पाँच दशककाे नेपाल बाेल्ने 'साला पहाडमें क्या है' बन्याे 'शिलापत्र वर्षकविता पुस्तक'

पाँच दशककाे नेपाल बाेल्ने 'साला पहाडमें क्या है' बन्याे 'शिलापत्र वर्षकविता पुस्तक'

A+ A A-

मीनबहादुर विष्टको कवितासंग्रह 'साला पहाडमें क्या है' कवितातर्फ 'शिलापत्र वर्षपुस्तक २०८०' चयन भएको छ । विधाविज्ञको रायमा मनोनयन र पाठकहरूको मतका आधारमा 'साला पहाडमें क्या है 'शिलापत्र वर्षपुस्तक २०८०' चुनिएको हो ।

मनोनयनमा परेका १० वटा संग्रहमध्ये विष्टको ‘साला पहाडमें क्या हैलाई कवितातर्फ वर्ष पुस्तक बनाउन कुल १७ दशमलव ३ प्रतिशतले मत हालेका छन् । अनलाइन सर्वेक्षणमा ७ हजार ७ सय ५२ उत्तरदाता सहभागी भएका थिए । विष्टको ‘साला पहाडमें क्या है'पछि सुमिनाको 'वागी स्त्रीको आत्मकथा' कवितासंग्रहले १३ दशमलव ४ प्रतिशत, भूपिनको ‘भूपिनका कविता’ ले १२ प्रतिशत, अभय श्रेष्ठको कवितासंग्रह 'लहना र तीर'ले ११ दशमलव ४ प्रतिशत र राजु स्याङ्तानको 'ओ पेङदोर्जे'ले १० दशमलव ९ प्रतिशत मत प्राप्त गरेका थिए ।

शिलापत्रले वर्षान्त अभियानअन्तर्गत २०७७ सालदेखि वर्षव्यक्तिसहित विभिन्न विधाका पात्र र सिर्जनाहरूबाट उत्कृष्ट एक घोषित गर्दै आएको छ ।

० ० ०

‘शब्दहरूको गोलाबारी बर्साएजस्तो गरी
घरीघरी भनिएको छ
यो देश नयाँ युगमा प्रवेश गरेको छ
र म खोजिरहेछु
नयाँ युगमा प्रवेश गरेको त्यो देश ।’

कवि विष्टले ‘साला पहाडमें क्या है’ कवितासंग्रहमार्फत नेपाली समाजका कुरुप कथा र दारुण व्यथालाई काव्यिक कलामा पोखेका छन् । राजनीतिक चेत, सामाजिक विभेद, परम्परागत मान्यताका केही सन्दर्भलाई ६४ वटा कवितामार्फत चोटिलो रूपमा प्रस्तुत भएका छन् । ती कविताले पाँच दशक लामो कालखण्डको कथालाई काव्यिक रूपमा बताइरहेका छन् ।

सामान्य संवाद र बोलीचालीको क्षणमा पनि सिङ्गो समाजलाई चित्रमा उतार्ने खालको शैलीले विष्टका कविता सरल र मर्मस्पर्शी छन् । ‘यसरी एउटा राष्ट्र बाँच्ने बहाना गर्छ’, ‘चुनावपछिको गाउँ’, ‘जर्साबको कुकुर’, ‘नागरिकता’, ‘एउटा अलपत्र देश’, ‘लासहरूको सगरमाथा’लगायतका कविताले सामाजिक विभेद, राजनीतिक आन्दोलन मात्र होइन, शासकीय चरित्रमाथि प्रहार गरेको छ । अर्थात्, ‘साला पहाडमें क्या है’ कवितासंग्रहका कविता देश–चिन्तामा केन्द्रित भएका देखिन्छन् । ती कवितामा आममानिसका समस्या झल्किन्छन् । समाजका विसंगतिहरूमाथि धावा बोल्छन् ।

पश्चिम नेपालको प्युठानमा २०११ सालमा जन्मिएका कवि विष्टले त्रिभुवन विश्वविद्यालयबाट शिक्षाशास्त्रमा स्नातकोत्तर गरेका छन् । अमेरिकाको युनिभर्सिटी अफ क्यालिफोर्नियाबाट शिक्षा नीति विषयमा विद्यावारिधि गरेका विष्ट लेखनका हकमा आलोचनात्मक चेतका कवि हुन् । आफ्नै शैक्षिक र प्राज्ञिक व्यस्तताका कारण केही समय कवि–परिचयबाट टाढिएका विष्ट २०३६ सालको चर्चित ‘सडक कविता क्रान्ति’ का एक सहभागी हुन् । उनकाे याे कवितासंग्रह किताब पब्लिकेसर्सले प्रकाशन गरेकाे हाे । कवि विष्टले यो कवितासङ्ग्रह आफ्नी दिवंगत छोरी शिल्पाप्रति समर्पित गरेका छन् ।

प्रकाशित मिति: आइतबार, वैशाख २, २०८१ १७:०३