प्रदेश सरकार सहयोग रकम उठाउँछ, रेकर्ड राख्दैन

A+ A A-

गत वर्ष चैतमा बारा र पर्सामा भीषण हावाहुरी (टाेर्नाडाे)ले जनधनको अकल्पनीय क्षति गर्याे । त्यतिबेला देशविदेशबाट नेपालीहरूले निकै आर्थिक सहयोग गरे । तर, कसले कति रुपैयाँ दिए भन्नेबारे प्रदेश २ सरकार सरकारसँग तथ्यांक छैन । विपद् परेको बेला अलग खाता खोल्न समय नभ्याएकाले मुख्यमन्त्रीकै कार्यालयसहित विभिन्न मन्त्रालयको साझा खाता रहेको विविध खातामा रकम जम्मा गर्न भनिएको थियो तर ती खातामा जम्मा गरिएको रकममा अनियमितता भएको आशंका गरिएकाे छ ।

मुख्यमन्त्री लालबाबु राउतले आर्थिक सहयोग गर्न मुख्यमन्त्री राहत कोष खडा गरेर राष्ट्रिय वाणिज्य बैंकको खातामा रकम जम्मा गर्न अपिल गरेका थिए ।

त्यसमा सर्वसाधारणसहित विभिन्न प्रदेश सरकारले आर्थिक सहयोग गरेका थिए तर खातामा कसले कति रकम दाखिला गरे भन्नेबारे मुख्यमन्त्री तथा मन्त्रिपरिषद्को कार्यालयमा कुनै हिसाबकिताब छैन ।

राहतका लागि कति रकम जम्मा भयो भन्नेबारे पटक–पटक सूचना माग गर्न जाँदा मन्त्रालयले सूचना दिँदैन । मुख्यमन्त्री तथा मन्त्रिपरिषद् कार्यालयका लेखा अधिकृत जितेन्द्र यादवका अनुसार बैंक खातामा मन्त्रालयको नामसमेत किटान गरेर रकम दाखिला नगराइएकाले मन्त्रालयमा कति रकम आयो भन्नेबारे यकिन हिसाब हुन नसकेको हाे ।

प्रदेश कोष तथा लेखा नियन्त्रणको कार्यालयको नाममा समेत संयुक्त खाता रहेकाले रकमको हिसाब त्यहीँबाट मात्र प्राप्त गर्न सकिने भन्दै लेखा अधिकृत यादवले भने, ‘राष्ट्रिय वाणिज्य बैंकको गडबडीका कारण कुन व्यक्ति वा संस्थाले कुन मन्त्रालयका लागि कति रकम पठाए भन्ने कुरा खुल्नै सकेको छैन ।’

सबै मन्त्रालय र कार्यालयको कोड नम्बरअनुसार रकम खातामा दाखिला हुने गरेको छ । सोहीअनुसार कतिपय मानिसले मुख्यमन्त्री कार्यालयको लागि किटेरै रकम जम्मा गरेका छन, त्यसको हिसाब भए पनि अन्य रकममा समेत मुख्यमन्त्री कार्यालयको दाबी हुने हुनाले यकिन सहयाेग राशि कति भयो भन्ने कुरा खुलाउन नसकिएको जनाइएको छ ।

‘कतिपय मानिसले ई–सेवाबाट सोझै खातामा रकम जम्मा गरेका छन्, मन्त्रालयको वा कार्यालयको कोड नै उल्लेख नगरेर रकम दाखिला गरिएकाले समस्या भएको हो,’ लेखा अधिकृत यादवले भने ।

प्रदेश नम्बर १, ३ र ५ सरकारले १–१ करोड रुपैयाँ जम्मा गरेकाले ३ करोड रुपैयाँ र केही चानचुन रकमको आम्दानी मात्र मुख्यमन्त्री कार्यालयमा छ । बाँकी अन्य व्यक्ति र निकायबाट आएको आर्थिक सहयोगको हिसाब नै मुख्यमन्त्री कार्यालयसँग छैन ।

प्रदेश कोष लेखा नियन्त्रक कार्यालयका सूचना अधिकारीसमेत रहेका लेखा अधिकृत महेन्द्र मण्डलका अनुसार सबै मन्त्रालयको साझा खाताको रुपमा रहेको विविध खातामा २०७६ सालको असार मसान्तसम्ममा मुख्यमन्त्री कार्यालयको नाममा मात्रै ४ करोड ८६ लाख ५० हजार रुपैयाँ आम्दानी भएको छ । जसमध्ये ४ असार २०७६ साल २ करोड ५० लाख ८० हजार १ सय ९२ रुपैयाँ खातामा बाँकी रहेको देखिएको छ । बाँकी मितिको आम्दानीसमेत बाँध्न बाँकी नै रहेकाले उल्लेखित रकम नै अन्तिम भने नभएको मण्डलले बताए ।

२०७४ फागुन महिनामा ४ करोड ८६ लाख ५० हजार रुपैयाँ मौज्दात राखेर मुख्यमन्त्री राहत कोष स्थापना गरिएको थियो । यसअघि उक्त खाताबाट मधेस आन्दोलनका शहीद तथा घाइते परिवारलाई राहत रकम दिने गरिएको थियो ।

मुख्यमन्त्री कार्यालयले हालसम्म बारा र पर्साको हावाहुरीबाट ज्यान गुमाएका २४ जनाका परिवारलाई जनही ३ लाख २५ हजार रुपैयाँका दरले ७८ लाख रुपैयाँ राहत स्वरूप वितरण गरेको छ । हावाहुरीका घाइतेलाई वीरगञ्जस्थित अस्पतालले उपचार गरेबापत उपचार खर्च दिइएको छ ।

मुख्यमन्त्री कार्यालयका लेखा अधिकृत यादवका अनुसार नेसनल मेडिकल कलेज वीरगञ्जलाई ३१ लाख र वीरगञ्ज हेल्थ केयर सेन्टरलाई १० लाख रुपैयाँ दिइएको छ । ती अस्पतालले घाइतेलाई उपचार गरेको दाबी गर्दै बिलसमेत प्रस्तुत गरेको आधारमा उपचार खर्च दिइएको उनले बताए । गत वर्ष चैत्र १७ गते आएको हावाहुरीले ठूलाे क्षति गरेकाे थियो ।

प्रकाशित मिति: शनिबार, भदौ २१, २०७६ ०३:३७