दसैँमा निजी स्कुल र कलेजका गाडीबाट विद्यार्थीलाई गन्तव्यमा लैजान सम्भव छ ?

A+ A A-

संसदको पूर्वाधार विकास समितिले दसैँमा निजी विद्यालय र कलेजका गाडीबाट विद्यार्थीलाई सहुलियतमा गन्तव्यमा पुर्‍याउन भौतिक पूर्वाधार तथा यातायात मन्त्रालयलाई निर्देशन दियो । यसमा भौतिक पूर्वाधारमन्त्री प्रकाश ज्वाला पनि सकारात्मक छन् । पेट्रोल, डिजेल भने सरकारले उपलब्ध गराउने गरी निजी विद्यालय/कलेजका गाडी प्रयोग गर्न प्रस्ताव गरिएको समिति सभापति दीपक सिंह बताउँछन् ।

‘काठमाडौंबाट २५ लाखभन्दा बढी सर्वसाधारण दसैँमा बाहिरिन्छन् । टाढाटाढा जाने विद्यार्थीलाई सहुलियत दिन निजी विद्यालय/कलेजका गाडी प्रयोग गर्न खोजिएको हो । पेट्रोल डिजेल सरकारले दिने व्यवस्था हुन्छ,’ सभापति सिंहले भने, ‘पहिले भूकम्प, बाढी, कोभिडमा पनि उहाँहरूले सहयोग गर्नुभएको छ । यसपटक पनि गर्नुहुन्छ भन्ने विश्वास छ ।’ १०/२० हजार दु:खी जनतालाई नि:शुल्क गन्तव्यमा पुर्‍याउने सभापति सिंह बताउँछन् ।

तर, निजी विद्यालय सञ्चालकहरू भने अहिलेको स्थितिमा गाह्रो हुने बताउँछन् । ‘यो गाह्रो कुरा हो । तेलको मूल्य बढेको छ । लामो दूरीमा चलाएको गाडी र ड्राइभर पनि होइन । नजिकका विद्यार्थी ल्याउने पुर्‍याउने गाडी लामो दूरीमा चलाउन जोखिम हुन्छ,’ एनप्याब्सनका अध्यक्ष सुवास न्यौपाने भन्छन्, ‘जटिल स्थितिमा सहयोग गरेका छौँ । भूकम्प, बाढीपहिरो र कोरोनामा हामीले सहयोग गरेकै थियौँ ।’

चालकको अभाव भएमा सेना, प्रहरी र यातायात व्यवसायीका चालक पनि प्रयोग गर्न सकिने तर्क समिति सभापति सिंहको छ । ‘थोत्रा बिग्रेका गाडी भए काठमाडौंमा पनि चलाउन मिलेन । स्कुल/कलेजका राम्रो अवस्थाका गाडी छन् । १० वटा गाडीमा पाँचवटा चलाउँदा फरक पर्दैन,’ सिंह भन्छन् । गरिबका छोराछोरीलाई चाडपर्वमा थोरै भए पनि राहत मिलोस् भनेर यस्तो प्रस्ताव ल्याइएको सभापति सिंहको भनाइ छ ।

‘विद्यार्थीको २/३ हजार रुपैयाँ बच्दा पनि राहत मिल्छ । अन्य सवारीमा छतमा जोखिम मोलेर लैजानुभन्दा खाली बस्ने विद्यालय र कलेजका गाडी प्रयोग गर्दा सुरक्षित नै हुन्छ,’ उनी भन्छन् ।

bikash samitte1696417545.jpg

प्याब्सनका पूर्वअध्यक्ष टीका पुरी पनि समितिको निर्णय अव्यावहारिक भएको टिप्पणी गर्छन् । सरोकारवाला निकायसँग छलफल नै नगरी समितिले गरेको निर्णयमा उनी असहमत छन् । ‘स्टेकहोल्डरसँग छलफल गर्नुपर्‍यो । निजी सम्पत्ति हो । कसैले म सुप्रिम छु भनेर गरेको निर्णय लागू हुँदैन,’ उनी भन्छन् ।

विद्यालय/कलेजका गाडी सार्वजनिक यातायातजस्तो यात्रु बोक्ने नभएकाले समितिको निर्णय कार्यान्वयन गर्न नसकिने उनी बताउँछन् । ‘हाम्रा गाडी प्यासेन्जर बोक्ने होइन, नजिकका विद्यार्थीलाई स्कुल/कलेजसम्म पुर्‍याउनका लागि हो । लामो दूरीमा चलाउन टायर सानो हुन्छ । इञ्जिन पनि छोटो दूरीको हुन्छ । लामो दूरीमा चलाउने निर्णय व्यावहारिक छैन,’ उनले भने, ‘साना विद्यार्थी बस्ने सिटमा ठूला अभिभावक राख्न पनि मिल्दैन ।’

आपत्कालीन समयमा भने आफूहरूले गाडी चलाएको बताउँदै उनले फेरि पनि त्यस्तो स्थिति भएमा चलाउन सकिने उनको मत छ । ‘भूकम्पको समयमा हामीले काठमाडौंबाट जिल्लाजिल्लामा मानिस पुर्‍याएका छौँ । यो आपत्कालीन समय पनि होइन,’ उनी भन्छन् । समितिले दसैँमा सेना, प्रहरी, निजामतीलगायतका गाडी पनि प्रयोग गर्न सकिने सुझाव भौतिक पूर्वाधार तथा यातायात मन्त्रालयलाई दिएको छ ।

मन्त्रालयले यस विषयमा सरोकारवालासँग छलफल गर्ने बताएको छ । ‘हामीले मात्र भनेर विद्यालयको गाडी चलाउन सम्भव छैन । विद्यालयको गाडीबाट विद्यार्थी लैजाने विषयमा सरोकारवालसँग, प्रधानमन्त्री, गृहमन्त्रीसँग छलफल गर्छौं,’ मन्त्री प्रकाश ज्वालाले भने ।

समितिको निर्णयमा अभिभावकहरू भने सकारात्मक छन् । विगतमा पनि प्याब्सन एनप्याब्सनले यसरी गाडी चलाएकाले दसैँमा पनि चलाउन सकिने अभिभावहरूको सुझाव छ । ‘सार्वजनिक निजी साझेदारीको राम्रो स्वरुप हो । निजीले सहयोग गर्‍यो भन्ने सन्देश पनि जान्छ । यसलाई कार्यान्वयन गर्न सक्यो भने राम्रो हो,’ अभिभावक महासंघका अध्यक्ष सुप्रभात भण्डारी भन्छन् ।

सम्बन्धित समाचार