सांसद तोसिमाको प्रश्न- माउ पार्टीले भ्रातृ संगठनसँग किन सुझाव लिएनन् ?

A+ A A-

संसदको शिक्षा, स्वास्थ्य तथा सूचना प्रविधि समितिले विद्यालय शिक्षा विधेयकमाथि छलफल गर्न आइतबार प्रमुख दलका विद्यार्थी संगठनहरूलाई बोलाएको थियो । बैठकमा विद्यार्थी संगठनहरूले माउ पार्टीको भन्दा फरक प्रस्ताव राखेपछि सांसदहरू नै आश्चर्यमा परे । विद्यार्थी संगठनहरूले निजीलाई गुठीमा लैजानुपर्नेमा एक मत राखे ।

तर, तिनै विद्यार्थी संगठनका माउ पार्टी भने निजी विद्यालयको वकालत गरिरहेका छन् । त्यसैगरी, विद्यार्थी संगठनहरूले राज्यको सेवा सुविधा लिनेका छोराछोरी सामुदायिकमा पढाउनुपर्ने, शिक्षक नियुक्ति खुला प्रतिस्पर्धा हुनुपर्ने, नैतिक शिक्षा राख्नुपर्ने र स्थानीय तहको अधिकार खोस्न नहुनेमा जोड दिए । तर, यी मुद्दामा तिनै विद्यार्थी संगठनका सांसदहरूले भने फरक-फरक संशोधन प्रस्ताव दर्ता गराएका छन् ।

पार्टीको लाइन एकातिर र विद्यार्थीको संगठनको अर्कोतिर भएको देखिन्थ्यो । माउ पार्टीको भन्दा फरक प्रस्ताव आएपछि समितिको बैठकपछि राष्ट्रिय स्वतन्त्र पार्टीकी सांसद डा. तोसिमा कार्कीले विद्यार्थी नेताहरूलाई सोधेकी थिइन्, ‘माउ पार्टीको भन्दा फरक प्रस्ताव राख्नुभयो नि ?’ अखिल क्रान्तिकारीकी अध्यक्ष पञ्चा सिंहले जवाफ दिइन्, ‘हामी पार्टीको प्रतिपक्षी हौँ नि त ।’ सिंहको जवाफले विद्यार्थी संगठनहरू आफ्नो मत राख्न स्वतन्त्र रहेको प्रतीत हुन्छ ।

शिक्षा विधेयकमा पार्टीको लाइन एकातिर, विद्यार्थी संगठनको अर्कोतिर

तर, रास्वपाकी सांसद डा. कार्कीले माउ पार्टीबाट आएको विधेयक र अभिव्यक्तिचाहिँ किन फरक भएको भनेर प्रश्न गरेकी छिन् । ‘सत्ता पक्ष होस् या प्रतिपक्षी । विद्यार्थी संगठनहरूले शिक्षा प्रणाली सुधारका लागि निकै जायज मद्दा बोकेर, निकै जायज आवाज बोकेर एकै ठाउँमा उभिएका रहेछन् । तर, भ्रातृ संगठनकै माउ पार्टीबाट आएको विधेयक र अभिव्यक्तिचाहिँ किन यति फरक भएको होला ?,’ सांसद कार्कीले प्रश्न गरिन् ।

रास्वपाको विद्यार्थी संगठन छैन । तर, संसदीय समितिमा आएर विद्यार्थी संगठनहरूले राखेका आवाज रास्वपाले बोकिरहेको सांसद कार्कीले बताएकी छिन् । ‘लगभग सबैजसो उहाँहरूको आवाजसँग मेल खाने गरी विधेयकमा संशोधन त भ्रातृ संगठन नै बनाउँदिनँ भन्ने राष्ट्रिय स्वतन्त्र पार्टीले हालेको छ,’ उनले भनिन् । पुराना दलहरूले युवा विद्यार्थीलाई कार्यकर्ताका रूपमा गणना गर्न मात्र प्रयोग गरेको सांसद कार्कीको भनाइ छ ।

‘भातृ संगठनका नाममा राजनीतिमा युवालाई गणना पुर्‍याउन या शक्ति समूह बनाउन या कार्यकर्ता बनाउन नामको मात्र सहभागिता कि निर्णायक भूमिकासहितको अर्थपूर्ण सहभागिता ?,’ उनले प्रश्न गरेकी छिन् । विद्यार्थी संगठनमा योग्य खारिएका युवा विद्यार्थी रहेको तर नीतिगत निर्णय प्रक्रियामा सामेल नगराइएको टिप्पणी उनले गरेकी छिन् ।

‘आजको स्थितिमा ब्याचलर्स, मास्टर्स पीएचडी मात्र होइन अनेक खोज अनुसन्धान र अध्ययन अध्यापनले खारिएकाहरू प्रत्येक पार्टीका विधार्थी संगठनमा छन् । तर, तिनको अस्तित्वलाई नीतिगत निर्णय प्रक्रियामा सहभागी गराइएको छ त भन्ने ठूलो प्रश्न छ । फेरि पनि राजनीतिमा युवालाई गणपूरक सहभागिता मात्र कि अर्थपूर्ण सहभागिता ?,’ उनले सोधेकी छिन् ।

विद्यालय शिक्षा विधेयकमा माउ पार्टीले विद्यार्थी संगठनसँग राय सुझाव नलिएकोमा पनि सांसद कार्कीले प्रश्न गरेकी छिन् । ‘अबको शिक्षा प्रणाली, पाठ्यक्रम, परीक्षा प्रणाली, दरबन्दी, छनोट प्रणाली, नियमन, मापन, र समग्रमा शिक्षाको हकको सुनिश्चितताबारे स्पष्ट खाका भिजन र मिसन र वैज्ञानिक ढङ्गले समाधानका उपाय त यी विद्यार्थी संगठनहरूसँगै रहेछ । तर, माउ पार्टीले भ्रातृ संगठनसँग सल्लाह सुझाव परामर्श किन नलिएका होलान् ?,’ उनको प्रश्न छ । विद्यालय शिक्षा विधेकमाथि शिक्षा समितिमा लगातार छलफल चलिरहेको छ ।

सम्बन्धित समाचार