सरकारकाे कमजाेर कूटनीति : नेपाली आकाशमा भारतीय हेलिकोप्टर, नेपालले ड्रोन उडाउन पनि पाएन

सरकारकाे कमजाेर कूटनीति : नेपाली आकाशमा भारतीय हेलिकोप्टर, नेपालले ड्रोन उडाउन पनि पाएन

A+ A A-

भारतीय सीमा सुरक्षा बल (एसएसबी)ले तुइनकाे डाेरी काटिदिँदा महाकाली नदीमा बेपत्ता भएका दार्चुलाका जयसिंह धामीबारे सरकारले औपचारिक रूपमा मुख खाेलेकाे छैन ।

छानबिन समितिकाे प्रतिवेदनले एसएसबीकाे उपस्थितिमा घटना भएकाेसम्म भनेकाे छ । तर, त्यसबारे अझैसम्म भारतलाई न औपचारिक जानकारी गराइएकाे छ, न त कुनै आपत्ति जनाइएकाे छ ।

दार्चुलाको ब्यास गाउँपालिका–२, मालका ३३ वर्षीय धामी एक महिनाअघि १५ साउनमा तुइनबाट तरेर नेपालहुँदै भारत जाने क्रममा एसएसबीले तुइन काटेर खसालेपछि नदीमा बेपत्ता भएका थिए ।

धामी बेपत्ता प्रकरणबारे छानबिन गर्न सरकारले गृह मन्त्रालयका सहसचिव जनार्दन गौतमको नेतृत्वमा छानबिन समिति बनाएको थियो । उक्त समितिले मंगलबार गृहमन्त्री बालकृष्ण खाँणलाई प्रतिवेदन बुझाउँदै घटना एसएसबीकै कारण भएको निष्कर्षकाे प्रतिवेदन बुझाएको थियाे ।

त्यसबारे भारतीय पक्षलाई भने अझै औपचारिक जानकारी दिइएको छैन ।

छानबिन समितिले एक महिनाको अध्ययनपछि प्रतिवेदन तयार पारेको थियो । प्रतिवेदनमा धामीको परिवारलाई क्षतिपूर्ति दिलाउन भारतसँग कूटनीतिक पहल गर्न सिफारिस गरेको छ । यस्तै, धामीका आश्रित परिवारलाई नेपाल सरकारका तर्फबाट समेत पालनपोषण र शिक्षादीक्षा दिन सिफारिस गरिएको छ ।

गृह मन्त्रालयका प्रवक्ता सहसचिव फणीन्द्रमणि पोखरेलले भने भारतलाई औपचारिक जानकारीका लागि परराष्ट्र मन्त्रालयलाई जानकारी गरिसकिएकाे बताए । ‘हामीले घटनाबारे भारतीय पक्षलाई औपचारिक जानकारीका लागि परराष्ट्र मन्त्रालयलाई पत्राचार गरिसकेका छौँ । परराष्ट्रले त्यसबारे काम गर्दै होला,’ उनले भने ।

उता भारतसँगको कूटनीतिक पहलबारे परराष्ट्र मन्त्रालयसँग जानकारी लिन प्रवक्ता सहसचिव सेवा लम्सालसँग टेलिफाेन गर्दा सम्पर्कमा आउन चाहिनन् ।

छानबिनका लागि महाकालीमा ड्रोन उडाउन दिइएन

सरकारले बेपत्ता भएका धामीको खोजीका लागि नेपाल–भारत सीमा नदी महाकालीको किनार क्षेत्रमा ‘ड्रोन’ क्यामेरा उडानको अनुमति मागेको थियो । तर, भारतले आफ्नो भूमिमा ड्रोन क्यामेरा उडानको अनुमति दिन नसकिने जवाफ दियो । सोही कारण धामीको खोजीमा ड्रोन क्यामेरा प्रयोग हुन सकेन ।

भारतले भने नेपाली भूमि दार्चुला सदरमुकाम खलंगा बजारमाथि पटक-पटक हेलिकोप्टर उडाउँदै आएको छ ।

महाकाली सीमा मात्रै होइन, नेपाली सेनाको ब्यारेक रहेको खलंगामाथिबाट नै भारतीय हेलिकोप्टर उड्दै आएको छ । यसबारे सरकारले भारतसँग अहिलेसम्म कुनै औपचारिक छलफलसमेत गर्न सकेको छैन ।

भारतले नेपाली भूमिमाथि हेलिकोप्ट अहिले मात्रै नभएर वर्षौंदेखि त्यसरी नै उडाउँदै आएको दार्चुलाका स्थानीयले बताउँदै आएका छन् ।

नेपाल–भारत सीमा कालापानीमा रहेको भारतीय सेनाको बन्दोबस्तीका सामान पुर्‍याउन सैन्य हेलिकोप्टरले दार्चुलाको ब्यास गाउँपालिकाको भूमि प्रयोग गरेर उड्ने गरेको छ ।

प्रकाशित मिति: शुक्रबार, भदौ १८, २०७८ २१:५२