अवरिल वर्षाको असर: कैलालीको चुरेमा जमिन भासिँदा २५ घरधुरी उच्च जोखिममा

A+ A A-

कैलालीको चुरे गाउँपालिका–५ काफलगौरामा जमिन भासिँदा बस्ती जोखिममा परेको छ ।

अविरल वर्षाको कारण गाउँको चारैतिर जमिन भासिएपछि २५ घरधुरी उच्च जोखिममा परेको जिल्ला प्रहरी कार्यालय कैलालीले जनाएको छ ।

जोखिममा परेका परिवारलाई स्थानीय तहको समन्वयमा सुरक्षित स्थानमा सार्ने पहल भइरहेको जिल्ला प्रहरी कार्यालय कैललीका प्रवक्ता एवम् प्रहरी नायब उपरीक्षक प्रतीक बिष्टले बताए ।

यसैगरी, सोही वडाको गोपालेमा पाँच घरपरिवार पहिरोको जोखिममा परेका छन् । जिल्ला प्रहरी कार्यालयका अनुसार मानबहादुर थामी मगर, सुरतबहादुर थापा, डम्मरबहादुर थापा, गगन धामी र मनोज राईको घर पहिरोको जोखिममा परेको छ । जोखिममा परेका परिवारलाई स्थानीय तहसंग समन्वय गरेर सुरक्षित स्थानमा सार्ने पहल भैरहेको जनाइएको छ । शुक्रबारको वर्षासँगै सो ठाउँमा पहिरो गएको थियो ।

सर्तक रहन कैलाली प्रहरीको आग्रह

कैलालीका विभिन्न स्थानमा बाढी, पहिरो, डुबानलगायतका समस्या देखिएकाले जिल्ला प्रहरी कार्यालय कैलालीले पूर्वसतर्कता अपनाउन सबैमा अनुरोध गरेको छ ।

केही दिनदेखिको अविरल वर्षाले जिल्लामा विभिन्न स्थानमा डुबान पर्ने, बाढी आउने, पहिरो खस्ने तथा नदी, नाला, खोलामा पानीको सतह बढ्न गई जनजीवन प्रभावित हुनुका साथै जनधनको क्षतिसमेत भइरहेकाले जिल्ला प्रहरी कार्यालयले पूर्वसावधानी अपनाउन अनुरोध गरेको हो ।

कैलालीमा नदी तर्ने क्रममा युवक बेपत्ता

कैलालीको मोहना नदी तर्ने क्रममा एक युवक बेपत्ता भएका छन् । कञ्चनपुरबाट कैलालीतर्फ आउँदै गरेका धनगढी उपमहानगरपालिका वडा नम्बर ३ का २८ वर्षीय पुरन राना नदी तर्ने क्रममा बेपत्ता भएको जिल्ला प्रहरी कार्यालय कैलालीले जनाएको छ ।

शुक्रबार साँझ ६ बजेतिर तीन जना कैलाली आउदै गर्दा मोहना नदी तर्ने क्रममा राना बेपत्ता भएको प्रहरीले जनाएको छ । उनीसँगै आएका दुई जनाले भने नदी पार गरेको प्रहरीले जनाएको छ । युवकको खोजीका लागि गोताखोरको टोली खटाइएको छ । सशस्त्र प्रहरी बलको गोताखोर टोलीले खोजी कार्य सुरु गरेको जिल्ला प्रहरी कार्यालय कैलालीले जनाएको छ ।

प्रकाशित मिति: शनिबार, भदौ १२, २०७८ १८:५५