हजुरआमा बनेपछि एसईई दिँदै कांग्रेस नेतृ भुसाल, भन्छिन्- ११,१२ पनि पढ्छु

A+ A A-

दक्षिणी पर्वतको बिहादी गाउँपालिका– ४, वहाकीकी ५० वर्षीया खगिसरा भुसाल अहिले एसईई परीक्षा दिइरहेकी छन् । उनका दुई छोरा र एक छोरीको विवाह भइसकेको छ भने तीन नातिनातिना छन् ।

उमेरमा पढाइ पूरा गर्न नपाएको धोको भुसालले हजुरआमा बनेपछि पूरा गर्न लागेकी छन् । २०४६ मा उनको विवाह भयो । कक्षा ९ को वार्षिक परीक्षा दिने बेलामा सुत्केरी भएकाले परीक्षा दिन पाइनन्, पढाइ रोकियो ।

पढाइ छाडेको ३२ वर्षपछि अघिल्लो वर्ष उनी गाउँकै लक्ष्मीभवन माविमा कक्षा ९ मा भर्ना भइन् । कक्षा ९ उत्तीर्ण गरेर नियमित कक्षा १० अध्ययन पूरा गरेपछि अहिले भुसाल एसईईमा सहभागी भएकी हुन् । पढ्नैपर्ने बाध्यता नभए पनि शिक्षित बन्न ३२ वर्षपछि विद्यालय जान थालेको उनी बताउँछिन् । पाको उमेरमा भर्खरका केटाकेटीसँग बसेर अध्ययन गर्दा असहज महसुस नभएको उनको भनाइ छ ।

'छोराबुहारीको कमाइबाट सुखसयलमा बसेको भए पनि हुन्थ्यो, तर सानैमा धेरै पढ्न नपाएकोमा पछुतो लागिरहेकाले पुनः पढ्न थालेँ,' उनले भनिन्, 'एसईईपछि पनि कक्षा ११ र १२ अध्ययन गर्ने योजना छ ।'

भुसाल बिहादी गाउँपालिकाकी पूर्वजनप्रतिनिधि पनि हुन् । उनी पहिलो स्थानीय तहको निर्वाचनमा नेपाली कांग्रेसबाट उम्मेदवार बनेर गाउँ कार्यपालिका सदस्य बनिन् । अहिले पनि सक्रिय राजनीतिमा छन् । उनी नेपाली कांग्रेस बिहादी गाउँ कार्यसमितिको सदस्य तथा नेपाल महिला सङ्घ बिहादीको कोषाध्यक्ष हुन् ।

उनले १७ वर्ष महिला स्वास्थ्य स्वयंसेविकाको रूपमा काम गरिन् । कार्यपालिका सदस्यमा विजयी भएपछि स्वयंसेविका छाडेको उनले बताइन् । २०४८ बाट नेपाल विद्यार्थी सङ्घको जिल्ला सदस्य भएर उनी राजनीतिमा सक्रिय छन् ।

'राजनीति होस् वा अन्य क्षेत्रमा पढाइको ज्ञानसँगै प्रमाणपत्रसमेत आवश्यक पर्ने भएकाले पनि मलाई विद्यालय जान रहर जागेको हो,' उनले भनिन् । घरमा छोराछोरीको जिम्मेवारी पूरा गरेपछि पढ्न सहज भएको उनले बताइन् । भुसालका श्रीमान् तिलक भुसाल नेपाली कांग्रेस पर्वतको सहसचिव तथा सङ्गठन विभाग प्रमुख हुन् ।

'सानै उमेरमा विवाह भएपछि पढाइ रोकिएको थियो, अहिले पुनः विद्यालय गएर पढ्न थालेकी छिन्,' तिलक भन्छन्, 'उनको इच्छाअनुसार जहिलेसम्म पढ्छिन्, त्यति बेलासम्म पढ्ने वातावरण मिलाउँछु ।'

शिक्षा विकास तथा समन्वय एकाइ पर्वतले पर्वतमा एसईई दिने दुई हजार २८ विद्यार्थीमध्ये खगिसरा भुसाल सबैभन्दा पाको उमेरको विद्यार्थी रहेको जनाएको छ । कार्यालय प्रमुख उद्धिमराज पौडेलले भुसाल ५० वर्ष नाघेको विद्यार्थी रहेको भन्दै उनी जिल्लामै सबैभन्दा बढी उमेरको विद्यार्थी भएको बताए ।

पर्वतकै पैयुँ गाउँपालिकास्थित जनसेवा संस्कृत माविबाट १२ वर्षका शक्ति अधिकारीले पनि एसईई परीक्षा दिएका छन् । अधिकारी जिल्लाकै सबैभन्दा कान्छो उमेरका विद्यार्थी हुन् ।

प्रकाशित मिति: सोमबार, चैत १९, २०८० ०९:२६