झलनाथ खनालकाे दाेहाेराे भूमिका : बाहिर वामपन्थी एकता, भित्र सरकार ढाल्ने खेल

झलनाथ खनालकाे दाेहाेराे भूमिका : बाहिर वामपन्थी एकता, भित्र सरकार ढाल्ने खेल

A+ A A-

एकीकृत समाजवादीका सम्मानित नेता झलनाथ खनालले प्रदेश सरकार गठनमा दोहोरो भूमिका खेलेको आरोप लागेको छ । खनालले एमाले र माओवादी केन्द्रसहितको केन्द्रीय गठबन्धनमा सहभागी भए पनि प्रदेशका सरकार गठन र विश्वासको मत दिने बेलामा प्रदेश सांसदलाई भड्काउने प्रयास गरेको आरोप लागेको हो ।

एकीकृत समाजवादी स्रोतका अनुसार बागमती प्रदेशसभामा मुख्यमन्त्री शालिकराम जम्कट्टेलले विश्वासको मत लिने बेलामा नेता खनालले आफ्नै सांसद कृष्ण खनाल र रमा आलेमगरलाई भड्काउने प्रयास गरेका थिए । नेता खनालले आलेमगरलाई विश्वासको मत दिन नजान दबाब नै दिएका थिए । खनालकै दबाबपछि आलेमगरले अध्यक्ष माधव नेपाल र उपमहासचिव गंगालाल तुलाधरको समेत फोन नउठाएको एसका एक स्थायी समिति सदस्यले बताए ।

ती सदस्यका अनुसार आलेमगरलाई मात्र होइन, हाम्रो नेपाली पार्टी (हानेपा)का सांसदलाई समेत उक्त सन्देश दिएको सूचना आएको हो । उनीहरूलाई नेता खनालले चितवनतिर घुम्न जान सुझाव दिएको स्रोतको दाबी छ । बिनाविभागीय मन्त्री बनाउन मुख्यमन्त्री सहमत भएपछि मात्रै आलेमगर हेटौँडा गएकी थिइन् । नेताहरूले गरेको फोन नै नउठाएर बसेकी आलेमगरलाई स्थानीय नेता र कार्यकर्ताको जोडबलमा विश्वासको मत दिन पठाएको पनि ती स्थायी सदस्यले बताए ।

त्यतिमात्र होइन, सुदूरपश्चिम प्रदेशको संसदीय दलका नेता तथा हालका मुख्यमन्त्री दीर्घ सोडारीलाई कांग्रेसको गठबन्धनमा गएर नागरिक उन्मुक्ति पार्टीको रेशमलाल चौधरीको समूहका नेताको पक्षमा हस्ताक्षर गर्न सम्मानित नेता खनालले नै संकेत गरेको पनि एसका नेताले दाबी गरे । ती नेताले शिलापत्रसँग भने, ‘बागमतीमा रमालाई रोक्ने र सुदूरपश्चिममा सोडारीलाई अर्कातिर हस्ताक्षर गर्न संकेत गरेको पनि नेता खनालले नै भन्ने आयो । बाहिर वामपन्थी एकता भन्ने भित्र चाहिँ यो सरकार ढाल्ने भन्दै खनाल हिँड्नुभएको छ । यो कुरा चाहिँ बुझिएको छैन ।’

त्यसो त, एसबाट मुख्यमन्त्री भएका सोडारीको विषयमा गठबन्धनमा राम्रोसँग कुरा नगरेको भन्दै पार्टी पंक्तिलाई नेता खनालले सुनाउँदै हिँड्ने गरेका छन् । सोडारीलाई मुख्यमन्त्री बनाउन आफूले गठबन्धनलाई सहमत गराएको भन्दै माधव नेपाल इंगित धारणा खनालले राख्न थालेका हुन् ।