संविधान दिवसलाई लिएर प्रदेश २ सरकारमा खटपट

A+ A A-

संविधान दिवस मनाउने वा नमनाउने विषयमा प्रदेश दुई सरकारका मन्त्रीहरु नै विभाजित देखिएका छन् । सत्तारुढ समाजवादी पार्टीका तर्फबाट मन्त्री बनेकाहरू संविधान दिवस मनाउने पक्षमा छन् भने सत्ता साझेदार दल राष्ट्रिय जनता पार्टी नेपालतर्फबाट मन्त्री बनेकाहरू संविधान दिवसलाई कालो दिन मान्नुपर्ने अडानमा रहेका छन्

राजपाले संविधान दिवसलाई कालो दिवसकै रुपमा मनाउने निर्णय गरेपछि प्रदेश दुई सरकारमा सहभागी राजपाका मन्त्रीहरु समेत पार्टीकै लाइनमा अगाडि बढ्ने बताउँछन् ।

यता, समाजवादी पार्टीका मन्त्रीहरुले भने पार्टीको निर्णय जे आए पनि प्रदेश सरकारले आफ्नो हिसाबले निर्णय लिने बताएका छन् ।

राजपाका नेतासमेत रहेका प्रदेश २ का भौतिक पूर्वाधार तथा विकासमन्त्री जितेन्द्र सोनलले प्रदेश दुई सरकारले ३ असोजमा संविधान दिवस मनाउनेबारे आफूलगायत राजपाका कुनै मन्त्रीलाई जानकारी नगराइएको बताए । उनले भने, ‘प्रदेश दुई सरकारको मन्त्रिपरिषदबाट जुन दिन संविधान दिवस भव्यतापूर्वक मनाउने निर्णय भएको थियो त्यो दिन न म उपस्थित थिएँ न राजपाका हाम्रा साथीहरु नै ।’

उनले संविधान संशोधनको मुद्दा यथावत नै रहेकोले यथास्थितिमा संविधान दिवसका दिन हर्ष गर्नसक्ने स्थिति नरहेको बताए । उनले भने, ‘जुन संविधान जारी गर्नका लागि मधेसी जनतामाथि लाठी चार्ज गरियो, कर्फ्यु लगाइयो, गोली चलाइयो त्यो संविधानका विभेदपूर्ण बुँदा संशोधन नभएसम्म हामी कालो दिवसकै रुपमा मनाउँछौँ ।’

संघ सरकारका एक मन्त्रीले संविधान दिवसकोे विरोध गर्नेलाई कारबाही गर्छौं भनेका छन् नि भन्ने प्रश्नमा मन्त्री सोनलले भने, ‘आवाज उठाउँदैमा कारबाही गर्ने ? हिम्मत छ भने कारबाही गरेर देखाओस् ।’

यता, प्रदेश सरकारका आन्तरिक मामिला तथा कानूनमन्त्री ज्ञानेन्द्रकुमार यादवले भने, ‘प्रदेश सरकारले संविधान दिवस त मनाउँछ तर उत्साहपूर्वक होइन ।’

उनले प्रदेश सरकारले संविधान दिवस मनाउने निर्णय गरेको दिन राजपाका मन्त्रीहरु अनुपस्थित रहेको स्वीकार गरे । यो निर्णयबारे उनीहरुलाई पनि जानकारी गराइने मन्त्री यादवको भनाइ छ । उनले भने, ‘संविधान दिवस मनाउँदैमा हामीले संविधान संशोधनको मुद्दा बिर्सिसकेका छौं भन्ने होइन । हामीले यो संविधानलाई आलोचनात्मक रुपमा स्वीकार गरेका छौं । यही संविधानको बलमा हामी सरकारको नेतृत्व गरिरहेका छौं, अनि संविधानको नाममा सपथ ग्रहण गरेर मन्त्री भएका छौं, त्यसैले संविधान दिवस मनाउनु हाम्रो नैतिकता हो ।’

समाजवादी पार्टीले संविधान दिवसको विरोध गर्ने निर्णय गर्यो भने के गर्नु हुन्छ प्रश्नमा मन्त्री यादवले भने, ‘पार्टीको निर्णय आएपछि मात्रै यस विषयमा हामीले विचार गर्छौं ।’

प्रकाशित मिति: शनिबार, भदौ २१, २०७६ ०४:५२