चुनाव हारेका घनश्याम भुसाल भोलि नेकपा एकीकृत समाजवादी प्रवेश गर्दै

A+ A A-

अन्तत: घनश्याम भुसाल नेकपा एकीकृत समाजवादी प्रवेश गर्ने भएका छन् । भुसाल मंसिर ४ गते भएको प्रतिनिधिसभा चुनावमा नेकपा एमाले परित्याग गरी रुपन्देही १ बाट स्वतन्त्र चुनाव लडेका थिए । भोलि भुसाल एक कार्यक्रमकाबीच नेकपा एस प्रवेश गर्ने कार्यक्रम तय भएको नेकपा एसका एक पोलिटब्युरो सदस्यले जानकारी दिए । भुसाललाई स्वागत गर्न नयाँ बानेश्वरस्थित हाेटल अर्यालमा कार्यक्रम गरिँदैछ ।

एमाले स्थायी कमिटी सदस्य रहेका भुसालले मंसिर ४ गते भएको प्रतिनिधिसभाको निर्वाचनमा पार्टीबाट टिकट पाएका थिएनन् । तत्कालीन नेपाली कांग्रेस नेतृत्वको सत्ता गठबन्धनले समर्थन गरे पनि उनले चुनाव जित्न सकेनन् । उनले चुनाव नेकपा एमालेका सचिव छविलाल विश्वकर्मासँग हारेका थिए ।

तत्कालीन सत्तागठबन्धनको सहयोगमा पनि चुनाव जित्न नसकेका भुसाल अब कता जान्छन् के गर्छन् भन्ने अड्कल बाजी भइरहेको थियो । तर, केही दिन पहिला उनले नेकपा एसलाई आफ्नो धारणा लिखित रूपमा नै बुझाए ।

नेकपा एसका अध्यक्ष माधवकुमार नेपालले उनलाई शुक्रबार पार्टीमा स्वागत गर्ने कार्यक्रम छ । ती पोलिटब्युरो सदस्यका अनुसार नेता भुसाल नेकपा एसको पदाधिकारीको जिम्मेवारी पाउने सर्तमा पार्टीमा आउन लागेका हुन् । तर, कुन पद भन्ने विषयमा भने टुंगो लागिसकेको छैन । ती सदस्यले भने, ‘पार्टी आएपछि उनको पदका बारेमा छलफल हुन्छ । अहिले नै यही पद दिने भन्ने भएको छैन । आवश्यक परे महासचिव नै दिन सकिन्छ ।’

मार्क्सवाद, अर्थतन्त्रको विश्लेषण तथा अध्ययनमा विशेष रुचि राख्ने नेता भुसाल गत वर्ष मंसिरमा सम्पन्न भएको नेकपा एमालेको १०औँ महाधिवेशनमा उपाध्यक्षमा पराजित भएका थिए । माधवकुमार नेपाल पक्षले नेकपा एमाले विभाजन गरेर नेकपा एकीकृत समाजवादी गठन गर्दा पनि भुसाललगायत १० जना नेताहरू एमालेमा नै बसेका थिए । एमालेमा बसेका नेपाल निकट मानिएका नेताहरू १० बुँदे सम्झौता गरी एमालेमै बसेका थिए ।

तर, चुनावमा भुसालसहित नेता भीम रावललाई एमाले अध्यक्ष केपी शर्मा ओलीले टिकट दिएनन् । टिकट नपाए पनि नेता रावल एमालेमै बसेका छन् भने भुसालले तत्काल पार्टी परित्याग गरेको घोषणा गरेका थिए ।

चुनाव हारेपछि पार्टी खोजे

एमालेबाट चुनावमा टिकट नपाएपछि भुसालले स्वतन्त्र उम्मेदवारी दिए । उनले स्वतन्त्र उम्मेदवारी दिएपछि तत्कालीन सत्ता गठबन्धनले सहयोग गर्‍यो । तत्कालीन सत्ता गठबन्धनमध्येको एक माओवादी केन्द्रले आफ्नाे गोलाकारभित्रको हँसिया हथौडा चुनाव चिह्नमा चुनाव लड्न आग्रह गरेको थियो । तर, भुसालले अस्वीकार गरेका थिए । भुसालले माओवादीको चुनाव चिह्नमा चुनाव नलड्ने भनेपछि माओवादीको भ्रातृ संगठन वाईसीएलले भुसाललाई चुनावमा किन सहयोग गर्ने भन्दै असन्तुष्टि जाहेर गरेको थियो । तर, चुनामा तत्कालीन गठबन्धनले सहयोग गरेको थियो । तर, उनी पराजित भए ।

माओवादी र नेकपा एसको चुनाव चिह्नमा चुनाव लड्न नमानेका भुसाल चुनाव हारेको दुई महिना नबित्दै नेकपा एसमा प्रवेश गर्न लागेका हुन् । एमालेमा भुसालकाे एक टिम थियाे । तर, अहिले त्याे टिम तिरतबितर भएको छ । कोही एमालेमा नै छन् । कोही चुनावमा माओवादीको चुनाव चिह्न लिएर चुनाव लडेका थिए ।

भुसाल भोलि नेकपा एसमा भने एक्लै प्रवेश गर्न थालेका युवा संघका महासचिव दीपक जीएमले बताए ।

भुसाललाई नेकपा एसमा महासचिव बनाउने गरी प्रवेश गराइने बताइएको छ । नेकपा एकीकृत समाजवादीले कम्युनिस्ट नेता घनश्याम भुसाललाई छिटोभन्दा छिटो पार्टीमा आउन आग्रह गरेको छ ।

बुधबार महासचिव बेदुराम भुसालले घनश्यामलाई एक पत्र लेखी एकीकृत समाजवादीमा आबद्ध भई नेपाली कम्युनिस्ट आन्दोलनको पुनर्गठन र रुपान्तरणको अभियानमा सहभागी हुन आग्रह गरेका थिए ।

प्रकाशित मिति: बिहीबार, पुस २८, २०७९ १६:०२