नेपालगन्जको जमुनाह नाका १ साता बन्द

A+ A A-

विश्वब्यापी रूपमा फैलिएको कोरोना भाइरसको संक्रमण बढ्न नदिन नेपालगन्जस्थित जमुनाह नाका आइतबारदेखि ७ दिनसम्मका लागि शिल गरिएको छ ।

आइतबार स्थानीय स्तरमा नेपाल र भारतीय सुरक्षा निकायका प्रमुखहरूको छलफलबाट जमुनाह नाका १ साताका लागि शिल गर्ने सहमति भएको हो ।

भारतीय बोर्डरमा विभिन्न स्थानबाट नेपाल आउने नेपालीलाई आइतबार बिहान १२ बजेसम्म नेपाल प्रवेश गराइएको छ । करिब २ हजार ५ सय नेपाली नेपाल प्रवेश गरेको इलाका प्रहरी कार्यालय जमुनाहका इन्चार्ज प्रहरी नायव निरीक्षक माधव रिजालले जानकारी दिए ।

आइतबार बिहान बाँकेका प्रमुख जिल्ला अधिकारी कुमारबहादुर खड्का, बाँके प्रहरी प्रमुख प्रहरी उपरीक्षक वीरबहादुर ओली, सशस्त्र प्रहरी गुल्म ३० नं. गणका सशस्त्र प्रहरी उपरीक्षक दीपक अधिकारी र भारत बहराइचका जिल्ला अधिकारी शम्भु कुमार, बहराइचका एसपी विपिनकुमार मिश्रासहितको दुईपक्षीय छलफलका क्रममा कोरोनाविरूद्ध सचेतना र सतर्कताका लागि सीमानाका बन्द गर्ने सहमति भएको हो ।

कोरोनाको संक्रमण फैलिन नदिनका लागि सीमाक्षेत्रमा जान शुक्रबारदेखि सवारी साधनमा रोक लगाए पनि पैदलयात्रीहरूलाई भने आवागमनका लागि छुट गरिएकोमा दुवैतर्फका जिल्ला अधिकारीको अनौपचारिक बैठकले सीमानाका बन्द गर्ने निर्णय गरेको बाँकेका प्रमुख जिल्ला अधिकारी कुमारबहादुर खड्काले जानकारी दिए ।

सीमानाका बन्द गर्ने निर्णय भएसँगै अब पैदलयात्रु तथा सवारी साधन संचालन हुन पाउने छैनन् । यद्यपि अत्यावश्यक सामग्री ढुवानी तथा एम्बुलेन्सको हकमा आवश्यकताअनुसार आवागमन गर्न दिने सहमति भएको बाँकेका प्रहरी प्रमुख तथा प्रहरी उपरीक्षक बिरबहादुर ओलीले जानकारी दिए ।

नेपालगन्जमा ४० बेडको आइसोलेसन

कोरोना भाइरसको संक्रमण बढ्न नदिन नेपालगन्जमा ४० बेडको आइसोलेसन तयार पारिएको छ । लायन्स डेन्टल अस्पताल खजुरा रोडको माथिल्लो तलमा ३–३ फिटमा बेड राखेर आइसोलेसन अस्पताल तयार पारिएको हो ।

लायन्स क्लब इन्टरनेसनल डिस्ट्रिक्ट ३२५–२ का संस्थापक डिस्ट्रिक्ट गभर्नर सेम शाक्यले कोरोना भइरसको संक्रमण फैलिन नदिन आफूहरूको पहलमा लायन्स डेन्टल अस्पतालमा ४० बेडको आइसोलेसन तयार पारिएको जानकारी दिए ।

प्रकाशित मिति: आइतबार, चैत ९, २०७६ १९:४२