न्यायका नाममा राउटे युवतीलाई झन् नङ्ग्याउँदै युट्युबर, मुखिया भन्छन्– हाम्रा जनतालाई बिगारे

न्यायका नाममा राउटे युवतीलाई झन् नङ्ग्याउँदै युट्युबर, मुखिया भन्छन्– हाम्रा जनतालाई बिगारे

A+ A A-

शीर्षक : राउटे युवतीको होटलमा लगेर बलात्कार, भिडियो भाइरल
थम्बनेल : पीडित युवती र पीडकको हाइलाइटेड फोटो
ह्याजट्याग : राउटेकाण्ड, (पीडित युवतीको नाम), होटलकाण्ड, सुर्खेतकाण्ड

के छ संसार नामक युट्युब च्यानलमा ७ जूनमा अपलोड गरिएको भिडियोका कमेन्टेटरले राउटे युवतीका साथ होटलमा कहिले के–के भयो सबै बेलिविस्तार लगाएका छन् । अनि भिडियो हेरिदिएकोमा धन्यवाद दिँदै उनले दर्शकको राय पनि खोजेका छन्, ‘यो विषयमा तपाईं के भन्नुहुन्छ ?’

अर्को भिडियो,

शीर्षक : हुने भयो पापीहरूलाई क,डा स,झाय भखरै आयो कडा फैशाला (पीडित युवतीको नाम)
थम्बनेल : पीडित युवतीको हाइलाइटेड फोटो
ह्याजट्याग : पीडित युवतीको नाम, थर

अनलाइन संसार टीभी नामक युट्युब च्यालनमा राखिएको यो भिडियोमा राउटे युवतीलाई पीडित भनिएको छ, सँगै ‘भिडियोलाई बढीभन्दा बढी शेयर गरेर धेरैमाझ पुर्‍याइदिन अनुरोध पनि गरिएको छ ।’

०००

राउटे युवतीलाई होटलमा लैजाने दुई व्यक्तिलाई ब्वाँसा, अपराधी भन्दै अर्को एउटा भिडियो अपलोड भएको छ । पीडित युवतीहरूको भिडियो रि–प्ले गरीगरी देखाइएको छ । र, भिडियोको अन्तिममा कमेन्टेटरले भन्छ, ‘यो भिडियोलाई बढीभन्दा बढी शेयर गरिदिनुहोला ।’

युट्युबमा अहिले ती राउटे युवतीको नाममा सयौँ भिडियो अपलोड भइसकेका छन् ।

०००

टिकटकतिर पीडित राउटे युवतीहरूको फोटो राखेर ‘न्याय माग्ने’ काम भइरहेको छ । युट्युबर त युट्युबर भइहाले, नामै चलेका कतिपय अनलाइनले समेत ‘युवतीहरूलाई आफ्नै समुदायले मार्ने खतरा, आफ्नैबाट जोखिममा, भालाले हानेर मार्नसक्छन् भनेर अनुमानबाजी गरिरहेका छन् ।’

सुर्खेतको गुर्भा अहिले गर्माएको छ । बोटेचौर गाउँनजिकै बस्ने राउटे समुदायका बिना र सबिना (परिवर्तित नाम) माथि होटलमा यौन दुर्व्यवहार भएको घटनापछि चिन्ताका अनेक विषय सामुन्ने आएका छन्, राउटेको रहनसन, स्वतन्त्रता, रीतिरिवाजदेखि छोरीचेलीको सुरक्षासम्म । तर, युट्युबर र टिकटकरलाई चाहिँ राउटेसँग जोडिएको यो घटना उत्सवजस्तै भएको छ । त्यसैले सनसनीपूर्ण हेडलाइन चलाएर पीडित भनिएका युवतीको झनै हुर्मत लिइरहेका छन् । राउटे युवतीको न्यायका लागि भिडियो बनाएको बताउँदै ‘यो भिडियोलाई बढीभन्दा बढी शेयर गरिदिनुहोस्’ भनिरहेका छन् ।

मेहलकुनाको होटलमा लगी रक्सी पिलाएर बिना र सबिनामाथि यौन दुर्व्यवहार गरेको आरोपमा स्थानीय ३५ वर्षीय चुमान घर्ती र २४ वर्षीय भूपेन्द्र श्रेष्ठमाथि प्रहरीले अनुसन्धान गरिरहेको छ । तर, युट्युबरका कारण यो घटना अझै जेलिने र पीडित युवतीहरू थप समस्यामा पर्नसक्ने चिन्तामा प्रहरी अधिकारीहरू छन् ।

युट्युबरले ‘भाइरल’ बनाएका राउटे युवती युट्युबरकै कारण समस्यामा पर्ने चिन्ता प्रहरी अधिकारीहरूकाे छ । राउटे समुदाय दैलेखको गुँरास गाउँपालिकाबाट सुर्खेतको गुर्भाकोट–९ को बोटेचौर गाउँनजिकै बस्न थालेदेखि नै युट्युबर र टिकटिकर हुल बाँधेर बस्तीमा छिर्ने गरेका थिए ।

युट्युबर र टिकटकरले राउटे युवतीलाई भाइरल बनाएको र त्यसै कारणले उनीहरूमाथि यौन दुर्व्यवहार भएको स्थानीयवासीको बुझाइ छ । राउटे बस्तीमा कहिले राहत दिने नाममा, कहिले अन्तर्वार्ता लिने नाममा युट्युबरको घुँइचो लाग्ने गरेको स्थानीय भीम खत्री बताउँछन् । ‘युट्युब बनाउनेहरूले राउटे सुमदायलाई रक्सी पनि लेइदिन्थे र खुवाउँथे’, उनले भने, ‘खासगरी राउटे युवतीहरू टिकटकर र युट्युबरको राेजाइमा थिए ।’

स्थानीयवासीका अनुसार युट्युब र टिकटकमा भिडियो देखेरै आरोपी युवाले बिना र सबिनाको पिछा गर्न थालेका थिए । गुर्भाकोट नगरपालिकाका मेयर हस्त पुन भन्छन्, ‘युट्युबरले भए/नभएको प्रश्न गरेको भिडियो हामी देख्न सक्छौँ । जति धेरै चर्चा भयो जोखिम उति बढ्ता हुँदो रहेछ । बाहिरका मानिसको रोजाइमा बिना थिइन् । त्यसैले ती दुई केटाले बिनाको पिछा गर्न थालेका रहेछन् ।’

राहत दिने नाममा आउने बाहिरी समुदायका मानिसका कारण राउटेहरू जोखिममा परेको मेयर पुन ठान्छन् । यौन दुर्व्यवहारमा परेका युवतीलाई अनेकथरि हेडलाइनमा बनेका भिडियोले झनै पीडित बनाएको उनी बताउँछन् । 'पीडितको गोपनीयता भन्ने कुरा केही नै बाँकी राखेनन्', उनले भने, 'के राउटे समुदायमा चाहिँ गाेपनीयता भन्ने चीज केही हुँदैन र ?'

युट्युब र टिकटकमा देखेपछि..

राउटे युवतीमाथि यौन दुर्व्यवहारका मुख्य आरोपी चुमान घर्ती गाउँमा यसअघि पनि विभिन्न कारणले बद्नाम रहेको स्थानीयवासी बताउँछन् । उनी नेपाली सेनाको भगौडा हुन् । अहिले गाउँमा टोले गुण्डाका रूपमा बदनाम छन् उनी ।

राउटेहरू गुर्भाकोट–९ को बोटैचौरनजिकै बस्न थालेकाे कुरा युट्युबरले थाहा पाए । जसै उनीहरूकाे पाइला त्यहाँ पर्‍याे, राउटेका चुनाैतीपूर्ण दिन सुरु भए', मेयर पुनले भने, 'युट्युब र टिकटकमा बिनालाई देखेदेखि घर्ती दैनिकजसो त्यहाँ जाँदाे रहेछ । घटना भएको दिन राउटे युवतीहरू बोटेचौर बजारमा आएका थिए । त्यही माैकामा तिनलाई रक्सी खुवाएर हाेटलमा लगी यौन दुर्व्यवहार गरेछ ।’

गुर्भाकोट– ४ का वडा अध्यक्ष प्रशन्नकुमार शाह कसैको भाइरल हुने चाहनाले राउटे समुदायमाथि ठूलो अन्याय भइरहेको बताउँछन् । ‘राउटेहरू आत्मनिर्भर छन् । उनीहरूसँग जेजति छ, त्यसैमा सन्तोष मानेर बस्छन् । तर, केही महिनायता राहतका नाममा फोटो खिचाउने, भिडियो खिच्ने, युट्युब र टिकटकमा राख्न थालियो । त्यो देखेर बिनाकाममा पनि मानिसहरू आउन थाले । आज के भयो, तपाईंहामीसामु नै छ’, उनले भने ।

राउटेलाई मदिरा बेच्न निषेध

राउटे बस्ती रहेको गुर्भाकोट नगरपालिका–९ का बोटेचौर, पोखरीलगायत बस्तीमा राउटेलाई मदिरा बेच्नेहरूमाथि कडा कारबाही गरिने मेयर पुनले बताए । उनका अनुसार राउटे बस्तीमा अरु जान नपाऊन् भनेर सुरक्षा व्यवस्था कडा पारिएको छ ।

हामी बिग्रियौँ

राउटे समुदायका अगुवाहरू बाहिरी समाजले आफूहरूलाई बिगारेको ठान्छन् । राउटे मुखिया मैनबहादुर शाही बाहिरी मान्छेले सित्तैमा केही ल्याइदिने आशामा आफ्नो समुदायको रिवाज र मान्यतामा ठूलै आँच आएको बताउँछन् । ‘पहिला भाँडाकुडा बेचेर जीवन चलाउँथ्यौँ । पछिपछि बाहिरका मान्छे आउन थाले । दयामाया गरेर केही चिज दिन थाले । यसैले मेरो जनता बिग्रियो’, उनले भने, ‘हाम्रा केटाकेटी अहिले जाँडरक्सी खान थालेका छन् । सबैले त्यही कुराको सिको गरेर अहिले जनतामा समस्या आएको छ ।’ पछिल्लो घटनाबारे राउटे अगुवाहरूलाई केही थाहा छैन ।

राउटे समुदायको चालचलनमा बाहिरी समुदायको हस्तक्षेप बढेकाे मुखिया शाहीको भनाइ छ । ‘पहिला हाम्रा जनता राम्रा थिए । सबैले मुखियाले भनेको मान्थे । अहिले त आफै हिँड्ने गरेका छन् । हामीले भनेको सबै कुरा मान्दैनन्’, उनले भने, ‘यस्तो हुँदै गयो भने नातीका दिनसम्म त हाम्रो केही पनि बाँकी रहँदैन ।’

राउटेका अर्का मुखिया सूर्यबहादुर शाही भन्छन्, ‘पहिला हाम्रो जनता निकै अनुशासित थिए । ...अरुको संगतमा लागेपछि अहिले मदिराको लत बस्यो । ‘रक्सी (लिची) खान अरुले सिकायो । अहिले समुदायमा सबैले रक्सी खान्छन् ।’

त्रासमा छन् राउटे

आफ्नै समुदायका दुई युवतीमाथि भएको घटनाबारे राउटेहरू अनभिज्ञ छन् । घटनापछि गाउँमा प्रहरीहरू खटिएका छन् । यो देखेर उनीहरू तर्सिएका छन् । किन, के भएर गाउँमा पुलिस पस्यो, उनीहरूका मनमा जिज्ञासा पनि छ । तर, जवाफ पाएका छैनन् । ‘आजकाल पुलिसले कतै जान दिँदैन । लट्ठी लिएर हामी बस्ने घर छेउछाउमा बस्छ’, राउटे मुखिया सूर्यबहादुर शाहीले भने, ‘के कारणले यिनीहरूले यस्तो गरेका हुन्, थाहा छैन ।’

मेयर पुन प्रश्न गर्छन्, 'राउटेले युट्युब हेर्थे भने उनीहरूको समुदायमा ती दुई युवतीको अवस्था के हुन्थ्यो होला ?'

वडा अध्यक्ष शन्नकुमार शाह भ्युज तान्ने होडमा राउटे युवतीको नाम र फोटोसहित सनसनीपूर्ण भिडियो बनाउनुलाई अपराध नै मान्छन् । 'सबै युट्युब नराम्रा छैनन् । तर, त्यस्ता युट्युबलाई म राम्राे मान्न सक्दिनँ, जसले भ्युजका लागि बिनालाई न्यायकाे नाममा झन् नङ्ग्याइरहेका छन् ।'

प्रकाशित मिति: बुधबार, जेठ २६, २०७८ १९:३५