राउटे युवतीमाथि दुर्व्यवहार प्रकरण : मदिरा खुवाएर जबर्जस्ती गरेको अभियुक्तको स्वीकारोक्ति

राउटे युवतीमाथि दुर्व्यवहार प्रकरण : मदिरा खुवाएर जबर्जस्ती गरेको अभियुक्तको स्वीकारोक्ति

A+ A A-

लाेपाेन्मुख राउटे समुदायका दुई युवतीमाथि याैन दुर्व्यवहार गरियाे, भिडियाे खिचेर भाइरल बनाइयाे । सामाजिक सञ्जालमा उनीहरूकाे तस्वीर र भिडियाे फैलाइएपछि पीडित युवतीहरू नै समुदायभित्र सामाजिक बहिष्कारमा पर्ने जाेखिम बढेकाे छ ।

सिधासादा राउटे युवतीलाई मदिरा खुवाउने प्रलाेभनमा पारी होटलमा लगेर मदिरा खुवाई अभियुक्त युवाहरूले बलात्कार गरी भिडियाे खिचेकाे प्रहरीकाे अनुसन्धानबाट खुलेकाे छ । अभियुक्तले मदिरामा लठ्याएर जबर्जस्ती गरेकाे स्वीकारेका छन् ।

सुर्खेतको लेकबेँसी नगरपालिकाको कल्याणमा बस्दै आएका राउटे समुदाय केही दिनअघि घुम्दै सुर्खेतको गुर्भाकोट नगरपालिका–११, आँपसोती जनैघाटस्थित भेरी नदी किनारामा बस्न पुगेका थिए ।

जनैघाटनजिक अरु समुदायको पनि बस्ती छ । त्यही समुदायका तीन जना युवाले २१ जेठमा राउटे समुदायका दुई जना युवतीलाई होटलमा लगेर यौन शोषण गरे ।

उनीहरूले राउटे समुदायका युवतीलाई मादक पदार्थ सेवन गराएर यौन हिंसा गरेका थिए । यति मात्र नभई, उनीहरूले त्यसको भिडियोसमेत बनाएर सामाजिक सञ्जालमा फैलाइदिए ।

यसरी दुर्व्यवहार गर्ने तीन जना युवालाई सुर्खेत प्रहरीले पक्राउ गरेकाे छ । पक्राउ पर्नेमा गुर्भाकोट नगरपालिकाका ३५ वर्षीय दोमनबहादुर घर्ती, सोही ठाउँका २४ वर्षीय भूपेन्द्र बुढा र २९ वर्षीय होटल सञ्चालक विनोद पुन छन् ।

राउटे समुदायका युवतीमाथि यौन हिंसा गरेको भिडियो सार्वजनिक भएपछि त्यसको चौतर्फी विरोध भइरहेको छ ।

अभियुक्तविरुद्ध प्रहरीले जबर्जस्ती करणी गरेको अभियोगमा मुद्दा चलाएको कर्णाली प्रदेश प्रहरी प्रमुख डीआईजी वसन्त पन्तले बताए । ‘पक्राउ परेका अभियुक्तमाथि प्रहरीले बलात्कार अभियोगमा मुद्दा चलाएको छ । उनीहरूलाई कानुनअनुसार कारबाही हुन्छ’, डीआईजी पन्तले भने ।

राउटे समुदायका ती युवतीलाई युवाहरूले मादक पदार्थ सेवन गराउने भनेर फकाएर ल्याएको र खाएपछि होटलमा राखेर जबर्जस्ती करणी गरेको खुलेको उनले बताए ।

राउटे समुदायमा पुग्ने बाहिरी व्यक्तिसँग घुलमिल हुने स्वभावकाे फाइदा उठाएर ती युवाले याैन हिंसा गरेकाे प्रहरीकाे अनुसन्धानबाट खुलेकाे छ ।

राउटे बस्ती प्रवेशमा रोक

जिल्ला प्रशासन कार्यालय सुर्खेतले राउटे समुदायको बस्तीमा अन्य व्यक्तिलाई जान रोक लगाएको छ । राउटे बस्तीको सुरक्षा तथा उक्त यौन दुर्व्यवहार भएको भिडियोबारे थाहा नहाेस् भनेर प्रवेशमा रोक लगाइएको हो ।

राउटे युवतीमाथि भएको यौन दुर्व्यवहारको घटना समुदायले थाहा पाए उनीहरू समुदायभित्रै असुरक्षित हुने आशंकामा राेक लगाइएकाे डीआईजी पन्तले बताए ।

‘हामी राउटे समुदायका युवतीलाई बलात्कार गर्ने युवाहरूलाई कानुनअनुसार कारबाही त गर्छौं नै तर त्यो घटना राउटे समुदायले पनि थाहा पाए उनीहरू सामाजिक बहिष्कारमा पर्न सक्छन् । उनीहरूको कानुन मुखियाले जे गर् भन्यो त्यही गर्ने हो,' उनले भने ।

पीडित झन् पीडित हुने स्थिति नआओस् भनेर सावधानी अपनाइएको प्रहरीको दाबी छ । दुर्व्यवहारमा परेका दुवै युवती अविवाहित हुन् । युवतीहरू राउटे बस्तीमा फर्किसकेका छन् । बस्तीकाे सुरक्षाका लागि अहिले प्रहरी टाेली खटाइएकाे छ ।

राउटे समुदायमा आफ्नो समुदायभित्र मात्र विवाह गर्ने चलन छ । उनीहरू आफ्नो समुदायको कुनै एउटा व्यक्तिको मृत्यु भयो भने बस्दै आएको बस्ती नै छोडेर अन्तै सर्ने गर्छन् ।

प्रकाशित मिति: मंगलबार, जेठ २५, २०७८ १९:०७