क्लिनिक स्थापनाका लागि वडाको आफ्नै जमिन हुनुपर्ने, पशुपन्छी पालनको घनत्व भएको क्षेत्र आदिको आधारमा वडाहरूलाई प्रस्ताव गर्न मातहतका कार्यालयलाई निर्देशन दिइएको हो ।

प्रकाशित मिति: बुधबार, माघ ५, २०७८ ११:११