खुल्यो पत्रकार महासंघ कास्कीको ताला, सुवेदीलाई साइबर अपराधको मुद्दा चलाइने

खुल्यो पत्रकार महासंघ कास्कीको ताला, सुवेदीलाई साइबर अपराधको मुद्दा चलाइने

A+ A A-

नेपाल पत्रकार महासंघ कास्कीमा लगाइएको ताला खोलिएको छ । समाचार लेखेकै कारण पत्रकारलाई धम्की आउँदा पनि महासंघ नेतृत्व पीडकको संरक्षणमा लागेको भन्दै शनिबार लगाइएको ताला आइतबार दिउँसो खोलिएको हो ।

एमाले निकट पत्रकारहरूको संगठन प्रेस चौतारी नेपाल कास्कीले शनिबार महासंघमा ताला लगाएको थियो । महासंघले आगामी दिनमा यस्ता घटनामा अभिभावक बनेर पहलकदमी गर्ने बताएपछि ताला खोल्न सहमति जुटेको संगठनका संयोजक अर्जुन गिरीले बताए ।

गत ६ साउनमा पोखराका चल्तीका दुई अनलाइन गण्डकन्यूज र पोखरा न्यूजले पोखरा-११ काहुँको एक विद्यालयले सरकारी अनुदानको पुस्तक फर्जी बिल लिएर बेचिरहेको समाचार प्रकाशन गरेका थिए । गण्डक न्यूजका रञ्जन अधिकारी र पोखरा न्यूजका गणेश बरालको बाइलाइनमा उक्त समाचार छापिएको थियो ।

समाचारमा असन्तुष्टि जनाउँदै विद्यालयकी प्रअ निर्मला मानन्धरका श्रीमान् बताउने श्रीकृष्ण श्रेष्ठले गण्डक न्यूजका अधिकारीलाई धम्कीपूर्ण फोन, म्यासेज गरेका थिए ।

आफूलाई धम्की आएको मौखिक जानकारी गराउँदा पनि पत्रकार महासंघले पीडकलाई कानुनी कारबाहीका लागि पहल गरेन । उल्टै महासंघ अध्यक्ष बिमला भण्डारी धम्कीपूर्ण म्यासेज पठाउने श्रेष्ठलाई लिएर जिल्ला प्रहरी कार्यालय पुगेकी थिइन् । यसमा पत्रकार अधिकारी असन्तुष्ट थिए ।

पीडकलाई नै लिएर पत्रकार महासंघ अध्यक्ष आउने, पीडकले आफू मुख्यमन्त्रीको मान्छे भएको बताएपछि प्रहरीले पनि खासै चासो दिएको थिएन । त्यसपछि प्रेस चौतारी प्रतिवादमा उत्रिएको हो ।

चौतारी आक्रमक प्रस्तुत भएपछि कास्की प्रहरीले धम्की दिने श्रेष्ठलाई शनिबार नियन्त्रणमा लिएको थियो । धम्की दिने श्रेष्ठ एकदिन प्रहरी हिरासतमा बसेर आइतबार छुटेका छन् । दुई अनलाइनको नाम नै लिएर समाचारको खण्डन गर्न उत्रिएका आफूलाई पत्रकार बताउने सफल सुवेदीलाई भने साइबर क्राइममा प्रक्रिया अगाडि बढाइने भएको छ । दर्ता नै नभएको अनलाइनको नामको पेजबाट सुवेदीले ३१ मिनेटको भिडियो सार्वजनिक गरेका थिए । पछि आफूलाई कानुनी प्रक्रियामा तान्न खोजेको बुझेपछि उनले भिडियो हटाए ।

खण्डन गर्न प्रयोग भएको अनलाइन दर्ता नभएको जानकारी प्रेस काउन्सिलबाट आएको र भिडियोमा नाम तोकेर मानहानी गरेकाले सुवेदीलाई कानुनी दायरामा ल्याइने पत्रकार बरालले बताए । `म भोलि बिहान १० बजेपछि यसमा प्रक्रियामा जान्छु,´ उनले भने ।

प्रकाशित मिति: आइतबार, साउन १७, २०७८ २१:११