भारत-चीन सीमा विवाद: अरुणाचल पुगेर भारतीय गृहमन्त्रीले भने– हाम्रो भूमि कसैले मिच्न सक्दैन (भिडिओ)

भारत-चीन सीमा विवाद: अरुणाचल पुगेर भारतीय गृहमन्त्रीले भने– हाम्रो भूमि कसैले मिच्न सक्दैन (भिडिओ)

A+ A A-

पछिल्ला केही वर्षयता भारत र चीनबीच सीमा विवादका कारण सम्बन्ध तनावपूर्ण रहँदै आएको छ ।

सन् २०२० को जुन १५ मा त दुवै देशका सेनाबीच हिंस्रक झडप नै भएको थियो । दुवै राष्ट्रले दाबी गर्दै आएको लद्दाख नजिकैको लाइन अफ एक्चुअल कन्ट्रोलको गलवान उपत्यकामा झडप हुँदा २० भारतीय सेना र ५ चिनियाँ सेनाको ज्यान गएको थियो ।

अहिले फेरि चीनले भारतको अरुणाचल प्रदेशको विभिन्न ११ स्थानको नाम परिवर्तन गरिदिएपछि सीमा क्षेत्रमा गतिरोध झनै बढ्ने देखिएको छ । चीनले भारतको अरुणाचल प्रदेशलाई मान्यता दिँदैन । उसले अरुणाचल प्रदेशलाई दक्षिण तिब्बती क्षेत्र र जंगनान प्रान्त भन्ने गरेको छ ।

यसरी भारतीय भूभागलाई आफ्नो भूमि भन्दै चीनले धाबा बोलेपछि यसैहप्ता भारतका केन्द्रीय गृहमन्त्री अमित शाहले अरुणाचल प्रदेशको भ्रमण गरेका छन् ।

शाहले सो क्रममा चीनको नाम नलिई भारतको एक इन्च भूभाग पनि कसैले कब्जा गर्न नसक्ने बताएका छन् । चिनियाँ सीमा नजिकैको अन्जा जिल्लामा शाहले भनेका छन्,‘अरुणाचल प्रदेश हाम्रो हो र यहाँको एक इन्च जमिन पनि कसैले कब्जा गर्न सक्दैन ।’

भिडिओ

गतहप्ता नै भारतको विदेश मन्त्रालयले चिनियाँ दाबी खारेज गर्दै भनेको थियो, ‘चीनले पहिलोपटक यस्तो कार्य गरेको होइन । हामी चिनियाँ कार्य अस्वीकार गर्दछौँ । अरुणाचल भारतको हिस्सा हो, थियो र सँधै रहनेछ । अवैध प्रयासले तथ्य परिवर्तन हुँदैन ।’

भारतको यो जवाफलाई निकै कमजोर र उदार मानिएको थियो । त्यसपछि नै भारतीय गृहमन्त्री अरुणाचल पुगेका हुन् ।

भारतीय गृहमन्त्रीले अरुणाचलको भ्रमण गरेपछि यतिबेला चिनियाँ सरकारका प्रवक्ता वाङ वेनबिनले सो भ्रमणको विरोध जनाएका छन् । वेनबिनले भनेका छन्,‘जंगनान चिनियाँ भूमि हो । भारतीय अधिकारीहरुले त्यहाँ भ्रमण गर्नु चीनको सार्वभौमिकतामाथिको प्रहार हो । सीमावर्ती अवस्थाको शान्ति र स्थायित्वको लागि भारतीय गृहमन्त्रीको भ्रमण अनुकूल छैन ।’

अरुणाचल भ्रमणका क्रममा शाहले चार हजार ८ सय करोड भारतीय रुपियाँको कार्यक्रम पनि सार्वजनिक गरेका छन् । उनले त्यहाँको गाउँलाई सुविधा सम्पन्न बनाउने र केन्द्र सरकारले सो क्षेत्रलाई प्राथमिकताका साथ हेर्ने पनि जनाएका छन् । एनडीटीभीको सहयोगमा