बागमतीका मुख्यमन्त्रीलाई यातायात व्यवसायीको आग्रह- २० वर्ष पुराना गाडीमा लागेको प्रतिबन्ध हटाइदिनूस्

बागमतीका मुख्यमन्त्रीलाई यातायात व्यवसायीको आग्रह- २० वर्ष पुराना गाडीमा लागेको प्रतिबन्ध हटाइदिनूस्

A+ A A-

सार्वजनिक यातायात केन्द्रीय महासंघले २० वर्ष पुराना गाडीमा लगाइएको प्रतिबन्ध हटाउन माग गरेको छ । महसंघका पदाधिकारीले शुक्रबार बागमती प्रदेशका मुख्यमन्त्री राजेन्द्र पाण्डेलाई भेटेर २० वर्ष पुराना सार्वजनिक यातायातमा लगाइएको प्रतिबन्ध हटाउन माग गरेका हुन् ।

सवारीसाधनको आयु तोक्ने व्यवस्था हटाई प्राविधिक जाँचका आधारमा पूर्ण सञ्चालन गर्ने व्यवस्था मिलाइदिन महासंघले आग्रह गरेको हो । १ चैत २०७२ देखि तत्कालीन सरकारले २० वर्ष नाघेका सवारी हटाउने निर्णय लागू गरेको थियो ।

भौतिक पुर्वाधार तथा यातायात मन्त्रालयको समृद्ध नेपालका लागि सडक, रेल तथा यातायात विकासको पाँच वर्षे रणनीतिक कार्ययोजनाअन्तर्गत् देशभर २० वर्ष पुराना सार्वजनिक यातायात चलाउन प्रतिबन्ध गरिएको थियो ।

उक्त निर्णयको सार्वजनिक यातायात केन्द्रीय महासंघले विरोध गर्दै आइरहेको थियो । शुक्रबार मुख्यमन्त्री पाण्डेलाई १३ बुँदे मागपत्र पेश गर्दै महासंघका केन्द्रीय अध्यक्ष डोलनाथ खनालले सवारी साधनको आयु तोक्ने व्यवस्था हटाएर प्राविधिक जाँचका आधारमा सञ्चालनको व्यवस्था गर्ने माग गरे ।

विद्युतीय सवारीसाधनमा रुपान्तरण हुन सक्ने सवारीसाधनलाई उपयुक्त कानुन बनाएर रुपान्तरण हुने व्यवस्था पनि मिलाउन माग गरिएको छ ।

महासंघले यसअघि संघीय सरकार र प्रदेश सरकारलाई पटक–पटक मागपत्र पेस गरे पनि समस्या समाधान नभएको भन्दै मुख्यमन्त्रीको ध्यानाकर्षण गराएको थियो ।

मुख्यमन्त्री पाण्डेले यातायात क्षेत्रको कानुनी र नीतिगत समस्या, यातायात व्यवस्थापन प्रणाली, चालक अनुमती पत्र वितरण प्रणाली, सडक संरचनाको सुधार र विस्तार जस्ता क्षेत्रमा देखिएका समस्या समाधान गर्ने प्रतिबद्धता व्यक्त गरे ।

केही महिनाभित्रै जनताले अनुभूत गर्ने प्रकारको परिवर्तन देखिनेमा ढुक्क रहन पाण्डेको आग्रह थियो । सार्वजनिक यातायात क्षेत्रको समस्या समाधानका निम्ती छलफल गर्न मुख्यमन्त्री पाण्डेले २४ मंसिरमा बैठक बोलाउन प्रमुख सचिवलाई निर्देशन दिएका छन् ।