नामकरणका कारण कोशी प्रदेश अशान्त, शतप्रतिशत मत पाउने प्रचण्डको भनाइ (भिडियो)

नामकरणका कारण कोशी प्रदेश अशान्त, शतप्रतिशत मत पाउने प्रचण्डको भनाइ (भिडियो)

A+ A A-

प्रदेशको नामकरणको विषयलाई लिएर कोशी प्रदेशमा आन्दोलन चर्किएको छ । आइतबार प्रदेशको नामको विरुद्धमा भएको प्रदर्शनमा प्रहरीले हवाई फायर गरेको छ । आन्दोलन उग्र बनेपछि विराटनगरमा हवाई फायर भएको हो । प्रदर्शनकारीले रोडशेष चौकमा जिल्ला प्रशासन कार्यालयले जारी गरेको निषेधाज्ञा तोडेपछि प्रहरीले चार राउन्ड हवाई फायर गरेको थियो । प्रदर्शन नियन्त्रणमा लिन प्रहरीले केही राउन्ड अश्रुग्याससमेत प्रहार गरेको थियो ।

प्रधानमन्त्री पुष्पकमल दाहाल 'प्रचण्ड'ले प्रतिनिधिसभाबाट यसपटक आफूले शतप्रतिशत सांसदहरूको विश्वासको मत पाउने आशा राखेको टिप्पणी गरेका छन् । प्रधानमन्त्री प्रचण्डले ६ चैतमा प्रतिनिधिसभाबाट विश्वासको मत लिँदैछन् । सोहीबारेमा आइतबार संसद भवनमा प्रतिक्रिया दिँदै प्रचण्डले यस्तो टिप्पणी गरेका हुन् । 'मैले आशाको कुरा गर्दा त पहिला विश्वासको मत लिँदा ९९.२५ थियो । भोलि १०० नै हुन्छ भन्ने आस छ,' उनले भने ।

त्यस्तै, सभामुख देवराज घिमिरेले ‘पत्रकारहरू बिक्रीमा छन्’ भनेर दिएको अभिव्यक्तिप्रति संसद बैठकमा प्रश्न उठेको छ । शुक्रबार आफूलाई भेट्न आएका नेपाल पत्रकार महासंघका प्रतिनिधिमण्डलसँगको कुराकानीमा सभामुख घिमिरेले पत्रकारहरू बिक्रीमा रहेको अभिव्यक्ति दिएका थिए । सभामुखको सोही अभिव्यक्तिलाई लिएर आइतबारको संसद बैठकमा सांसदहरूले प्रश्न उठाएका हुन् । नेपाली कांग्रेसका सांसद रामहरि खतिवडा तथा नेमकिपाका सांसद प्रेम सुवालले प्रश्न उठाए । त्यस्तै संसद भवनबाट बाहिरिँदै गर्दा कांग्रेस महामन्त्री विश्वप्रकाश शर्माले पनि यसबारेमा टिप्पणी गरेका छन् ।

उता, नेकपा (क्रान्तिकारी माओवादी) का महासचिव मोहन वैद्य किरणले प्रधानमन्त्री प्रचण्डले जनताको विश्वास गुमाइसकेको दाबी गरेका छन् । राजनीतिमा विचित्रको ‘लीला’ देखाउन थालेकाले प्रधानमन्त्री प्रचण्डलाई नेपाली जनताले अब विश्वास गर्ने ठाउँ नरहेको उनको जिकिर थियो । इच्छुक सांस्कृतिक प्रतिष्ठानले आइतबार काठमाडौंमा आयोजना गरेको एक कार्यक्रममा बोल्दै महासचिव वैद्यले ओलीलाई खत्तम पार्छु भनेर लाग्ने, फेरि ओलीको शरणमा परेर सरकार बनाउने तर टिकाउन नसकेर प्रधानमन्त्री प्रचण्डले जनतामा केही हुन्छ कि भन्ने विश्वासलाई पनि ध्वस्त पारिदिएको आरोप लगाए ।

उता प्रतिनिधिसभा बैठकमा ‘बेपत्ता पारिएका व्यक्तिको छानबिन, सत्यनिरुपण तथा मेलमिलाप आयोग (तेस्रो संशोधन) विधेयक, २०७९’ पेस गरिएको छ । प्रतिनिधिसभाको आइतबारको बैठकमा प्रधानमन्त्री एवं कानुन, न्याय तथा संसदीय मामिलामन्त्री पुष्पकमल दाहाल ‘प्रचण्ड’का तर्फबाट सञ्चार तथा सूचना प्रविधिमन्त्री रेखा शर्माले ‘बेपत्ता पारिएका व्यक्तिको छानबिन, सत्य निरुपण तथा मेलमिलाप आयोग (तेस्रो संशोधन) विधेयक, २०७९’ पेस गरिन् । यो विधेयक दुवै आयोगको २०७१ को ऐनलाई प्रतिस्थापन गर्न ल्याइएको हो ।

साताको पहिलो कारोबार दिन नेप्से परिसूचक गिरावट भएको छ । आइतबार नेप्से परिसूचक ६.९० अंक घटेर १९२६.४० बिन्दुमा झरेको हो । त्यस्तै, सेन्सेटिभ इण्डेक्स १.५२ अंकले घटेको छ भने फ्लोट इण्डेक्स ०.५८ अंक र सेन्सेटिभ फ्लोट इण्डेक्स ०.६६ अंकले घटेको छ । आइतबार कारोबारमा आएका २५९ कम्पनीको ३१ लाख ६३ हजार कित्ता शेयर १ अर्ब ६ करोड ९८ लाख ४ हजार रुपैयाँ बराबरको खरिदबिक्री भएको छ । अघिल्लो कारोबारको तुलनामा आइतबार कारोबार रकमसमेत गिरावट भएको छ । बिहीबार नेप्सेमा १ अर्ब १४ करोडको शेयर खरिदबिक्री भएको थियो ।

प्रकाशित मिति: आइतबार, चैत ५, २०७९ १९:४६