स्वास्थ्य संस्थाको गुणस्तर बढाउन राष्ट्रियसभा सदस्य भट्टको माग

A+ A A-

राष्ट्रियसभा सदस्य तारादेवी भट्टले सरकारले स्वास्थ्य संस्थाहरूको गुणस्तर बढाउनुपर्ने बताएकी छन् ।

शुक्रबारको राष्ट्रियसभा बैठकमा बोल्दै राष्ट्रियसभा सदस्य भट्टले सरकारले कोभिड–१९ को नियन्त्रणका लागि आफ्नो सम्पूर्ण संरचनाहरूको प्रयोग गर्नुपर्ने बताएकी हुन् । उनले स्वास्थ्य संरचना कमजोर रहेको उल्लेख गर्दै ती संरचनाको सुदृढीकरण र क्षमता अभिवृद्धि गर्न सरकारी स्वास्थ्य संस्थाहरूको गुणस्तर बढाउनुपर्ने बताइन् ।

उनले भनिन्, ‘स्वास्थ्य तथा जनसंख्या मन्त्रालयसँग अहिले दुईवटा ठुला चुनौती छन् । एक, कोभिडको नियन्त्रणमा आफ्नो सम्पूर्ण संरचनाहरूको भरमग्दुर पूर्ण रूपले प्रयोग र परिचालन गर्ने । दोस्रो, आफ्ना तिनै कमजोर संरचनाहरूलाई सुदृढीकरण गर्ने र क्षमता अभिवृद्धि गर्ने र सरकारी स्वास्थ्य संस्थाहरूको गुणस्तर बढाइ जनताको विश्वसनीयता बढाउने । जसले गर्दा नेपालीहरूको आउट अफ पकेट खर्च घटोस् । यसो हुन सके स्वास्थ्य सही बाटोमा हिँडेको मान्न सकिन्छ । अहिले कुल बजेटको सात प्रतिशतभन्दा माथि बजेट छ तर यसको कार्यान्वयनमा ठुलो चुनौती छ ।’

उनीले नेपाली जनताले विकासको व्यग्र चाहना राखेको उल्लेख गर्दै सरकारलाई विकासको काम गर्न ध्यानाकर्षण गराइन् । सरकारले सुशासनको प्रवर्द्धन गर्न आवश्यक रहेको उनले बताइन् । चुनावका बेलामा गरेका प्रतिवद्धता र १५औँ पञ्चवर्षीय योजना हेरेर काम गर्न पनि उनले सरकारलाई सुझाव दिइन् ।

उनले भनिन्, ‘अहिले नेपाली जनतामा विकासको व्यग्र चाहाना छ । हामीसँग स्रोत साधनको कमी छ । र भएको स्रोत साधनलाई पारदर्शी ढंगले कार्यान्वयन गर्न सकिए विश्वास सिर्जना हुन्छ । यसको लागि सुशासनको प्रवर्द्धन गर्नु नितान्त आवश्यक देखिन्छ । र सुशासनको प्रवर्द्धनबिना हामी दिगो विकासको परिकल्पना गर्न सक्दैनौँ । हामीले चुनावमा हाम्रा घोषणापत्र बनाएको एक पटक हेरौँ । हाम्रो १५औँ पञ्चवर्षीय योजनाको कसरी कार्यान्वयन हुने हो, त्यसमा के के सुधारको आवश्यकता छ, त्यतातिर ध्यान जानु जरुरी छ ।’

राष्ट्रियसभा सदस्य भट्टले राष्ट्रिय गौरवका आयोजनामा काम गर्ने श्रमिकहरूलाई कोभिड १९ विरुद्धको खोपको व्यवस्था गर्न पनि सरकारसमक्ष माग गरिन् । बालकालिकाले इन्टरनेटको अधिकतम प्रयोग गर्दा उनीहरूलाई मनोवैज्ञानिक असर परेको भन्दै उनले पब्जि, फ्रिफायरलगायतका एप्लिकेशनहरू बन्द गर्न सरकारलाई अनुरोध पनि गरिन् ।

प्रकाशित मिति: शुक्रबार, साउन २२, २०७८ १५:४२