कर्णालीमा राउटेलक्षित नीति बन्दै : सांस्कृतिक संरक्षणसहित सामाजिकीकरण गरिने

कर्णालीमा राउटेलक्षित नीति बन्दै : सांस्कृतिक संरक्षणसहित सामाजिकीकरण गरिने

A+ A A-

कर्णाली प्रदेशस्थित सामाजिक विकास मन्त्रालयले राउटे समुदायको सांस्कृतिक परम्परालाई जगेर्ना गर्दै उनीहरूको सामाजिकीकरणका लागि नीति बनाउने भएको छ ।

जङ्गलमा फिरन्ते जीवन बिताइरहेका लोपोन्मुख राउटे समुदायलक्षित एकीकृत नीति ल्याइन लागेको सामाजिक विकासमन्त्री यज्ञबहादुर बुढा क्षेत्रीले बताए ।

आज बिहान भर्चुअल रूपमा भएको लोपुन्मुख तथा जनजातिसम्बन्धी कार्यशाला गोष्ठिमा मन्त्री बुढा क्षेत्रीले मन्त्रालयले राउटे सम्बन्धी नीति बनाइरहेको जानकारी दिएका हुन् ।

‘एकै ठाउँमा नबस्ने, घुमन्ते समुदाय भएकाले राउटेको संरक्षणका लागि छुट्टै नीति आवश्यक देखियो,’ मन्त्री बुढा क्षेत्रीले भने, ‘साउनदेखि नीतिअनुसार काम हुन्छ ।’

समुदायको संस्कार र संस्कृतिमाथि बाह्य समुदायको हस्तक्षेप बढेकाले राउटे बस्ती प्रवेशमा निषेध, राहतमा एकद्वार प्रणाली, सुरक्षाको प्रबन्ध, खाना, नाना र छानाको व्यवस्थापनलगायतका विषय नीतिमा समेटिने उनको भनाइ छ ।

‘राउटेका आफ्नै मूल्य, मान्यता र संस्कृतिको संरक्षण गर्दै उनीहरूको सामाजिकीकरणमा मन्त्रालयले काम गर्नेछ,’ उनले भने, ‘पछिल्लो समय राउटे समुदायका दुई युवतीमाथि बाह्य समुदायका व्यक्तिहरूबाट भएको घटनाले बस्तीको सुरक्षा र बाह्य व्यक्तिहरूको प्रवेश निषेध आवश्यक रहेको छ ।’

मन्त्री बुढा क्षेत्रीले राउटेको संख्या घट्दै गएकोप्रति चिन्ता व्यक्त गरे । उनले बालबालिकामा रहेको कूपोषण न्यूनिकरण गर्न र उनीहरूको खानपानमा ध्यान दिन सरोकारवाला निकायहरूलाई निर्देशन दिए ।

लोपोन्मुख राउटे समुदाय कर्णालीको पहिचान भएकाले उनीहरूको संरक्षण आवश्यक रहेको सामाजिक विकास मन्त्रालयका सचिव कृष्णप्रसाद काप्रीले बताए ।

‘नेपालको एकमात्रै फिरन्ते समुदायको संरक्षण राज्यको दायीत्व हो,’ उनले भने, ‘परम्परागत संस्कृति, संस्कार र मान्यतालाई आत्मसाथ गर्दै राउटेसम्बन्धी नीति तयार गरिरहेका छौँ ।’

राउटे समुदायका युवतीमाथि भएको घटनापछि बस्ती सि गरिएकाले धेरै विकृतिहरूको अन्त्य भएको प्रमुख जिल्ला अधिकारी छवी रिजालले बताए ।

‘प्रशासनले अहिले बस्ती प्रवेशमा रोक लगाएको छ, राहत वितरणलाई एकद्वारा प्रणाली लागू गरिएको छ,’ उनले भने ।

यो पनि :

युट्युबर, टिकटकर र 'सेल्फी समाजसेवी'बाट जोखिममा राउटे सभ्यता

न्यायका नाममा राउटे युवतीलाई झन् नङ्ग्याउँदै युट्युबर, मुखिया भन्छन्– हाम्रा जनतालाई बिगारे

युट्युबरले गरेको यौनहिंसा र राउटेका कुरा

राउटे युवतीमाथि दुर्व्यवहार प्रकरण : मदिरा खुवाएर जबर्जस्ती गरेको अभियुक्तको स्वीकारोक्ति

राउटे युवतीमाथि दुर्व्यवहार गरी सामाजिक सञ्जालमा भिडियो अपलोड गर्ने तीन जना पक्राउ

प्रकाशित मिति: सोमबार, असार ७, २०७८ १३:४८