नेपाल साफ महिला च्याम्पियनसीपको फाइनलमा

A+ A A-

नेपाली महिला फुटबल टोली साफ महिला च्याम्पियनसीप फुटबल प्रतियोगिताको फाइनलमा प्रवेश गरेको छ । आज भएको सेमीफाइनल खेलमा श्रीलंकामाथि सहज जीत हात पार्दै नेपालले फाइलनमा स्थान पक्का गरेको हो ।

विराटनगरको शहीद रंगशालामा भएको पहिलो सेमीफाइलन खेलमा श्रीलंकामाथि ४–० को फराकिलो जित हासिल गर्दै नेपाल अन्तिम दुईमा स्थान पक्का गरेको हो । फाइलनमा प्रतिष्पर्धा गर्ने नेपालको प्रतिद्धन्दी आजै दिउसो हुने भारत र बंगलादेशबीचको खेलले निर्धारण गर्नेछ । भारत र बंगलादेशबीच हुने खेलको बिजेतासँग नेपालले उपाधीका लागि प्रतिष्पर्धा गर्नेछ ।

आजको खेलमा नेपालले श्रीलंकालाई एकोहोरो दबाबमा राखेको थियो । पहिलो हाफअघि मात्र १–० ले अगाडी रहेको नेपालले दोस्रो हाफमा थप ३ गोल गर्दै शानदार जीत निकालेको थियो । नेपालका लागि खेलको ४२ औं मिनेटमा पुनम जर्घामगरको पहिलो गोल गरेकी थिइन् ।

त्यस्तै नेपालका लागि ७३ औं मिनेटमा अनिता बस्नेत, ८२ औं मिनेटमा सावित्रा भण्डारी र ८६ औं मिनेटमा रेखा पौडेलले गोल गरिन् ।

सुरुवातदेखि नै आक्रामक खेलेको नेपालले १० औ मिनेटमै गोलको अवसर सिर्जना गरेको थियो । अनिता बस्नेतले प्रहार गरेको कर्नर बल कप्तान निरु थापाले हेड गर्दै गोल गर्ने प्रयास गरेकी थिइन् । तर पोष्टभन्दा केही माथिबाट बाहिरियो ।

१६ औं मिनेटमा सावित्रा भण्डारीको सशक्त प्रहार श्रीलंकाली गोलकिपर अयोमी विजेरथ्नले बचाइन् ।

३५ औं मिनेटमा मञ्जलीकुमारी योञ्जनले प्रहार गरेको बल पोस्ट नजिकैबाट बाहिरियो । तर गोलको खडेरी तोड्दै पुनम जर्घामगरले सावित्रा भण्डारीको हेड पासमा सुन्दर गोल गरिन् ।

दोस्रो हाफमा अझ सुधारिएको प्रदर्शन गरेको नेपालका केही प्रयासलाई श्रीलंकाली गोलरक्षक विजेरथ्नले असफल तुल्याइन् । ५३ औं मिनेटमा सावित्रा भण्डारीको प्रहार पोष्टको नजिकैबाट बाहिरियो । ६० औं मिनेटमा अनिता बस्नेतले लामो राइट फ्यांकबाट प्रहार गरेको बल श्रीलंकाली गोलकिपरले मुस्किलले बचाइन् ।

७३ औं मिनेटमा नेपालले अर्को गोल थप्यो । श्रीलंकाली गोलकिपरले क्लियर गरेको बललाई रोकेर अनिताले गोल गर्न सफल भइन् ।

८२ औं मिनेटमा अनिता बस्नेतको क्रसमा सावित्रा भण्डारीले हेडमार्फत गोल गर्दै नेपालको अग्रता अझै फराकिलो बनाइन् । प्रतियोगितामा यो उनको तेस्रो गोल हो । तर उनी ८३ औं मिनेटमा वान भर्सेस् वानमा गोल गर्न चुकिन् ।

खेलको ८६ औं मिनेटमा नेपालका लागि रेखा पौडेलले गोल गर्दै ४–० गोलको अग्रता दिलाइन्, त्यसपछि खेलमा थप गोल हुन सकेन र अन्ततः नतिजा नेपालको पक्षमा गयो ।

प्रकाशित मिति: बुधबार, चैत ६, २०७५ २३:०७