भित्तामा झुन्डिने 'हाम्रो पात्रो' कसरी पुग्याे माेबाइल-माेबाइलमा ?

A+ A A-

१० वर्ष अगाडिसम्म हामीलाई आज कुन बार, कति गते भनेर जान्न घरकाे भित्तामा झुन्डेकाे पात्रो हेर्नुपर्थ्याे । हजुरबुबा वा हजुरआमासँग पात्राे हेर्न लगाउन पर्थ्याे । अंग्रेजी मितिमा परिवर्तन गर्न त औँला गन्दाकै हैरानी ।

गोजीमा पात्रो बोकेर हिँड्नुपर्नेदेखि भित्तामा झुण्ड्याएको पात्रो हेर्न घर नै पुग्नुपर्ने अवस्थालाई परिवर्तन गरे शंकर उप्रेतीले । १० वर्षअगाडि गोजीमा पात्रो बोकेर हिँड्ने उप्रेती अहिले गोजीमै बिजनेस बोकेर हिँड्ने गर्छन् ।

स–साना चाडपर्व, हजुरआमादेखि छोराछोरीसम्मको जन्मदिन बिर्सेर वाक्क हुन्थे । कति पटक त छोराछोरीकाे जन्मदिन बिर्सेको ग्लानि पनि हुन्थ्यो शंकरलाई । कहिले कार्यालयमा पुगिसक्दा समेत आज कुन दिन हो भनेर थाहा नपाउँदा लज्जा महसुस पनि हुने गर्दथ्यो ।

अझ विदेशमा रहँदा त नेपालमा आज कुन चाड होला, के भइरहेको होला भन्ने चिन्ताले सधैँ सताइरहन्थ्यो उनलाई । सात समुन्द्रपारि भएर नेपालका गतिविधिबारे जान्न नपाएको असन्तुष्टिले हरेक समय तनावमा रहन्थे । अन्ततः सोही असन्तुष्टिले नै जन्मायो- हाम्रो पात्रो ।

यो पनि...

अमेजन पुग्यो नेपाली प्लास्टिक ब्याग

तिथि मितिलगायत नेपाली चाडपर्वहरूबारे जानकारी दिने, भविष्यफल, ज्योतिष सेवा, समाचारदेखि मनोरञ्ज, नुनदेखि सुनसम्मको मूल्यका बारेमा जानकारी लिन, घरमा झुण्डिएको पात्रोदेखि टेलिभिजन, तरकारी बजारदेखि डिपार्टमेन्टल स्टोर र डिक्सनरीदेखि ज्योतिष सेवासम्म खोज्न दिनभरि समय खर्चनुपर्दथ्यो । यही समस्याबाट हामी मात्र नभएर पढाइको सिलसिलामा अमेरिका पुगेका उप्रेती पनि ग्रसित थिए ।

उप्रेती सात समुद्रपारि रहेर पनि नेपालमा आज कति गते हो, कुन चाड कसरी मनाइरहनुभएको होला बुबाआमाले, के भइरहेको होला भनेर फुर्सद पाउनासाथ गुगल हेर्ने गर्दथे । गुगलमा नेपाली तिथिमिति भेट्न निकै सकस हुन्थ्यो ।

सफ्टवेयर इन्जिनियर गर्दै गरेका उप्रेतीले नेपालका बारेमा जानकारी पाउन नसकेको असन्तुष्टिलाई सिर्जनामा परिणत गर्न कस्सिए । ख्यालख्यालमै पात्रो गोजीबाट हटाउन सुरु गरेको एपले उनलाई प्रतिष्ठित युवा व्यवसायी बनायो ।

गोजीको पात्रो मोबाइलभित्र

नेपाली पात्रो गोजीमा बोक्नुपर्ने, कहिलेकाहीँ लगाएको लुगा भिज्दा पात्रो नयाँ किन्नुपर्ने अवस्थाले दिक्क लागिसकेको थियो उनलाई । आफूसँग भएको आइफोन हेर्छन् । यो आइफोन नेपाली भए ? अनि आइफोनले नेपाली भाषामा नै नेपाली मिति, नेपाली चाड, नेपाली समाचार भनिदिए ? सोच्दासोच्दै मक्ख परेका उनी आइफोनमा नेपाली एप किन नहाल्ने भनेर एप बनाउन कस्सिए ।

‘आइफोन नेपाली नभएर के भो त ? यसभित्र अटाउने नेपाली एप बनाउन त सकिन्छ नि,' करिब १० वर्ष लामो व्यावसायिक यात्रा तय गरिसकेका उप्रेती हाँस्छन् र भन्छन्, ‘त्यही १० वर्षअगाडिको असन्तुष्टिले फुरायो आइडिया अनि व्यवसायी पनि बनायो ।’

यो पनि...

किराना पसलमा कामगर्ने अमित कसरी बने खल्तीका संचालक ?

उप्रेती भन्छन्, ‘सुरुमा नेपाली मिति हेर्नका लागि मैले आफ्नै लागि एउटा एप बनाएँ । एक वर्षसम्म यो एप मेरो मोबाइलमै सीमित भयो । आफैँले बनाएको एपले आफ्नै जीवन सहज बनाइरहेको महसुस गर्थें ।पछि मेरा केही साथीहरूलाई एप चलाउन आग्रह गरेँ । उहाँहरूबाट सकारात्मक प्रतिक्रिया मात्र पाइनँ, एपस्टोरमा रिलिज गर्ने सुझाव पनि पाएँ । यसरी सन् २००९ मा 'हाम्रो पात्रो' एप स्टोरमा रिलिज गरेँ ।’

रिलिज गर्ने समयसम्म उप्रेतीले आफ्नै लागि भए पनि एपमा डेट कन्भर्टर टुलदेखि विदेशी मुद्राकाे विनिमय दरको फिचर राखिसकेका थिए । पहिलो पटक आइफोनको एप स्टोरमा मात्रै सीमित भएको ‘हाम्रो पात्रो’लाई गुगल प्लेस्टोरमा रिलिज गरेपछि भने एकाएक यसको लोकप्रियता बढ्यो । नेपालमा मात्र नभएर नेपाली पुगेका हरेक देशमा एप पुग्यो ।

आइफोनको एप स्टोरमा ५० हजार डाउनलोड भएको हाम्रो पात्राे दुई वर्षपछि गुगल प्ले स्टोरमा उपलब्ध हुनासाथ ५० लाखको संख्यामा डाउनलोड हुन सफल भयो । १० वर्षको अवधिमा १ करोड सक्रिय प्रयोगकर्ताहरू बटुल्न हाम्रो पात्रो सफल भयो ।

सिलिकन भ्यालीमा नेपाली कार्यालय

विदेशी भूमिमा नेपालको न्यास्रो मेटाउन बनाएको एपले लोकप्रियता कमाउन थालेपछि अमेरिकाको सिलिकन भ्याली क्यालिफोर्नियामा खाइरहेको जागिर चटक्कै छोडेर अहिले हाम्रो पात्रोमै लागिपरिरहेका छन् ।

एउटा एपकै भरमा व्यवसायी बन्न सकिन्छ भन्ने उदाहरण बनेका उप्रेतीलाई पछ्याउनेहरू अहिले नेपाली मात्रै नभएर धेरैको संख्यामा विदेशीहरू पनि छन् ।

उप्रेती भन्छन्, ‘व्यवसाय गर्न ठूलो रकम, ठूलो सोच र ठूलो योजना नचाहिने रहेछ । भविष्य बनाउन अमेरिका आइपुगेको म नेपाली एप बनाएर व्यवसायी बन्न सक्छु भन्ने कहाँ सोचेको थिएँ र ? अहिले हेर्नुस् त, ख्यालख्यालमा बनाएको एपले नै मेरो पहिचान बनायो ।’

यो पनि...

एउटा किताबले बदलेको जीवन, ९ वर्षमै चार व्यवसायका मालिक

उप्रतीले बनाएको ‘हाम्रो पात्रो’ एपले विस्तारित रूप लिइसकेको छ । मिति र विदेशी विनिमयदर मात्रै समेटिएको सो एपमा १० वर्षमा नेपाली मिति, चाडबाड मात्र नभएर, ज्योतिष सेवा, कुण्डलीदेखि मूल्यसूची, समाचार प्रकाशन पनि समेटिएका छन् ।

सुनदेखि नुनसम्मको मूल्य नेपाली चाडदेखि आफ्नो भविष्य फलसम्मका एउटै एपमा उपलब्ध छन् । जसले गर्दा एप डाउनलोड गर्ने मात्रै ५० लाखको संख्यामा छन् भने सक्रिय प्रयोगकर्ता १ करोडभन्दा बढी छन् ।

हाम्रो पात्रोमा अहिलेसम्म १ सयवटा नेपाली रेडियो, २१ भन्दा धेरै अनलाइन मिडिया आवद्ध भइसकेका छन् । जसको माध्यमबाट एपमा समाचारहरू पढ्नसमेत पाइन्छ ।

४.४ रेटिङ पाएको हाम्रो पात्रोको आम्दानीको मुख्य स्रोत नै डाउनलोड भएको उप्रेती बताउँछन् । उनी भन्छन्, ‘हामीले दिने सुविधा सम्पूर्ण नि:शुल्क हुन्छ । त्यसैले डाउनलोड नै आम्दानीको प्रमुख स्रोत हो ।’ योसँगै एप प्रयोगकर्ताका आधारमा पनि कमाइ राम्रो हुने उनकाे छ ।

हाम्राे पात्रो एपलाई नै पूर्ण समय दिँदै आएका उप्रेतीले अमेरिकामा नै प्रमुख कार्यालय खोलेका छन् भने त्यसको शाखा कार्यालय नेपालमा खोलका छन् । एक्लै सुरु गरेका उप्रेतीसँग अहिले ३८ जनाभन्दा बढीको टिम छ । वार्षिक रूपमा मात्रै उनले १ करोडभन्दा बढीको आम्दानी गरिरहेका छन् ।

यो पनि...

'ट्युब लाइट' चम्किएर बनेकाे फुडमाण्डू

नेपालमा युवा उद्यमी बन्न चाहनेहरूको संख्या धेरै भए पनि नेपालमै बसेर नयाँ काम गर्नका लागि जोखिम मोल्नेहरू कमै भएको उप्रेतीको बुझाइ छ । उनी भन्छन्, ‘यदि कुनै पनि व्यवसाय गर्ने हो भने अनुशासनमा रहनुस्, सफलताको पहिलो सूत्र नै अनुशासन हो । त्यसपश्चात् परिश्रम र धैर्यलाई संयोजन गरेर कुनै पनि काम गर्नुहुन्छ भने अवश्य सफल हुनुहुन्छ ।’

नेपालमा लकडाउनले ई-कमर्सलाई थप उचाइमा पुर्‍याउन आईटी क्षेत्र सफल भएको भन्दै आगामी दिनमा आईटी क्षेत्रलाई थप विस्तारित गर्दै ई-कमर्समा लगानी गर्ने हो भने नेपाललाई पूर्णत: डिजिटलाइज गर्न सकिने उप्रेती बताउँछन् ।

'स्मार्ट पानी'ले चम्किएका शाक्य

बिरामी पर्नुभयो ? औषधि सकियो ? पख्नुस् ! आउँदै छन् सुप्रिया

सय रुपैयाँले बनेका करोडपति

विवशको भक्का, अब पालो पूजा र पुजारीको

धैर्य र लगनले सफल सुनिता

१७ घण्टे कर्मचारीदेखि हाइड्रोपावरका मालिकसम्म

प्रकाशित मिति: मंगलबार, असोज २०, २०७७ २१:१२