वर्षव्यक्ति २०८० : फुटबलर साम्बादेखि गायिका समिक्षासम्मले पाएको मतको लेखाजोखा

वर्षव्यक्ति २०८० : फुटबलर साम्बादेखि गायिका समिक्षासम्मले पाएको मतको लेखाजोखा

A+ A A-

शिलापत्रले साल २०८० का वर्षव्यक्तिसहित समाचार निर्माताहरू घोषणा गरेको छ । महिला फुटबलर सावित्रा भण्डारी ‘साम्बा’ वर्षव्यक्ति २०८० घोषित भएकी छन् ।

नेपाली फुटबलमा अहिलेसम्मकै सफल महिला स्टार खेलाडी साम्बाले विश्व महिला फुटबलको सबैभन्दा शीर्ष लिग खेलिरहेकी छिन् । फ्रान्सेली लिगमा पुगेर उनले नेपाली फुटबलको सम्भावना देखाइदिएकी छन् । नेपालमा खेलेर केही हुन्न भन्ने भाष्यलाई गलत सावित गरिदिएकी साम्बा मिहिनेत र प्रतिभा भए संसारका शीर्ष देश र क्लबको ध्यान खिच्न सकिन्छ भन्ने बलियो उदाहरण हुन् । विकट गाउँको विपन्न परिवारमा जन्मेर संघर्षका पहाड छिचोल्दै राष्ट्रिय टिम हुँदै युरोपेली लिगसम्मको उनको यात्रा धेरैका लागि प्रेरणा र पाठ बन्न सक्छ ।

त्यस्तै, वर्षकलाकारमा अभिनेता दयाहाङ राई, वर्षखेलाडीमा क्रिकेटर दीपेन्द्रसिंह ऐरी, वर्षकार्टुनिस्टमा रवि मिश्र, वर्षपुस्तकः आख्यानतर्फ ‘अडिएका पाइला’, गैरआख्यानतर्फ ‘काली कर्णालीको लोकसाहित्य तथा संस्कृति’, कवितातर्फ ‘साला पहाड में क्या है’ सँगै विभिन्न विधाका समाचार निर्माताहरू घोषित भएका छन् ।

यो साललाई सकारात्मक, नकारात्मक प्रभाव पार्ने, आशा जगाउने वा कुनै पनि रचनात्मक काममार्फत आफ्नो सक्रिय भूमिका स्थापित गरेकाहरूको सूची हामीले न्युजरुममा लामो छलफलपश्चात् तयार पारेका थियौँ । तर, यसैलाई हामीले अन्तिम मानेनौँ ।

हामीले तयार पारेको सूची विधाविज्ञबाट अनुमोदन गरायौँ । यस क्रममा केही नाम थपिए । अनि, अन्तिम सूचीबाट वर्षव्यक्ति र अन्य विधाका पात्र र सिर्जना छान्ने जिम्मा पाठकलाई लगायौँ ।

वर्षव्यक्ति ५ जनामध्ये एक जना, वर्षकलाकार र वर्षखेलाडी १०/१९ जनामध्ये एक/एक जना, वर्षकार्टुनिस्ट ५ जनामध्ये एक जना चुन्न पाउने व्यवस्था मिलाइएको थियो ।

यसैगरी, १० नाटकमध्ये एकलाई वर्षनाटक र ४ लाई उत्कृष्ट नाटक, १० सिनेमामध्ये एकलाई वर्षसिनेमा र ४ लाई उत्कृष्ट सिनेमा, वर्षपुस्तकतर्फ एक/एक आख्यान, गैरआख्यान र कविता एवं प्रत्येक विधामा अन्य ४ उत्कृष्ट पुस्तक छान्न पाइने गरी गुगल फारम राखिएको थियो ।

अन्तिम नतिजा ‘गुगल फारम’ मा आएका मत विश्लेषणका आधारमा प्रकाशित गरिएको हो । आमपाठकलाई १५ चैतदेखि २५ चैतसम्म आफ्नो मत दिने समय दिइएको थियो । वर्षसमीक्षाले देशलाई नयाँ दिशा दिन र आगामी वर्ष सुझबुझपूर्ण कदम चाल्न सघाउ पुर्‍याउन सकोस् भन्ने ‘शिलापत्र वर्षान्त’ अभियानको उद्देश्य हो ।

वर्षव्यक्तिको मनोनयनमा नक्कली भुटानी शरणार्थी प्रकरणको छानबिन गरेका एसएसपीद्वय दानबहादुर कार्की र मनोजकुमार केसी, पुस्तक बेचेर कृषि औजार कारखाना सञ्चालन गर्न प्रयासरत वैज्ञानिक महावीर पुन, व्यक्तिगत ४० करोड रुपैयाँ खर्चेर रुपन्देहीमा अन्तर्राष्ट्रियस्तरको रंगशाला बनाइरहेका उद्यमी विनोद कुँवर र युरोपको माथिल्लो लिग खेल्ने पहिलो नेपाली खेलाडी सावित्रा भण्डारी ‘साम्बा’ लाई राखिएको थियो ।

देश, विदेशबाट प्राप्त ७ हजार ७ सय ५२ मतमध्ये ३८ दशमलव ६ प्रतिशत उत्तरदाताले साम्बालाई वर्षव्यक्ति बनाउन मत दिएका छन् । वर्षव्यक्तिमा सामाजिक सञ्जालमार्फतसमेत धेरै मत आएको थियो । तर, गुगल फारमबाहिर आएका मतलाई नतिजामा समावेश गरिएको छैन ।

महावीर पुन

यसैगरी, वैज्ञानिक पुनलाई साम्बापछि धेरै २५ दशमलव ९ प्रतिशत मत आयो । वीरगञ्जस्थित कृषि औजार कारखानालाई पूर्ण क्षमतामा सञ्चालन गर्न पुन आफूले लेखेको आत्मकथा बेच्न देश दौडाहामा छन् । सकारात्मक सामाजिक प्रयासका लागि उनी 'प्रमुख समाचार निर्माता २०८०' बने ।

विनोद कुँवर

उद्यमी विनोद कुँवरलाई ‘वर्षव्यक्ति’ बनाउन २४ दशमलव ६ प्रतिशतले मत दिए । नेपालमा केही हुँदैन भनेर बर्सेनि लाखौँ युवा विदेशिरहेको समयमा विदेशमा बसेर गरेको करोडौँ कमाइ नेपालको खेलक्षेत्रमा लगानी गरेर आशाको सञ्चार गराएकोमा कुँवरलाई हामीले वर्षव्यक्तिको सूचीमा राखेका थियौँ । उनी पनि सकारात्मक प्रयासका लागि प्रमुख समाचार निर्माता २०८० चुनिए ।

दानबहादुर कार्की र मनोजकुमार केसी

यसैगरी, एसएसपीद्वय दानबहादुर कार्की र मनोजकुमार केसीले ९ दशमलव ४ प्रतिशत मत पाए । उनीहरूले २०८० सालमा सतहमा आएको नक्कली भुटानी शरणार्थी प्रकरणको छानबिन गरेका थिए । विभागीय नीति तथा आदेश निर्देशनलाई आत्मसाथ गरी निर्दिष्ट जिम्मेवारी कुशलतापूर्वक पूरा गरेकोमा उनीहरूलाई हामीले संयुक्त रूपमा वर्षव्यक्ति २०८० को सूचीमा राखेका थियौँ । कार्की र केसी पनि प्रमुख समाचार निर्माता २०८० बने ।

दयाहाङ बने 'शिलापत्र वर्षकलाकार २०८०'

वर्षकलाकारको सूचीमा लोकगायक खेम सेन्चुरी, अभिनेता दयाहाङ राई, गायकहरू प्रकाश दूतराज, प्रकाश सपुत, भुपू पाण्डे, गायिका शान्तिश्री परियार, कलाकार संयुक्त रूपमा सन्तोष पौडेल बटुकजी र अमृता पौडेल, गायिका समिक्षा अधिकारी, अभिनेताहरू सौगात मल्ल र विपिन कार्की थिए ।

यीमध्ये सर्वाधिक ३२ दशमलव १ प्रतिशत मतका साथ अभिनेता दयाहाङ राई वर्षकलाकार २०८० घोषित भए । दोस्रोमा सबैभन्दा बढी मत गायिका समीक्षा अधिकारीले पाइन् ।

barsha kalakar1713177547.jpg

१४ दशमलव २ प्रतिशत मत पाएकी अधिकारी वर्ष २०८० कि उत्कृष्ट कलाकार बनिन् । यसैगरी, १३ दशमलव १ प्रतिशत मत पाएर अभिनेता विपिन कार्की, ११ दशमलव २ प्रतिशत मतका साथ गायक प्रकाश सपुत र ६ दशमलव ५ प्रतिशत मत पाएर गायक प्रकाश दुतराज उत्कृष्ट कलाकार २०८० चुनिए ।

वर्षखेलाडीमा दीपेन्द्र

वर्षखेलाडीमा १० जनालाई मनोनयनमा राखिएको थियोः पुरुष फुटबलबाट अनन्त तामाङ, एथलेटिक्सबाट दीपक अधिकारी, पुरुष क्रिकेटमा दीपेन्द्र सिंह ऐरी, पारा तेक्वान्दोमा पलेसा गोवर्धन, पुरुष भलिबलमा मानबहादुर श्रेष्ठ, रवि केसी, महिला क्रिकेटमा रुविना क्षत्री, एथलेटिक्समा सन्तोषी श्रेष्ठ र महिला भलिबलमा सरस्वती चौधरी । यो सूचीबाट दीपेन्द्रसिंह ऐरी वर्षखेलाडी २०८० चुनिए ।

barsha kheladi1713177563.jpg

उनले कुल ७ हजार ७ सय ५२ मतको ५३ दशमलव २ प्रतिशत मत पाए । यसैगरी, रुबिना क्षत्री, रवि केसी र सरस्वती चौधरी उत्कृष्ट ४ भित्र परे ।

वर्षकार्टुनिस्ट रवि मिश्र

वर्षान्त अभियानका लागि शिलापत्रले यसपालि वर्षकार्टुनिस्ट विधा पनि थपेको थियो । सूचीमा अनुप गुरुङ, अविन श्रेष्ठ, रवि मिश्र, रविन साय्मि र वासु क्षितिज थिए । यीमध्ये २८ दशमलव ८ प्रतिशत मत पाएर रवि मिश्र वर्षकार्टुनिस्ट २०८० घोषित भए । १७ वर्षदेखि कार्टुनकारिता गरिरहेका उनी हाल नयाँ पत्रिका दैनिकमा कार्यरत छन् । त्यहाँ उनको कार्टुन स्तम्भ ‘कर्नर किक’ चर्चित छ । चित्रकलामा स्नातकोत्तर मिश्र कार्टुनिस्ट क्लब अफ नेपालका महासचिव पनि हुन् । उनीपछि क्रमशः अनुप गुरुङले १९ दशमलव ९, रविन साय्मिले १६ दशमलव ८, अविन श्रेष्ठले १६ दशमलव २ र वासु क्षितिजले १५ दशमलव ५ प्रतिशत मत पाए ।

पाठकबाट सुझावको अपेक्षासहित राखिएको अन्य अप्सनबाट केही उत्तरदाताले राजेश केसी र आशिष खनाल ‘माडसाब’को नामसमेत सुझाएका थिए ।

सिनेमा 'जारी'

२०८० सालभर प्रदर्शितमध्ये १० बाट एक वर्षसिनेमासहित उत्कृष्ट ४ छान्ने जिम्मा हामीले पाठकलाई लगाएका थियौँ । वर्षफिल्मको सूचीमा अगत्स्य, जारी, दिमाग खराब, नाङ्गो गाउँ, परदेशी २, प्रसाद २, फूलबारी, महाजात्रा, महानगर र हल्कारा समावेश थिए । यीमध्ये ‘जारी’ शिलापत्र वर्षसिनेमा २०८० चुनियो । 'जारी'लाई वर्षसिनेमा बनाउन कुल ३१ दशमलव ४ प्रतिशत मत पर्‍यो । २२ दशमलव ८ प्रतिशत मतका साथ ‘महाजात्रा’,९ दशमलव १ प्रतिशत मत पाएको ‘दिमाग खराब’, ७ दशमलव ६ प्रतिशत मत पाएको ‘अगस्त्य’ र ७ दशमलव ५ प्रतिशत मत पाएको नाङ्गो गाउँ उत्कृष्ट सिनेमा घोषित भए ।

वर्षनाटक 'दमिनी भीर'

१० नाटकको सूचीबाट ‘दमिनी भीर’ शिलापत्र वर्षनाटक २०८० चुनियो । वर्षनाटकका लागि अन्धवेग, गंगालाल, जयमाया आफू मात्रै लिखापानी आइपुगी, ट्रान्जिट, दमिनी भिर, दुर्वासा, म्लेच्छ, मासिन्या, वेडिङ आलबम र शत्रु सिफारिस गरिएको थियो । सर्वेक्षणमा सहभागी ७ हजार ७ सय ५२ सर्वसाधारणमध्ये २४ दशमलव १ प्रतिशत मत पाएर ‘दमिनी भीर’ वर्षनाटक २०८० चयन भयो । मदन पुरस्कार विजेता राजन मुकारुङको उपन्यास ‘दमिनी भीर’ लाई इगिँहोपो काइच सुनुवारले नाट्य रुपान्तरण गरेका हुन् । उपन्यासले २०६९ सालमा मदन पुरस्कार जितेको थियो ।

दोस्रो बढी १३ दशमलव ५ प्रतिशत मतका साथ ‘गंगालाल’, १२ दशमलव १ प्रतिशत मतका साथ ‘मासिन्या’, १० दशमलव ३ प्रतिशत मतका साथ 'शत्रु' र १० प्रतिशत मतका साथ ‘ट्रान्जिट’ उत्कृष्ट नाटक २०८० मा पर्न सफल रहे ।

वर्षपुस्तकहरूः

‘शिलापत्र वर्षपुस्तक’का तीन विधा, आख्यान, गैरआख्यान र कवितामा समेत एक/एक वर्षपुस्तक र ४/४ उत्कृष्ट पुस्तकका लागि उत्तरदाताले गुगल फारममार्फत अभिमत दिएका छन् । १० चैतभन्दा अगाडि सार्वजनिक पुस्तक मात्रै यसमा सामेल गरिएको छ । त्यसयताका पुस्तकलाई अर्को साल समेट्नेछौँ ।

वर्षपुस्तकः आख्यान- अडिएका पाइला

लेखक विष्णु सापकोटाको पहिलो उपन्यास अडिएका पाइला आख्यान विधातर्फ ’शिलापत्र वर्षपुस्तक २०८०’ चयन भयो । मनोनयनमा परेका १० वटा आख्यान पुस्तकमध्ये सापकोटाको अडिएका पाइलाले २७ दशमलव ३ प्रतिशत मत प्राप्त गरेको थियो ।

वर्षपुस्तक २०८० मा रमेश सायनको ‘अन्तर’, बाह्रखरीको ‘उत्कृष्ट कथा’, विश्व कुइँकेलको ‘गोपिचा’, भक्तमान स्याङ्तानको ‘डम्फूको आत्मालाप’, कृष्ण कुसुमको ‘पार्श्वधुन’, गोविन्द कुसुमको ‘भृकुटी’, मनप्रसाद सुब्बाको ‘मिसाम’, सागर खड्काको ‘राइपाली भञ्ज्याङ’ प्रस्तावित थिए । वर्षपुस्तकबाहेक बढी मत ल्याउने अन्य ४ पुस्तकलाई उत्कृष्ट पुस्तकका रूपमा समेटिएको छ ।

अडिएका पाइलापछि कृष्ण कुसुमको 'पार्श्वधुन'ले १२ दशमलव ३ प्रतिशत मत प्राप्त गरेको छ । त्यसैगरी, उत्कृष्ट कथा बाह्रखरीले १० प्रतिशत, उपन्यास अन्तरले ८ दशमलव ३ प्रतिशत र 'भृकुटी' उपन्यासले ८ प्रतिशत मत पाएका छन् ।

वर्षपुस्तकः गैरआख्यान- काली–कर्णालीको लोकसाहित्य र संस्कृति

गैरआख्यानतर्फ यज्ञराज उपाध्यायको ‘काली–कर्णालीको लोकसाहित्य र संस्कृति’, ददि सापकोटाको ‘जीवगाथा’, कुमार नगरकोटीको ‘जोगियाना’, ओममूर्ति अनिलको ‘जीवन्त सम्बन्ध’, विवेककुमार शाहको ‘दरबारबाट देखेको नेपाल’, ध्रुवेशचन्द रेग्मीको ‘नेपाली संगीत दरबार’, खगेन्द्र लामिछानेको ‘पानीफोटो’, उमाकान्त पौडेलको ‘बुद्धकालीन समाज’, अमृता लम्सालको ‘मिडिया महिला र म’, मोहन मैनालीको ‘मुकाम रणमैदान’ र डा. भेषबहादुर थापाको ‘राष्ट्र–परराष्ट्र’मध्ये वर्षको एक गैरआख्यानसहित उत्कृष्ट ४ छान्ने जिम्मा हामीले पाठकलाई लगाएका थियौँ ।

यीमध्ये यज्ञराज उपाध्यायको अनुसन्धानमूलक पुस्तक ‘काली–कर्णालीको लोकसाहित्य तथा संस्कृति’ गैरआख्यान विधातर्फ ’शिलापत्र वर्षपुस्तक २०८०’ चयन भयो । यो पुस्तकलाई गैरआख्यानतर्फ वर्षपुस्तक बनाउन उत्तरदातामध्ये १२ दशमलव ८ प्रतिशतले मत दिएका छन् । ‘काली–कर्णालीको लोकसाहित्य तथा संस्कृति’ पछि भेषबहादुर थापाको आत्मकथा ‘राष्ट्र–परराष्ट्र’ले १२ दशमलव ४ प्रतिशत र कलाकार खगेन्द्र लामिछानेको ‘पानीफोटो’ले १२ दशमलव ३ प्रतिशत मत प्राप्त गरेका थिए ।

शिलापत्रले २०७७ सालदेखि वर्षव्यक्ति, वर्षखेलाडी, समाचार निर्माता र वर्षपुस्तक घोषणा गर्न थालेको हो ।

चिकित्सक ओममूर्ति अनिलको पुस्तक ‘जीवन्त सम्बन्ध’ले ९ दशमलव ३ प्रतिशत र राजदरबारका पूर्वसचिव विवेककुमार शाहको पुस्तक ‘दरबारबाट देखेको नेपाल’ले ८ दशमलव ७ प्रतिशत मत प्राप्त गरेको थियो । पत्रकार मोहन मैनालीको पुस्तक मुकाम रणमैदानले ८ दशमलव ६ मत प्राप्त गर्‍यो ।

वर्षपुस्तकः कविता- साला पहाडमें क्या है

वर्षकविताका लागि देवव्रतको ‘अश्वत्थामाको निधारबाट बागमती बग्छ’, राजु स्याङ्तानको ‘ओ पेङ्दोर्जे’, निर्भीकजंग रायामाझीको ‘त्यसरी त कहिल्यै सोचिएन’, रेशम विरहीको ‘प्रतिरोधको लय’, सुमिनाको ‘बागी स्त्रीको आत्मकथा’, भूपिनको ‘भूपिनका कविता’ र अभय श्रेष्ठको ‘लहना र तीर’, मीनबहादुर विष्टको ‘साला पहाडमें क्या हे’, प्रकाश रम्घालीको ‘साँझको संगत’ र गणेशकुमार राईको ‘सिलीदुङः गीलु रातोस’ सिफारिस गरिएको थियो ।

यीमध्ये सबैभन्दा बढी १७ दशमलव ३ प्रतिशत मत पाएर मीनबहादुर विष्टको कवितासंग्रह ’साला पहाडमें क्या है’ कवितातर्फ ’शिलापत्र वर्षपुस्तक २०८०’ चयन भयो

मनोनयनमा परेका १० वटा संग्रहमध्ये सुमिनाको ’वागी स्त्रीको आत्मकथा’ कवितासंग्रहले १३ दशमलव ४ प्रतिशत, भूपिनको ‘भूपिनका कविता’ ले १२ प्रतिशत, अभय श्रेष्ठको कवितासंग्रह ’लहना र तीर’ले ११ दशमलव ४ प्रतिशत र राजु स्याङ्तानको ’ओ पेङदोर्जे’ले १० दशमलव ९ प्रतिशत मत प्राप्त गरेका थिए ।

समाचार निर्माताहरू

विधागतबाहेक हामीले १५ समाचार निर्माता छान्ने जिम्मा पनि पाठकलाई सुम्पेका थियौँ । यो साललाई सकारात्मक, नकारात्मक प्रभाव पार्ने वा समाचारमा छाएका, आशा जगाउने वा कुनै पनि रचनात्मक काममार्फत आफ्नो सक्रिय भूमिका स्थापित गरेकाहरू नै समाचार निर्माता २०७९ को सूचीमा समावेश गरिएका छन् ।

समाचार निर्माता २०८० का लागि यी नाम सिफारिस गरिएका थिएः

१. अमरेशकुमार सिंह (स्वतन्त्र सांसद)
२. आरजु राणा/मञ्जु खाँण (सांसद)
३. किरण वज्राचार्य (एआईजी)
४. कृष्णबहादुर महरा (माओवादी केन्द्रका उपाध्यक्ष )
५. केदार कार्की (कोशी प्रदेशका मुख्यमन्त्री)
६. केशरजंग बराल (त्रिविका उपकुलपति)
७. टोपबहादुर रायमाझी (एमाले नेता)
८. जीबी राई (ग्यालेक्सी टीभीका सञ्चालक)
९. तेन्जेन शेर्पा (९२ दिनमा १४ हिमालका आरोही)
१०. दुर्गा प्रसाईं (मेडिकल व्यवसायी)
११. दीपक मनाङ्गे (गण्डकी प्रदेशसभा सदस्य)
१२. दीपेश पुन (पूर्वउपराष्ट्रपति नन्दबहादुर पुनका छोरा)
१३. नारायणकाजी श्रेष्ठ (उपप्रधानमन्त्री)
१४. पुष्पकमल दाहाल (प्रचण्ड) (प्रधानमन्त्री एवं माओवादी केन्द्रका अध्यक्ष)
१५. बालकृष्ण खाँण (कांग्रेस नेता)
१६. बालेन्द्र शाह (काठमाडौंका मेयर)
१७. भारती मानन्धर (रिगल आममाफी प्रकरण)
१८. मीनबहादुर गुरुङ (व्यवसायी)
१९. रवि केसी/सीपी घर्ती (जाजरकोट भूकम्पमा काम गरेका मेयर)
२०. रवि लामिछाने (उपप्रधान तथा गृहमन्त्री एवं रास्वपा सभापति)
२१. रेशम–रञ्जिता (नागरिक उन्मुक्ति पार्टीका पूर्वअध्यक्ष र वर्तमान अध्यक्ष)
२२. विनोद/अरुण चौधरी (व्यवसायी)
२३. शिशिरराज ढकाल (काठमाडौं जिल्ला अदालतका न्यायाधीश, सन्दीपको मुद्दा)
२४. बद्री केसी (एनआएरएन विवाद)
२५. हुमकला पाण्डे (धरानको सम्भावित धार्मिक दङ्गा टार्ने सुनसरीकी तत्कालीन सीडीओ)

माथिको सूचीबाट १५ समाचार निर्माता चुनिएका छन्, जसमा बालेन्द्र शाह, हुमकला पाण्डे, भारती मानन्धर, शिशिरराज ढकाल, दुर्गा प्रसाईं, बालकृष्ण खाँड, रेशम–रञ्जिता चौधरी, पुष्पकमल दाहाल ‘प्रचण्ड’, नारायणकाजी श्रेष्ठ, रवि लामिछाने, जीबी राई, टोपबहादुर रायमाझी, केदार कार्की, कृष्णबहादुर महरा र मीनबहादुर गुरुङ छन् ।

समाचार निर्माता २०८० चुनिएकामध्ये सबैभन्दा बढी मत ५६ दशमलव ६ प्रतिशत मत काठमाडौंका मेयर बालेनले पाएका छन् । उनले जति मत अन्य विधामा समेत कसैले पाएका छैनन् । समाचार निर्माता बनाउन उत्तरदाताले दोस्रो बढी मत मेडिकल व्यवसायी दुर्गा प्रसाईंलाई दिएका छन्, उनले ४३ दशमलव ९ प्रतिशत मत पाएका छन् ।

शिलापत्रले २०७७ सालदेखि वर्षव्यक्ति, वर्षखेलाडी, समाचार निर्माता र वर्षपुस्तक घोषणा गर्न थालेको हो ।

२०७७ मा नेकपाको एकता भंग गर्दै एमाले र माओवादी केन्द्र ब्युँताउने विवादास्पद फैसला गरेका न्यायाधीशद्वय बमकुमार श्रेष्ठ र कुमार रेग्मी वर्षव्यक्ति घोषित भएका थिए भने २०७८ मा विद्यालयमा ‘पढ्दै कमाउँदै’ कार्यक्रमको परिकल्पनाकार सुर्खेतका शिक्षक नारायण सिग्देल वर्षव्यक्ति चुनिएका थिए । २०७९ मा वरिष्ठ नेत्ररोग विशेषज्ञ डा. सन्दुक रुइत वर्षव्यक्ति चयन भएका थिए ।

यसैगरी, २०७७ मा फुटबलर किरण चेम्जोङ, २०७८ मा ओलम्पियन पलेशा गोबर्धन, २०७९ मा क्रिकेटर आसिफ शेख वर्षखेलाडी घोषित भएका थिए । २०७८ सालमा गायक प्रकाश सपुत र २०७९ मा गायक तिलकसिंह पेला ‘वर्षकलाकार’ घोषित भएका थिए ।

यो पनि..

वर्षनाटक- २०८०