ध्वंसमा गति, निर्माणमा सुस्त : रोल्पामा १० वर्षमा २३ प्रहरी चौकी ध्वस्त, १४ वर्षमा चारवटा बने

ध्वंसमा गति, निर्माणमा सुस्त : रोल्पामा १० वर्षमा २३ प्रहरी चौकी ध्वस्त, १४ वर्षमा चारवटा बने

A+ A A-

१० वर्षमा २३ प्रहरी चौकी ध्वस्त भएको रोल्पामा निर्माणले भने गति लिन सकेको छैन । शान्ति प्रक्रियाको १४ वर्षमा चारवटा प्रहरी चौकी मात्रै निर्माण सम्पन्न भएका छन् ।

दशवर्षे सशस्त्र द्वन्द्वमा ३९ स्थानमा विस्तार गरिएका प्रहरी चौकीमध्ये २३ प्रहरी चौकी तत्कालीन विद्रोही माओवादीले ध्वस्त पारेका थिए । ध्वस्त पारिएका प्रहरी चौकीमध्ये हालसम्म होलेरी, सुलिचौर, पोवाङ र घर्तीगाउँमा मात्रै निर्माण सम्पन्न गरिएको छ ।

यसैगरी, जुगार र थवाङको प्रहरी चौकी निर्माणको अन्तिम चरणमा रहेको देखिएको छ । पछिल्लोपटक रोल्पा र प्यूठानको सिमाना खुङ्ग्रीमा समेत अत्याधुनिक प्रहरी चौकी बन्ने गरी शिलान्यास गरिएको छ ।

निर्माण सम्पन्न, निर्माणाधीन र शिलान्याससमेत गरी जिल्ला प्रहरी कार्यालय मातहतका नयाँ सातवटा संरचना बन्न लागेको रोल्पाका प्रहरी नायब उपरीक्षक नरेशराज सुवेदीले जानकारी दिए । 'जिल्लाका अन्य प्रहरी चौकी पनि क्रमशः पुनःनिर्माण हुँदै जानेछन्,' सुवेदीले भने ।

द्वन्द्वमा रातारात ध्वस्त पारिएका ती चौकीको निर्माणले भने गति लिन सकेका छैनन् । प्रहरी चौकी निर्माणमा सरकारले विभिन्न दातृ निकाय गुहार्ने गरेको देखिएको छ । जिल्लाको थवाङ र जुगारका प्रहरी चौकी बेलायती सहयोग नियोग (डीएफआईडी) को सहयोगमा निर्माण गरिएका हुन् ।

गाउँगाउँमा विस्तार भएका प्रहरी चौकी २०५६ मा जिल्ला सदरमुकाम खुम्चिएका थिए । इलाका प्रहरी कार्यालय घर्तीगाउँमा आक्रमण हुँदा प्रहरी निरीक्षकसहित २१ प्रहरीको मृत्यु भएको थियो । त्यसपछि प्रहरी चौकी छाडेर जिल्ला सदरमुकाम आएसँगै गाउँमा खाली अवस्थामा रहेका प्रहरी चौकी माओवादी विद्रोहीले आक्रमण गरी ध्वस्त बनाएका थिए । ती ध्वस्त संरचना निर्माणमा अहिले राज्यले करोडौँ खर्च गरिरहेको छ ।

शान्ति प्रक्रियापछि शान्ति सुरक्षाका लागि साविककै ठाउँमा फर्कनुपर्दा प्रहरीले सुरक्षित प्रहरी चौकीको सामना गरिरहेको बेला अत्याधुनिक प्रहरी चौकी बन्न लागेका हुन् । ध्वस्तमध्ये केही प्रहरी चौकी निर्माण आरम्भ भए पनि अझै ठूलो सङ्ख्याका प्रहरी चौकी भने भाडामा सञ्चालित छन् ।

जिल्लाका ती प्रहरी चौकीको भाडास्वरुप सरकारले वार्षिक १७ लाख व्ययभार व्यहोर्दै आएको जिल्ला प्रहरी कार्यालय रोल्पाले जनाएको छ ।

प्रकाशित मिति: आइतबार, साउन २४, २०७८ १०:१७