हेरिदिने कोही नहुँदा छोराछोरीलाई साथैमा राख्छिन् बागलुङकी कोरोना संक्रमित महिला

हेरिदिने कोही नहुँदा छोराछोरीलाई साथैमा राख्छिन् बागलुङकी कोरोना संक्रमित महिला

A+ A A-

साना छोराछोरीसँगै गाउँमा बस्दै आएकी एक महिलाले यसअघि दुई चरणमा गाउँमा समेत फैलिएको कोरोना संक्रमणबाट आफू र बालबच्चालाई जोगाइन् ।

उनका पति रोजगारीको क्रममा विदेशिएको दुई वर्ष भयो । पति साउदी अरेबियामा छन् । पति विदेशिएपछि कोरोना संक्रमण सुरु भयो । दुई चरणमा फैलिएको संक्रमणमा आफूलाई बचाएकी ती महिलालाई अहिले कोरोना संक्रमण पुष्टि भएको छ ।

बागलुङ नगरपालिका–१२, अमलाचौरकी ती महिलाले बालबच्चालाई महामारीबाट जोगाए पनि आँफै संक्रमित भएपछि भने हेरिदिने कोही भएनन् । उपाय केही नभएपछि उनले सङ्क्रमण नभएका छोराछोरीलाई पनि साथैमा राखेकी छन् ।

होम आइसोलेसनमा बसेकी ती महिला आफैँ खाना पकाएर छोराछोरीलाई खुवाउँछिन् । ‘पाँच वर्षको छोरो अरुसँग बस्नै मानेन, आठ वर्षकी छोरी पनि मसँगै छ,’ उनी भन्छिन्, 'सङ्क्रमण पुष्टि भएपछि गाउँलेले पनि सहयोग गरेनन् । घरमा अरु कोही नभएकाले बालबालिकालाई बाध्यतावस आफैँसँग राख्नुपर्‍यो ।'

उनलाई एक साताअघि सङ्क्रमण पुष्टि भएको हो । त्यसयता उनीसँगै बस्दै आएको छोराछोरीको भने परीक्षण गराइएको छैन ।

ती महिलाका छोराछोरीलाई कोरोनाको परीक्षणका लागि बोलाइएको भए पनि अहिलेसम्म उनीहरू आउन नसकेको अमलाचौर स्वास्थ्यचौकी प्रमुख कृष्णप्रसाद शर्माले बताए ।

जैमिनी नगरपालिका- १ की अर्की महिलामा पनि परिवारका अन्य सदस्यसहित कोरोना संक्रमण पुष्टि भएको छ । नगरपालिकाले बनाएको अस्थायी कोभिड अस्पतालमा बस्दै आएकी उनी, उनका वृद्ध सासू, चार वर्षकी छोरी र ११ वर्षका छोरा पनि सङ्क्रमित भएका छन् । तर, श्रीमान्‌को भने कोरोना परीक्षणको रिपोर्ट निगेटिभ आएको छ ।

पाँच जनाको परिवारमा चार जना सङ्क्रमित छन् । ती महिला र उनकी सासूलाई स्वास्थ्यसम्बन्धी अन्य समस्या पनि छ । आफूहरूको स्वास्थ्यमा समस्या भएका कारण केही होला की भनेर आफूसहित छोराछोरीलाई पनि आइसोलेशनमा राख्नु परेको उनको भनाइ छ ।

छोराछोरीमा कडा खालको लक्षण त छैन तर घरमा कोही नभएका कारण सबैजना अस्थायी कोभिड अस्पतालमा बसिरहेका छन् । ‘आमा वा हजुरआमासँग जस्तो परिवारका अरु सदस्यसँग कहाँ बस्न मान्छन् र छोराछोरी,’ उनले भनिन्, ‘सँगै बसेका छौँ, खाना अस्पतालले दिन्छ, अरु सुसार आफैँले गर्दै आएकी छु ।’

कोरोना महामारीको पहिलो लहरभन्दा दोस्रो लहरमा महिला र बालबालिकालाई धेरै असर पारेको छ । आमा सङ्क्रमित हुँदा बालबालिकालाई आइसोलेशनको समय समय कटाउन निकै कठिन हुने गरेको छ । आमा सङ्क्रमित हुँदा बालबालिका पनि सङ्क्रमित हुने खतरा बढिरहेको स्वास्थ्य कार्यालयका कोभिड स्रोत व्यक्ति देवप्रकाश घिमिरेले बताउँछन् ।

‘महामारी कठिन समय हो, यो बेलामा सबैमा मानसिक असर पनि परेको हुन्छ,’ धौलागिरि अस्पतालका मानसिक रोग विषेशज्ञ डा. धीरेन्द्र पौडेल भन्छन्, 'बालबालिकाका लागि न अस्पतालका आइसोलेशनमा छुट्टै व्यवस्था गर्न सकिएको छ नत होम आइसोलेशनमा नै । त्यसैले बिरामीमा शारीरिकभन्दा पनि मानसिक समस्या बढी देखिन्छ ।'

प्रकाशित मिति: सोमबार, साउन २५, २०७८ १३:३५