दीपेन्द्रसिंह ऐरी बने 'शिलापत्र वर्षखेलाडी २०८०', जसको रेकर्ड अब कसैले तोड्‌न सक्ने छैन

दीपेन्द्रसिंह ऐरी बने 'शिलापत्र वर्षखेलाडी २०८०', जसको रेकर्ड अब कसैले तोड्‌न सक्ने छैन

A+ A A-

गत असोजमा चीनको होन्झाउमा आयोजित एसियन गेम्समा दुर्लभ विश्वकीर्तिमान राखेका नेपाली राष्ट्रिय क्रिकेट टोलीका सदस्य दीपेन्द्रसिंह ऐरी 'शिलापत्र वर्षखेलाडी २०८०' घाेषित भएका छन् ।

विधाविज्ञको रायमा मनोनयन र पाठकहरूको मतका आधारमा २४ वर्षीय ऐरी ‘वर्षखेलाडी’ छानिएका हुन् । नेपाली टोलीका भरपर्दा यी खेलाडीले यसै वर्ष एसियन गेम्समा मंगोलियाविरुद्ध अब कसैले तोड्न नसक्ने कीर्तिमान राखेका छन् । ऐरीसहितको नेपाली टिम अहिले एसीसी प्रिमियर कप खेल्न ओमानमा छन् ।

वर्षखेलाडी सूचीमा परेका १० खेलाडीमध्ये कञ्चनपुर भीमदत्तका ऐरीलाई कुल ५३.२ प्रतिशतले मत हालेका छन् । यस वर्ष शिलापत्र सर्वेक्षणमा उनले पाएको यो सबैभन्दा लोकप्रिय मत हो । अनलाइन सर्वेक्षणमा ७ हजार ७ सय ५२ उत्तरदाता सहभागी भएका थिए ।

मनाेनयनमा फुटबल पुरुषतर्फ अनन्त तामाङ, एथलेटिक्सतर्फ दीपक अधिकारी र सन्तोषी श्रेष्ठ, महिला क्रिकेटमा रुविना क्षेत्री, पारा तेक्वान्दोमा पलेसा गोवर्धन, गल्फमा सुवास तामाङ, भलिवल पुरुषमा मानबहादुर श्रेष्ठ र रवि केसी तथा भलिवल महिलामा सरस्वती चौधरी परेका थिए । यीमध्ये दोस्रो भएकी रुविनाले ९.८ प्रतिशत र तेस्रो भएका अनन्तले ७.८ मत प्राप्त गरेका छन् । कतिपय उत्तरदाताले फुटबलर प्रिति राईको नाम पनि सिफारिस गरेका थिए ।

अघिल्लो वर्ष क्रिकेटर आशिफ शेख शिलापत्र वर्षखेलाडी २०७९ घोषित भएका थिए ।

यसपल्ट धेरैले वर्षखेलाडीको सूचीमा फुटबलर सावित्रा भण्डारी साम्बालाई नदेखेकोमा असन्तुष्टि जनाएको पनि देखियो । तर, उनी वर्षव्यक्तिकै मनाेनयनमा परेकाले खेल विधातर्फको मनोनयनमा नराखिएको हो । वर्षव्यक्तिको सूचीमा साम्बासहित नक्कली भुटानी शरणार्थी प्रकरण छानबिन गरेका एसएसपीद्वय दानबहादुर कार्की र मनोजकुमार केसी, आफ्नै ४० करोड रुपैयाँ लगानी गरेर रुपन्देहीमा अन्तर्राष्ट्रिय क्रिकेट रंगशाला बनाइरहेका उद्यमी विनोद कुँवर र आर्थिक अभावले थलिएको कृषि औजार कारखाना पुनः सञ्चालन गर्ने उद्देश्यले आफूले लेखेको किताब बेच्न देश दौडाहामा निस्केका वैज्ञानिक महावीर पुन छन् । वर्षव्यक्ति २०८० को घोषणा आगामी शुक्रबार गरिनेछ । अन्य विधातर्फको नतिजा पनि क्रमशः घोषणा गरिने छ ।

अब फर्कौं, शिलापत्र वर्षखेलाडी २०८० दीपेन्द्र सिंह ऐरीतर्फः

साल २०८० नेपाली क्रिकेटका लागि ऐतिहासिक रह्यो । १० वर्षपछि टी– २० विश्वकपमा छनोट हुनु, पहिलोपटक एसिया कप खेल्नु र टी– २० आईमा तीन सय प्लसको स्कोर बनाउनु यो वर्ष नेपाली क्रिकेटले पाएका महत्त्वपूर्ण उपलब्धि हुन् ।

अहिले नेपाल आईसीसीको एसोसिएट टिममध्येकै सबैभन्दा बलियो टिममा पर्छ । त्यसैले विश्व क्रिकेटप्रेमीहरूले नेपाली क्रिकेटलाई पछ्याउन थालेका छन् । नेपाली क्रिकेटरहरू पनि विश्व क्रिकेटप्रेमीको ध्यान आफूतर्फ तान्न सफल भएका छन् ।

यो पनि..

शिलापत्र वर्षकार्टुनिस्ट बने रवि मिश्र, पढ्नुस् उनको कथा (भिडियोसहित)

समग्र नेपाली क्रिकेटले यो वर्ष पाएको सफलता महत्त्वपूर्ण त छ नै तर जसले यो वर्ष नेपाली क्रिकेटलाई चिनायो, त्यो नाम हो दीपेन्द्रसिंह ऐरी । नेपाली फ्यानहरू त उनलाई 'टाइगर' भन्न रुचाउँछन् । तर, विश्वले उनलाई 'नो चेसेएबल'का रूपमा चिनेको छ ।

दीपेन्द्रले चीनको होन्झाउमा भएको एसियन गेम्समा मंगोलियाविरुद्ध बनाएको अर्धशतकको कीर्तिमान कसैले पनि तोड्न नसक्ने विश्वकीर्तिमान हो । हुन त कीर्तिमानहरू टुट्नका लागि बन्छन् भनिन्छ, तर दीपेन्द्रले बनाएको त्यो विश्वकीर्तिमान तोड्न होइन, बराबर मात्र गर्न सकिन्छ । त्यसैले उनी 'नो चेसेएबल' हुन् ।

गत असोजमा भएको खेलमा नेपालका मध्यक्रमका ब्याटर दीपेन्द्रले मंगोलियाविरुद्ध विश्वकीर्तिमान बनाउने क्रममा नौ बलमै अर्धशतकीय इनिङ्स खेलेका छन् । उनले १० बलमा आठ छक्काको सहयोगमा ५२ रन बनाए । यो टी– २० आईमा बनेको सबैभन्दा छिटो अर्धशतकको विश्वकीर्तिमान हो । यसअघि यो कीर्तिमान भारतका युवराज सिंहको नाममा थियो । उनले २००७ को विश्वकपमा इंग्ल्यान्डका स्टुअर्ट ब्रोडलाई एकै ओभरमा छ छक्का प्रहार गर्दा १२ बलमा अर्धशतक बनाएका थिए । उनको त्यो विश्वकीर्तिमान नेपालका दीपेन्द्रले १६ वर्षपछि तोडे । र, यसरी तोडे कि अब उनको कीर्तिमान कसैले पनि तोड्न सक्दैन । किनकि ९ बलभन्दा कम बलमा हरेक बलमा छक्का प्रहार गरे पनि ५० रन पुग्दैन । त्यसैले उनी 'नो चेसेएबल' बनेका हुन् ।

यसै खेलमा नेपाल टी– २० आईमा ३ सय प्लस रन बनाउने पहिलोे टिम बनेको थियो । नेपालले मंगोलियाविरुद्ध ३ सय १४ रनको विश्वकीर्तिमानी योगफल खडा गर्‍यो । क्रिकेटको सबैभन्दा पछिल्लो प्रारुप टी– २० आई हुन थालेको १६ वर्षमा पहिलोपटक कुनै टिमले तीन सय प्लसको स्कोर बनाएको हो । हालसम्म कुनै पनि पुरुष टी– २० आईमा नेपालको यो विश्वकीर्तिमान तोड्न सकेको छैन । नेपालले यसअघि सन् २०१९ को २३ फेब्रुअरीमा अफगानिस्तानले आयरल्यान्डविरुद्ध बनाएको २७८ रनको कीर्तिमान तोडेको हो । सन् २०१९ मै चेक रिपब्लिकले टर्कीविरुद्ध पनि २७८ रनको कीर्तिमान बनाएको छ ।

यो खेलमा नेपालका कुशल मल्लले पनि विश्वकीर्तिमान बनाएका थिए । उनले ३४ बलमा शतक प्रहार गर्दै भारतका रोहित शर्माको कीर्तिमान तोडेका थिए । यद्यपि यो कीर्तिमान नामिबियाका इल्टनले नेपालविरुद्ध नै ३३ बलमा शतक बनाएर तोडिसकेका छन् ।

हुन त दीपेन्द्र नेपालका ३६० डिग्री खेलाडी पनि हुन् । दक्षिण अफ्रिकाका ब्याटर एबी डिभिलियर्सले मैदानका चारैतिर सर्ट प्रहार गर्ने भएकाले ३६० डिग्रीको उपाधि उनले पाएका छन् । तर, दीपेन्द्र मैदानका चारैतिर सर्ट प्रहार गरेर होइन, क्रिकेटका मुख्य तीनै डिपार्टमेन्टमा अब्बल खेलाडी भएकाले ३६० डिग्री बनेका हुन् । अथवा उनी एक पर्फेक्ट अलराउन्डर हुन् । उनी ब्याटिङ, बलिङ र फिल्डिङ तीनै विधामा अब्बल छन् । आईसीसीको टी– २० ब्याटर वरीयतामा ७८ स्थानमा रहेका उनी अलराउन्डरमा २५औँ स्थानमा छन् ।

२४ वर्षीय दीपेन्द्रले हालसम्म नेपालका लागि ५५ ओडीआईका ५३ पारीमा ब्याटिङ गरेका छन्, जसमा १९ को औसतले ८९६ रन बनाएका छन् । यस क्रममा उनले एक शतक र तीन अर्धशतक बनाएका छन् । ६ नम्बरमा ब्याटिङ गर्ने उनको औसत कम भए पनि यो नम्बरमा आएर शतक बनाउनु आफैँमा महत्त्वपूर्ण हो ।

यो पनि..

'शिलापत्र वर्षकलाकार २०८०' बने अभिनेता दयाहाङ राई, के भन्छन् उनी ?

यस्तै, दीपेन्द्रले नेपालका लागि ५८ टी– २० आई खेल्दा १४७६ रन बनाएका छन् । यस क्रममा उनले एक शतक र ८ अर्धशतक बनाएका छन् । उनी नेपालका लागि टी– २० आई र ओडीआईमा शतक बनाउने तेस्रो खेलाडी हुन् ।

यति मात्र होइन, दीपेन्द्रले यो वर्ष घरेलु प्रतियोगितामा पनि आफ्नो टिमलाई च्याम्पियन बनाएका छन् । नेपाल पुलिस क्लबका कप्तान रहेका उनले यो वर्षको पीएम कपको उपाधि दिलाए । त्रिभुवन आर्मी क्लबलाई पराजित गर्दै यो वर्ष पुलिसले उपाधि उचाल्दा दीपेन्द्रले तीन विकेट लिएका थिए ।

विश्वकप क्रिकेट प्रतियोगिताको तयारीमा रहेको नेपाली क्रिकेट टिमले हालै भारतमा पनि उपाधि जितेको छ, जसमा दीपेन्द्रको भूमिका महत्त्वपूर्ण रह्यो । भारतको गुजरात टिमसँगको फाइनल खेलमा दीपेन्द्रले तीन विकेट लिएपछि नेपालले खेल जितेको थियो । जसमा उनी म्यान अफ द प्लेयर पनि बने ।

'शिलापत्र वर्षखेलाडी २०८०' घोषित ऐरीलाई हामी अहिलेसम्मका उपलब्धिप्रति बधाई दिँदै थप ऐतिहासिक उपलब्धिका लागि शुभकामना पनि दिन्छौँ ।

यो पनि...