सुन तस्करी र हत्या प्रकरणका सुनुवाई एउटै इजलासमा

A+ A A-

न्याय परिषदले चासो देखाएपछि ३८ क्वीन्टल सुन तस्करी र सनम शाक्य हत्या प्रकरणको मुद्धा एउटै इजलासबाट सुनुवाई हुने भएको छ ।

एकै प्रकृति र एउटै घटनाको मुद्दा भएपनि फरक फरक इजलासमा पेशी तोकेको भन्दै मुख्य न्यायाधीसको आलोचना हुदै आएको थियो । फरक फरक इजलासमा पेशी तोक्ने उच्च अदालत विराटनगरका मुख्य न्यायाधीस तथा जिल्ला अदालत मोरङको आदेश उल्ट्याउने न्यायाधीसहरुलाई न्याय परिषदले काजमा सरूवा गरेपछि अव एउटै इजलासमा सुनुवाई हुने गरि पेशी तोकिएको हो ।

विहीबार भएको बहसपछि उच्च अदालत विराटनगरका न्यायाधीशद्वय शिवराज अधिकारी र हरिप्रसाद बगालेको संयुक्त इजलासले १७ नम्बर अनुसारको १२ वटा निवेदनहरुलाई एउटै इजलास र एकै साथ लगावमा राखि पेश गर्न आदेश दिएको उच्च अदालत विराटनगरका रजिष्ट्रार नारायण प्रसाद रेग्मीले जानकारी दिए ।

चर्चित सुन तस्करी र सनम शाक्य हत्या प्रकरणमा थुनामा रहेका प्रतिवादीहरुले जिल्ला अदालत मोरङको आदेश विरुद्ध ४२ वटा निवेदन दर्ता गराएकोमा ३० वटा निवेदनको सुनुवाई भईसकेको छ । यस अघि उच्च अदालत विराटनगरले पुर्पक्षका लागि थुनामा रहेका पूर्व डिआईजी गोविन्द निरौला, निलम्बित एसएसपी दिवेश लोहनी, निलम्बित एसपी विकासराज खनाल र डिएसपी प्रजित केसी लगायत व्यापारीहरुलाई साधारण तारेखमा रिहा गरिसकेको छ ।

सुन तस्करी र सनम शाक्य हत्या प्रकरणका अभियुक्तहरु उच्च अदालत विराटनगरले अस्वभाविक रुपमा रिहा गरेको भन्दै न्याय परिषदले उच्च अदालतका मुख्य न्यायाधीश डा. कुलरत्न भुर्तेल सहित ६ जना न्यायाधीशहरुको काज सरुवा गरेको छ । परिषदले डा. भुर्तेल सहित जिल्ला अदालतको आदेशपछि थुनामा रहेकाहरुले गरेको पुनरावेदन निवेदन हेरेका उच्च अदालतका न्यायाधीशहरु नागेन्द्रलाभ कर्ण, सारङ्गा सुवेदी, थीरबहादुर कार्की, उमेशकुमार सिंह र उमेशराज पौडेललाई काज सरुवा गरेको थियो ।

अहिले उच्च अदालतमा ५ जना मात्र न्यायाधीशले मात्र मुद्दाको सुनुवाई गरिरहेका छन् । पहिला पनि मुद्दा फुटाएको बिषयमा वकिलहरुले गलत भएको भन्दै बाहिरी रुपमा टिप्पणी गर्दै आएका थिए । सरकारी वकिलहरुले पनि एउटै मुद्दालाई फरक फरक इजलासमा सुनुवाई गर्न नहुने भन्दै आएका थिए ।

प्रकाशित मिति: शुक्रबार, माघ ११, २०७५ १०:२९