मिर्गौला र मुटुको भल्व फेर्नुपर्ने बिरामीलाई थप दुई लाख रुपैयाँ दिने लुम्बिनी प्रदेश सरकारको निर्णय

मिर्गौला र मुटुको भल्व फेर्नुपर्ने बिरामीलाई थप दुई लाख रुपैयाँ दिने लुम्बिनी प्रदेश सरकारको निर्णय

A+ A A-

लम्बिनी प्रदे‍श सरकारले क्यान्सर, मिर्गौला परिवर्तन र मुटुको भल्व फेर्नुपर्ने बिरामीहरूलाई उपचारका लागि हाल पाइरहेको सुविधाका अतिरिक्त प्रदेश सरकारको तर्फबाट थप दुई लाखका दरले उपलब्ध गराउने निर्णय गरेको छ ।

नवनियुक्त मुख्यमन्त्री केसीको अध्यक्षतामा बसेको पहिलो मन्त्रिपरिषद् बैठकले कोभिड -१९ का बिरामीको तत्काल उद्धार गर्न हटलाइन सञ्चालन गर्ने, एम्बुलेन्सको व्यवस्था गर्ने र सोको खर्च प्रदेश सरकारले व्यहोर्ने निर्णय पनि गरेको छ ।

त्यस्तै, प्रदेश सरकारको प्रवक्तामा आर्थिक मामिला तथा योजनामन्त्री कृष्णध्वज खड्‌कालाई तोक्ने निर्णय बैठकले गरेको छ । बैठकले मुख्यमन्त्रीको प्रमुख सल्लाहकारमा अमरबहादुर डाँगीलाई नियुक्त गर्ने, प्रदेश सरकार (कार्यसम्पादन पहिलो संशोधन) नियमावली, २०६५ स्वीकृत गर्नेसहित आठ निर्णय गरेको छ ।

यस्ता छन् निर्णय :

१ प्रदेश सरकार (कार्यसम्पादन पहिलो संशोधन) नियमावली, २०६५ स्वीकृत गर्ने निर्णय,

२. कोभिड -१९ का बिरामीको तत्काल उद्धार गर्न हटलाइन र सवारीसाधन (एम्बुलेन्स) को व्यवस्था गर्ने र सो को खर्च प्रदेश सरकारले व्यहोर्ने,

३. कोराना प्रभावित क्षेत्रमा स्वास्थ्य शिविरमार्फत एण्टिजेन टेष्टको व्यवस्था गरी कोभिड प्रभावितको उपचार र उद्धार गर्ने,

४. कोभिड- १९ विरुद्धको खोप वितरण प्रणालीलाई प्रभावकारी बनाई प्रदेशवासी जनतालाई खोपको सुनिश्चितता गर्न विशेष व्यवस्था गर्ने,

५. प्रदेश सरकारको प्रवक्तामा आर्थिक मामिला तथा योजना मन्त्री श्री कृष्णध्वज खड्‌कालाई तोक्ने,

६. मुख्यमन्त्रीको प्रमुख सल्लाहकारमा अमरबहादुर डाँगीलाई नियुक्त गर्ने,

७. क्यान्सर, किड्नी परिवर्तन र मुटुको भल्व फेर्नुपर्ने बिरामीहरूलाई उपचारका लागि हाल पाइरहेको सुविधाका अतिरिक्त प्रदेश सरकारको तर्फबाट थप दुई लाखका दरले उपलब्ध गराउने ।

८. मातृमृत्युदर कम गर्न लुम्बिनी प्रदेशका स्थानीय तहको भागको आधारमा एकएक वटा पोर्टेवल अल्ट्रासाउण्ड मेसिनसहित तालिम प्राप्त नर्सको उपलब्ध गराउने

प्रकाशित मिति: बिहीबार, साउन २८, २०७८ २२:४४