‘दमिनी भीर’ बन्यो 'शिलापत्र वर्षनाटक २०८०', जसले कोट्याउँछ सामाजिक वर्गविभेदको पाटो

‘दमिनी भीर’ बन्यो 'शिलापत्र वर्षनाटक २०८०', जसले कोट्याउँछ सामाजिक वर्गविभेदको पाटो

A+ A A-

नाटक ‘दमिनी भीर’ 'शिलापत्र वर्षनाटक २०८०' चुनिएको छ । विधाविज्ञको रायमा शिलापत्रले १५ चैतमा १० नाटकको सूची तयार गरी वर्षव्यक्ति अनलाइन सर्वेक्षणमा राखेको थियो । सर्वेक्षणमा सहभागी ७ हजार ७ सय ५२ सर्वसाधारणमध्ये २४ दशमलव १ प्रतिशत मत पाएर ‘दमिनी भीर’ वर्षनाटक २०८० चयन भएको हो ।

मनोनयन, छनोट प्रक्रिया र नतिजाको विस्तृत विवरण शिलापत्रले केही दिनमा सार्वजनिक गर्नेछ ।

शिलापत्र वर्षनाटक २०८० : दमिनी भीर

मदन पुरस्कार विजेता राजन मुकारुङको उपन्यास ‘दमिनी भीर’ लाई इगिँहोपो काइच सुनुवारले नाट्य रुपान्तरण गरेका हुन् । उपन्यासले २०६९ सालमा मदन पुरस्कार जितेको थियो । मण्डला नाटक घरमा २२ भदौदेखि १० असोजसम्म चलेको नाटक पनि धेरै दर्शकको मन जित्न सफल रह्यो ।

समता फाउन्डेसन र नेपाल दलित साहित्य तथा संस्कृति प्रतिष्ठानको संयुक्त निर्माणमा मञ्चन भएको नाटकले समाजमा व्याप्त वर्गविभेद, वञ्चितीकरण र अन्तरविरोधलाई मार्मिक तरिकाले प्रस्तुत गरेको छ । यसको नाट्य रुपन्तरणसँगै कला र अभिनय पक्ष पनि बेजोड छ ।

नाटकमा भावना उप्रेती, आकाश नेपाली, सचिन रत्न, पुनम थापा, रियर राई, सुजता गुरुङ, सुजु सुनुवार किराँती, प्रतिना राई, मणि कुलुङ राई, सोनाम लामा, कवि राई, शायोक मुकारुङ, सीता राई, किरण चाम्लिङ राई र सजितलगायतको अभिनय छ ।

१५ चैतदेखि १० दिनको समय राखेर शिलापत्रले विभिन्न विधामा भर्चुअल्ली मत हाल्न पाउने गरी फारम राखेको थियो । २५ चैत राति १२ बजेदेखि भोटिङ बन्द गरियो ।

पाठकले वर्षपुस्तकका साथै एक/एक वर्षव्यक्ति, वर्षकलाकार, वर्षखेलाडी, वर्षकार्टुनिस्ट, वर्षसिनेमा र वर्षनाटकका साथै १५ समाचार निर्मातालाई मत दिन पाउने व्यवस्था मिलाइएको थियो । पाठक मतकै आधारमा वर्षनाटकसँगै वर्षखेलाडी क्रिकेटर दीपेन्द्रसिंह ऐरी, वर्षकार्टुनिस्ट रवि मिश्र, वर्षकलाकार दयाहाङ राई र वर्षसिनेमा 'जारी' घोषणा गरिसकिएको छ ।

बितेको वर्ष भएका घटना, परिघटना अनि कारक पात्रहरूको समीक्षाले आउने वर्ष सुझबुझपूर्ण निर्णय गर्न देशलाई सघाउ पुर्‍याओस् भन्ने ध्येयका साथ २०७७ सालयता शिलापत्रले वर्षको अन्तिममा 'वर्षव्यक्ति' घोषणा गर्दै आएको छ । गतवर्ष वरिष्ठ नेत्ररोग विशेषज्ञ डा. सन्दुक रुइत 'शिलापत्र वर्षव्यक्ति' घोषित भएका थिए ।

यसपल्ट वर्षव्यक्तिमा वैज्ञानिक महावीर पुन, उद्यमी विनोद कुँवर, फुटबलर सावित्रा भण्डारी (साम्बा) तथा संयुक्त रूपमा एसएसपीद्वय दानबहादुर कार्की र मनोजकुमार केसीलाई राखिएको छ । वर्षव्यक्तिमा नचुनिएका बाँकी तीन जना यस वर्षको प्रमुख समाचार निर्माता हुनेछन् । वर्षव्यक्ति २०८० चैत ३० गते (शुक्रबार) घोषणा गरिनेछ । यो सूची कसरी तयार गरियो भन्ने जान्न यहाँ क्लिक गर्नुहोस् ।

शिलापत्र वर्षान्त अभियान के हो ? वर्षव्यक्ति वा यसअन्तर्गत विभिन्न विधाका सूची कसरी तयार गरिन्छ, केलाई आधार मानिन्छलगायत जिज्ञासा भए यहाँ क्लिक गरेर पढ्न सक्नुहुन्छ ।

प्रकाशित मिति: बिहीबार, चैत २९, २०८० १८:४२