प्रदेश १ : संसदको हिउँदे अधिवेशन अन्त्य गर्ने तयारीमा प्रदेश सरकार

A+ A A-

प्रदेश १ सरकारले हिउँदे अधिवेशन अन्त्य गर्ने तयारी गरेको छ । बजेट अधिवेशनको तयारीका लागि भन्दै चालु हिउँदे अधिवेशन अन्त्य गर्न लागिएको स्रोतले बतायो ।

मुख्यमन्त्री शेरधन राईनिकट स्रोतका अनुसार आइतबार बस्ने प्रदेशसभाको बैठकपछि अधिवेशन अन्त्यको तयारी गरिएको छ ।

प्रमुख प्रतिपक्षी नेपाली कांग्रेससहितका विपक्षी दलहरूले प्रदेशसभा अवरुद्ध गर्दै आएका छन् । विपक्षी दलहरूले लगातार तीन बैठक अवरुद्ध गरेको र आइतबारको बैठक पनि अवरुद्ध गर्ने रणनीति बनाएपछि प्रदेश सरकारले हिउँदे अधिवेशन अन्त्यको तयारी गरेको हो ।

प्रदेशका उद्योग पर्यटन वन तथा वातावरण राज्यमन्त्री राजकुमार ओझाले वर्षे अधिवेशनको तयारी गर्नुपर्ने भएकाले हिउँदे अधिवेशन अन्त्य हुन लागेको शिलापत्रलाई बताए । ‘बजेट अधिवेशनको तयारी गर्नुपर्छ । १ असारदेखि बजेट ल्याउनुपर्ने हुन्छ,’ उनले भने, ‘कानुनी रूपमा पनि तयारी गर्नुपर्ने तथा कानुनतः त्यही प्रावधान भएकाले अन्त्य हुनु स्वाभाविक कुरा हो ।’

प्रमुख प्रतिपक्षी दल नेपाली कांग्रेस, माओवादी केन्द्र, जनता समाजवादी पार्टीलगायतका दलले बजेटमा स्वीकृत कार्यक्रमहरू सञ्चालन गर्न, योजनाहरूका लागि आवश्यक स्रोत सुनिश्चितता गराउन र गौरवका आयोजनालाई निरन्तरता दिन माग गर्दै आए पनि सुनुवाइ नभएको भन्दै प्रदेशसभा बैठक अवरुद्ध पार्दै आएका छन् ।

उनीहरूले बजेटमा व्यवस्था भएअनुसार प्रदेश निर्वाचन क्षेत्र पूर्वाधार विकास कार्यक्रम कार्यान्वयनमा सरकार उदासिन भएको आरोप लगाएका छन् । अलपत्र रहेका बहुवर्षे विकास आयोजनाहरूलाई निरन्तरता दिन पनि विपक्षी दलको माग छ । सरकारले आफ्ना मागहरू सम्बोधन नगर्ने भएपछि संसद अवरुद्ध गर्नुपरेको विपक्षी दलका नेताहरूले बताएका छन् ।

आइतबारको प्रदेशसभा बैठक दिउँसो १ बजेका लागि डाकिएको छ ।

प्रकाशित मिति: आइतबार, वैशाख ५, २०७८ ०९:५२