प्रचण्ड सरकारमा दोस्रोपटक 'इन्ट्री' गर्दै जनमत, माओवादीले मोदीलाई फिर्ता बोलायो

प्रचण्ड सरकारमा दोस्रोपटक 'इन्ट्री' गर्दै जनमत, माओवादीले मोदीलाई फिर्ता बोलायो

A+ A A-

आइतबार प्रधानमन्त्री निवास बालुवाटारमा बसेको माओवादी केन्द्रको पदाधिकारी बैठकले संघीय मामिला तथा सामान्य प्रशासनमन्त्री अमनलाल मोदीलाई सरकारबाट फिर्ता बोलाउने निर्णय गर्‍यो ।

माओवादीले मोदीलाई फिर्ता बोलाएर जनमतका लागि ठाउँ खाली गराएको हो । जनमतले यसअघि नै अनितादेवी साहलाई मन्त्री बनाउन सिफारिस गरिसकेको छ ।

यसअघि प्रचण्ड नेतृत्वको सरकारमा जनमतका अब्दुल खान मन्त्री बनेका थिए । तर, आफूहरूले भनेको मन्त्रालय नपाएको भन्दै जनमत सरकारबाट बाहिरिएको थियो । जनमतले त्यसबेला उद्योग, वाणिज्य तथा आपूर्ति र कृषि तथा पशुपक्षी विकासमध्ये एक मन्त्रालय पाउनुपर्ने अडान राख्दै आएको थियो ।

तर, तत्कालीन सत्तासाझेदार एमालेसँगको भागवण्डा मिलाउन प्रचण्डले जनमतका खानलाई खानेपानी मन्त्रालयको जिम्मेवारी दिएका थिए । उक्त मन्त्रालय पाएसँगै असन्तुष्ट खान केही साता मन्त्रालय नै गएका थिएनन् । जनमतको उक्त असन्तुष्टि जनाउन प्रचण्डले केही दिन कुर्न आश्वासन दिएका थिए । तर, प्रचण्डले आफ्नो अपेक्षा पूरा गर्न नसकेपछि जनमत सरकारबाट बाहिरिएको थियो ।

माओवादीले मोदीलाई फिर्ता बोलाएसँगै संघीय मामिला तथा सामान्य प्रशासन मन्त्रालय खाली भएको छ । तर, जनमतको रोजाइ भने विकासे मन्त्रालय रहेको छ । केही दिनअघि शिलापत्रसँग कुरा गर्दै खानले विकासे मन्त्रालय कांग्रेससँग भएकाले माओवादीले खाली गरेको मन्त्रालय कांग्रेससँग साटफेर हुन सक्ने बताएका थिए । खानले भनेअनुसार भए कांग्रेसे पाएको उद्योग मन्त्रालय जनमतले पाउनेछ भने अहिलेका उद्योगमन्त्री रमेश रिजाल सामान्य प्रशासनमन्त्री बन्नेछन् ।

त्यसो त नेकपा एसभित्र कृषिमन्त्री बेदुराम भुसालले प्रभावकारी काम गर्न नसकेको गुनासो बढेको छ । उनलाई फिर्ता बोलाउनुपर्नेसम्मको आवाज उठेको छ । यस्तो अवस्थामा प्रेम आले, किसान श्रेष्ठ, धनबहादुर बुढालगायतको टिम भुसाललाई फिर्ता गरेर आफूहरूमध्ये कोही मन्त्री हुने लबिङमा छन् । उनीहरूको चाहना कृषि मन्त्रालयभन्दा पर्यटन मन्त्रालयमा देखिन्छ । त्यसैले एसका मन्त्री पनि फिर्ता हुने स्थिति आए पर्यटनमन्त्री सुदन किराँती सरुवा हुन सक्नेछन् ।

त्यसो त कांग्रेसभित्र गृहमन्त्रालयबाट नारायणकाजी श्रेष्ठलाई हटाउनुपर्ने आवाज उठिरहेको छ । कांग्रेसले प्रधानमन्त्री प्रचण्डमाथि निरन्तर दबाब बढाउन थालेपछि मन्त्रिमण्डल पुनर्गठन गर्दा धेरै मन्त्रीको जिम्मेवारी हेरफेर हुने सम्भावना देखिन्छ ।

प्रकाशित मिति: आइतबार, साउन २८, २०८० १८:३०