कार्यक्रममा भीड नभएको भन्दै रिसाए मन्त्रीे

A+ A A-

मन्त्रीहरू सहभागी हुने कार्यक्रममा भीड घट्न थालेपछि उनीहरू आयोजकमाथि नै रिसाउन थालेका छन् । कतिसम्म रिसाउँछन् भन्ने उदाहरण मंगलवार जनकपुरधाममा आयोजित एक कार्यक्रममा देखिएको छ । भौतिक पूर्वाधार तथा यातायातमन्त्री रघुवीर महासेठले जनकपुरधामको एउटा कार्यक्रममा सहभागी हुँदा त्यहाँ भीड कम भएपछि रिसाएर कार्यक्रमलाई सम्बोधन नै नगरी फर्किएका छन् ।

मन्त्री महासेठ गणेश युवा कमिटीको अगुवाइमा नवनिर्मित गणेश प्रतिमाको प्राणप्रतिष्ठा कार्यक्रममा सहभागी हुन मंगलवार जनकपुरधाम आएका थिए । उनले पूजनोत्सवमा सहभागी भए पनि सोही ठाउँमा आयोजित सभालाई सम्बोधन गरेनन् ।

समारोहमा सहभागी एक जनाले स्थानीय मिडियाहरूको उपस्थिति उक्त कार्यक्रममा भए पनि मन्त्रीले केही नबोली हिँडेको अनुमान गरिएको बताएका छन् ।

ती सहभागीले भने, ‘दर्शक कम भएकाले मन्त्री महासेठले कार्यक्रमलाई सम्बोधन नै नगरी फर्किएको भए पनि आयोजकले भने अत्यधिक गर्मीका कारण कार्यक्रम स्थगित गरिएको दाबी गरेको छ ।’

आयोजक संस्थाका सञ्जयकुमार साहले भने, ‘अत्यधिक गर्मीका कारण सहभागीहरूलाई कठिनाइ हुने भएकाले मन्त्रीज्यूले कार्यक्रमलाई सम्बोधन गर्नुभएन ।’

अरु दिनभन्दा सो दिन मौसम आयोजकले बताएजस्तो अत्यधिक गर्मी थिएन । स्रोतका अनुसार सहभागी कम भएको भन्दै मन्त्री महासेठ रिसाएका थिए ।

रामचोकस्थित धनुषसागरको पश्चिमी घाटमा नवनिर्मित गणेश मन्दिरको उद्घाटन तथा गणेश प्रतिमाको प्राणप्रतिष्ठा कार्यक्रममा सहभागी हुन मन्त्री महासेठ मंगलवार १ बजे पुग्दा आयोजक संस्थाका केही सदस्यहरूबाहेक अन्यको उपस्थिति अत्यन्त न्यून थियो । मन्त्री महासेठले न्यून सहभागितालाई दृष्टिगत गरी पहिले पूजाअर्चना गर्न निर्देशन दिए । मन्त्री महासेठले पूजापाठमा झण्डै ४५ मिनेट बिताए पनि सहभागी नबढेपछि बोली फर्किएका थिए ।

मन्त्री महासेठको यो व्यवहारपछि समाजिक सञ्जालमा निकै प्रतिक्रियाहरू आएका छन् । जानी खान मधेशीले लेखेका छन्, ‘चुनावको बेला पैसाले तपाईं जितिहाल्नु भो तर विकासको काम नगरेपछि जनताको यस्तै प्रतिक्रिया आउँछ ।’

प्रकाशित मिति: बिहीबार, भदौ १९, २०७६ ००:४२