कोशीका विष्टले राप्रपामा विवाद, लोहनी समूह पार्टी विभाजनको लाइनमा

A+ A A-

कोशी प्रदेशको सभामुखले राप्रपाको विवाद सतहमा ल्याइदिएको छ । अध्यक्ष राजेन्द्र लिङ्देन र निर्देशक समितिका संयोजक प्रकाशचन्द्र लोहनी कित्ता काटको लाइनमा पुगेका छन् ।

अध्यक्ष लिङ्देनले कोशीमा कांग्रेस र माओवादी केन्द्रको सत्ता गठबन्धनसँग साझेदारी गरेर सभामुख लिएका छन् । त्यही सहमतिअनुसार राप्रपाले अम्मरबहादुर विष्टलाई सभामुख प्रस्ताव गर्‍यो, जसलाई एमालेले समेत समर्थन गरेपछि निर्विरोध निर्वाचित भए । विष्टलाई कोशीमा निर्विरोध बनाउने दलहरूको प्रयास भइरहेका बेला काठमाडौंमा भने राप्रपाका नेताहरू कित्ता काट गर्ने लाइनमा उभिएका थिए ।

लोहनी कोशीको त्यही प्रस्ताव रोक्ने प्रयासका लागि नेताहरूसँग छलफलमा जुटे । निर्देशक समितिको बैठक बोलाएर लोहनीले विष्टलाई सभामुखमा उम्मेदवार नदिने निर्देशन दिने निर्णय लिँदै थिए, उता विष्टले उम्मेदवारी दिइसकेका थिए । अध्यक्ष राजेन्द्र लिङ्देनको ग्रिन सिग्नल पाएपछि विष्ट उम्मेदवारी दिन पुगेका थिए । राप्रपाले २७ पुसमा एकता दिवस मनाउने तयारी गरिरहेका बेलामा लोहनी र लिङ्देन समूहबीच विवाद बढ्ने निश्चित भएको छ । त्यसले विभाजनका लागि बाटो खुला गर्ने नेताहरूले बताउन थालेका छन् ।

राप्रपा अध्यक्ष लिङ्देन सत्ता गठबन्धनसँग साझेदारी गरेर जान चाहिरहेका छन् । त्यसका लागि उनले नेताहरू परिचालन पनि गरेका थिए । उपाध्यक्ष बुद्धिमान तामाङ, विक्रम पाण्डेलगायतका नेताहरू प्रधानमन्त्री पुष्पकमल दाहाल प्रचण्ड र कांग्रेस सभापति शेरबहादुर देउवासँग संवादमा थिए । राष्ट्रियसभाको चुनावमा पनि मिलेर जाने प्रस्ताव राप्रपाले गरेको थियो । कम्तीमा एक सिट दाबी गरेको थियो ।

त्यसका लागि उपाध्यक्ष तामाङले प्रचण्ड र देउवासँग छलफल गरेका थिए । तर, अन्तिम समयमा कोटा नपुगेका कारण राप्रपाले औपचारिक रुपमा गठबन्धन गर्न सकेको थिएन । तर, उनीहरूबीच कोशी प्रदेशमा भने गठबन्धन गर्ने पूर्वसहमति भएको थियो । त्यही सहमतिअनुसार सभामुख राप्रपालाई दिन गठबन्धन तयार भएको हो ।

राप्रपाका नेताहरूको भनाइमा अध्यक्ष लिङ्देनले सत्ता गठबन्धनसँग सहमति गरेअनुसार राप्रपा अघि बढेमा अबको केही समयमा संघीय सरकारमा पनि सहभागी हुनेछ । कोशी प्रदेश सरकारमा पनि राप्रपा सहभागी हुनेछ । कोशी प्रदेशका ६ जना सांसदमा ५ जना झापाका रहेका छन् । र ६ जना नै अध्यक्ष लिङ्देन समूहका सांसदहरू हुन् ।

लोहनी समूहमा अहिले उपाध्यक्ष रविन्द्र मिश्रदेखि महामन्त्री धवलशमशेर राणासम्म जोडिएका छन् । निर्देशक समितिको बैठकमा पनि उनीहरू विष्टलाई सभामुखबाट रोक्नुपर्ने निर्णयमा सहमत थिए । तर, उपाध्यक्ष तामाङ, पाण्डे र हेमराज गुरुङलगायतका नेताहरू भने विपक्षमा थिए । यद्यपि उनी बैठकमा पनि सहभागी थिएनन् । अध्यक्ष लिङ्देन भने विदेश भ्रमणमा रहेको र बैठक समयमा काठमाडौं आइनपुगेको बताइन्छ ।

राप्रपाले २७ पुसमा हिन्दु धर्म र राजतन्त्रको पक्षमा आन्दोलनको घोषणाको तयारी गरिरहेको छ । त्यसैको सम्मुखमा देखिएको विवादले राप्रपालाई विभाजित गर्ने देखिएको छ । तर, नेता पशुपतिशमशेर राणा भने पार्टी विभाजनको पक्षमा भने रहेका छैनन् । त्यसैले अहिले दुवैको पक्षमा खुलेका छैनन् । तर, पनि राणाको लाइन अध्यक्ष लिङ्देनसँग मिल्ने गरेको राप्रपाका नेताहरू बताउँछन् ।

आन्दोलनको घोषणा गरेर नयाँ मोर्चाबन्दी गर्नुपर्ने लोहनी समूहको भनाइ छ । उनीहरू अध्यक्ष लिङ्देनको नेतृत्वमा मोर्चा बनाउन तयार भएका छैनन् । कमल थापा, केशरबहादुर विष्ट, दुर्गा प्रसाईलगायत अध्यक्ष लिङ्देनको पक्षमा नरहेका कारण नयाँ मोर्चा बनाउनुपर्ने लाइनमा छन् । त्यसले पनि राप्रपाभित्र थप विवाद बढाएको हो ।

प्रकाशित मिति: मंगलबार, पुस २४, २०८० १८:४८