म्याग्दीको दरखोला लघुजलविद्युत् परियोजनाको विद्युत्‌गृह बाढीले बगायो

प्रतिकात्मक तस्वीर ।

A+ A A-

म्याग्दीको धवलागिरी गाउँपालिका–२ लुलाङमा रहेको दरखोला दोस्रो लघु जलविद्युत् परियोजनाको विद्युत्‌गृह बाढीले बगाएको छ । गएराति अविरल वर्षासँगै आएको बाढीले ४५ किलोवाट क्षमताको लघु जलविद्युत्‌को विद्युत्‌गृह बगाएको हो ।

वर्षासँगै नदीको तटीय क्षेत्रमा गएको पहिरो र बाढीका कारण लघु जलविद्युत् परियोजना बगाउँदा एक करोड ५० लाखभन्दा बढीको क्षति भएको गाउँपालिका अध्यक्ष थमसरा पुनले बताइन् । उनका अनुसार दुई वर्षअघि पुनःनिर्माण गरिएको उक्त परियोजनाबाट ३७८ घरधुरीले विद्युत् सेवा उपभोग गर्दै आएका थिए ।

मध्यरातमा अविरल वर्षासँगै आएको बाढीले विद्युत्‌गृहको भवनलगायतका महत्वपूर्ण सामान बगाएको छ । बाढीले परियोजनाको बाँध र नहरमा समेत ठूलो क्षति पुर्‍याएको छ । तटीय क्षेत्रको जमिन र बस्तीमा समेत क्षति पुर्‍याएको छ ।

लघु जलविद्युत्‌को विद्युत्‌गृह बगाएपछि स्थानीय बस्ती अन्धकार बनेको र स्थानीयको जनजीवनमा प्रत्यक्ष प्रभाव पार्ने देखिएको स्थानीय लुलाङ आधारभूत विद्यालयका प्रधानाध्यापक नागेन्द्र ठाकुरले जानकारी दिए ।

'यहाँ केन्द्रीय प्रसारणको पहुँच छैन, लघु जलविद्युत् बगाएपछि मोबाइल चार्ज र साँझमा बालबालिकालाई अध्ययनमा समेत समस्या हुने भएको छ,' ठाकुरले भने । बाढीले लघु जलविद्युत्‌मा पुर्‍याएको क्षतिको अवस्थाबारे अहिले स्थानीय जनप्रतिनिधि, युवा क्लबलगायत प्रतिनिधिको टोली निरीक्षण गर्न खटिएको गाउँपालिकाले जनाएको छ ।

२०७२ साउनमा जुगेपानीमा आएको पहिराले विद्युत्‌गृह र नहर बगाएर बन्द भएको दरखोला दोस्रो लघुजलविद्युत् परियोजना दुई वर्षअघि एक करोड ५२ लाखको लागतमा पुनःनिर्माण गरिएको थियो । लुलाङ, खोरीया, मेरनी र लमसुङका स्थानीयले यस परियोजनाबाट लाभान्वित भएका थिए ।

वैकल्पिक ऊर्जा प्रवर्द्धन केन्द्रको ८५ लाख र धवलागिरी गाउँपालिकाको ५० लाख सहयोगमा स्थानीयले जनश्रमदानसमेत गरेर यस परियोजनाको क्षमता बढाएर पुनःनिर्माण गरेका थिए ।

प्रकाशित मिति: सोमबार, भदौ २१, २०७८ १२:४१