सेनाद्वारा जनता आवासका ८ सय ६९ घर हस्तान्तरण

A+ A A-

बारा र पर्सामा गएको चैत १७ गते आएको हुरीबतासका कारण विस्थापितलाई घर पुनर्निर्माण गरी हस्तान्तरण गरिएको छ । सेनाले पुनर्निर्माण सम्पन्न गरेका ती घरहरूको प्रमाणपत्र प्रदेश २ का मुख्यमन्त्री लालबाबु राउतले सम्बन्धित महानगरपालिका, उप–महानगरपालिका, नगरपालिका र गाउँपालिकाका प्रमुखलाई हस्तान्तरण गरेका हुन् ।

नेपाली सेनाको जनता आवास कार्यदलले बारामा निर्माण गरेका ८ सय ७ र पर्सामा निर्माण गरेका ६२ वटा घर हुरीबतासपीडितलाई हस्तान्तरण गरिएको हो । हस्तान्तरण कार्यक्रममा कार्यवाहक प्रधानमन्त्री एवं रक्षामन्त्री ईश्वर पोखरेल, प्रधानसेनापति पूर्णचन्द्र थापा, रक्षा सचिव रेश्मीराज पाण्डेलगायत सहभागी थिए ।

सो अवसरमा कार्यवाहक प्रधानमन्त्री एवं रक्षामन्त्री पोखरेलले नेपाली सेनाले आफ्नो गौरवपूर्ण परम्पराको निरन्तरतालाई कायम राख्दै तोकिएको जिम्मेवारी समयमा नै सम्पन्न गरेको बताए । जनता आवास पुनर्निर्माणमा खटिएका सबैको उनले प्रशंसा गरे ।

कार्यक्रममा सर्वोत्कृष्ट कार्य सम्पादन गर्ने बाहिनी र गण तथा आपूर्तिकर्तालाई प्रशंसापत्रसमेत प्रदान गरियो । सम्बोधनकै क्रममा प्रदेश २ का मुख्यमन्त्री राउतले विपद् प्रभावितको पुनस्र्थापना र घर पुनर्निर्माण कार्यका लागि नेपाल सरकारलाई विशेष धन्यवाद दिए । नेपाली सेनाले मितव्ययितालाई ध्यानमा राखी समयमा कार्य कुशलताका साथ निर्माण कार्य सम्पन्न गरेकोमा उनले प्रधानसेनापतिलगायत सो कार्यमा खटिएका सकल दर्जाको सराहना गरेका थिए ।

कार्यक्रममा प्रधानसेनापति थापाले ‘राष्ट्र सबैभन्दा पहिला’ तथा ‘कर्तव्य सधैं पहिला’ भन्ने संस्थागत मान्यतालाई आत्मसात् गर्दै निर्दिष्ट जिम्मेवारीलाई सम्पन्न गर्न नेपाली सेना सदैव प्रतिबद्व रहेको बताए । उनले यस किसिमका विपत्तिमा नेपाली सेनाले भविष्यमा समेत आफ्नो जिम्मेवारी उत्कृष्ट ढंगबाट सम्पन्न गर्ने प्रतिबद्वता व्यक्त गरे ।

हुरीले बारा र पर्सामा ठूलो क्षति पुर्याएपछि गएको चैत २१ गते मन्त्रिपरिषद् बैठकले हुरीपीडितका लागि सरकारले नै घर निर्माण गरिदिने र सोको जिम्मा नेपाली सेनालाई दिने निर्णय गरेको थियो । सो निर्णयपछि बारा र पर्सामा आएको नेपाली सेनाले बैशाख २१ गते शिलान्यास भएपछि घर निर्माणको काम थालेको थियो । घर निर्माणका लागि बारामा मात्रै झण्डै ३ हजार सेना खटिएका थिए । सेना १२ समूह बनाएर घर निर्माणमा जुटेको थियो ।

सो हुरीबतासका कारण २९ जनाको मृत्यु भएको थियो भने १ हजारभन्दा बढी घरमा क्षति पुर्याएको थियो । क्षति संकलनमा नाम छुटेकाको घर निर्माण हुन सकेको छैन । नाम छुटेका कारण घर पाउनबाट वञ्चित पीडित अझै टेन्टमा बस्न बाध्य छन् । बारामा मात्रै ५ सय ५६ जनाको नाम छुटेको भन्दै विरोध प्रदर्शनसमेत भएको थियो । सामान्य क्षतिभन्दा पनि पूर्ण रूपमा घरविहीन बनेका पीडितको तथ्यांक संकलन गरी घर निर्माणको कामलाई दोस्रो चरणमा अघि बढाइने बताइएको छ ।

पुनर्निमाण गरिएका घरमा दुई कोठा, एक भान्सा, एक शौचालय र बरण्डा रहेको नेपाली सेनाले बताएको छ ।

प्रकाशित मिति: बिहीबार, भदौ १९, २०७६ ०५:३८