जब प्रचण्ड ओली र देउवा एकसाथ विश्वासको मत दिन उभिए

A+ A A-

संसदीय इतिहासमा विरलै देखिने रोचक दृश्य मंगलबार प्रतिनिधिसभामा देखियो । जहाँ शक्तिशाली प्रतिपक्षी थिएन । सबैलाई लागेको थियो, नेपाली कांग्रेस प्रतिपक्षीमा बस्ने छ । तर प्रधानमन्त्री पुष्पकमल दाहाल प्रचण्डले विश्वासको मतको प्रास्ताव राखेसँगै नेपाली कांग्रेसका सभापति शेरबहादुर देउवाले रोस्टममा उभिएर सरकारलाई विश्वासको मत दिने उद्घोष गरे । यो सँगै संसद खरो प्रतिपक्षीविहीन बन्न पुग्यो ।

रोचक त के थियो भने विश्वासको मत दिने समयमा प्रधानामन्त्री प्रचण्ड, एमाले अध्यक्ष केपी ओली र कांग्रेस सभापति शेरबहादुर देउवा मुस्कुराउँदै एकले अर्कोलाई हातको इसाराले विश्वसको मत दिने कक्षमा सँगै जान बोलाइरहेका थिए । ओलीले देउवालाई हातको इसाराले बोलाइरहेका थिए भने देउवाले प्रचण्डलाई हात मिलाएर तानिरहेका थिए । तीन शीर्ष नेता एकसाथ उभिएर प्रधानान्त्रीलाई विश्वासको मत दिएको दृश्य हेर्न लायक थियो । यस्तो दृश्य संसदीय इतिहासमा विरलै देख्न पाइन्छ । यसअघि २०५१ सालमा पनि कांग्रेसले एमालेका मनोमहन अधिकारी नेतृत्वको सरकारलाई विश्वासको मत दिएको थियो । २८ वर्षपछि कांग्रेसले फेरि दोहोर्‍यायाे ।

संसद्मा शक्तिशाली प्रतिपक्षी नभएको भन्दै कांग्रेसको आलोचाना भइरहेको छ । संसदीय अभ्यासको मान्यता सत्तापक्ष र प्रतिपक्षी हो । आजको दृश्य अनौठो घटना भएको सांसदहरू नै बताउँछन् ।

‘नेपालमा आज विचित्र के भयो भने भएभरका सबै सरकारमा सामेल हुने, सरकारलाई समर्थन गर्ने भनेर लागेका छन्, यहाँभन्दा हाइसन्चो अरु के हुन्छ । सत्ता पक्षमा बस्नेलाई यहाँ भन्दा आनन्द के हुन्छ ? यो कुन किसिमको समर्थन हो । मैले बुझ्न सकिनँ,’ सांसद तथा राष्ट्रिय जनमाेर्चाका अध्यक्ष चित्रबहादुर केसीले भने । संसद्मा डरलाग्दो दृश्य देखिएको उनले टिप्पणी गरे । ‘आफ्ना गल्ती पन्छाउन र एउटालाई सरकारबाट पन्छाएर आफू आउने खेल त होइन यो । यसो गरेर देश बन्छ ? सरकार चल्छ ? यस खालको दृश्य डरलाग्दो छ,’ उनले भने ।

तर कांग्रेसले संविधानको रक्षाका लागि विश्वासको मत दिएको दाबी गरेको छ । ‘संविधानको रक्षाका लागि उभिनुहुनेछ भन्ने विश्वासका साथ प्रधानमन्त्री प्रचण्डलाई कांग्रेसले विश्वासको मत दिने निर्णय गरेको छ,’ रोस्टममा उभिएर सभापति देउवाले भने । विश्वासको मत दिए पनि सरकारमा सहभागी नहुने प्रतिपक्षीमै बस्ने देउवाले बताए । ‘सरकारमा सहभागी हुनेछैनौँ, जिम्मेवार प्रतिपक्षका रूपमा रहन्छौँ’, उनले भने ।

रित्तो हात भएर पनि कांग्रेसले किन दियो सरकारलाई विश्वासको मत ?

कांग्रेसले विश्वासकोमत दिनुमा शंका रहेको एमाले अध्यक्ष ओलीले पनि टिप्पणी गरे । 'कांग्रेसले समर्थन गरेको छ, म धन्यवाद भन्न चाहन्छु’, उनले भने, ‘यदि यो समर्थनभित्र सदासयताबाहेक अरु कुरा छैन भने कुनै जाल होइन भने ढोक्सा होइन् भने स्वागतयोग्य छ । ढोक्सा हो भने म भन्न चाहन्छु, माछा नभएको खोलामा फ्याँकेजस्तै हुनेछ जाल ।’

एमाले अध्यक्ष ओलीले कांग्रेसको समर्थनभित्र भोलिका निम्ति अरु खालका कुरा सोचिएको भए त्यो ढोक्सा रित्तै हुने बताए । ‘सदासयताबाहेक अरु केही भोलिका निम्ति सोचिएको छ भने त्यो ढोक्सा रित्तै हुनेछ । किनभने त्यस खोल्सीतिर कुनै माछा बग्ने छैन,’ उनले भने । विश्वासको मत दिएर पनि प्रतिपक्षीको भूमिका निभाउने परम्परा रहेको बताउँछन् संसद सचिवालयका पूर्वमहासचिव सूर्यकिरण गुरूङ । २०५१ सालको घटना स्मरण गराउँदै उनले भने, ‘विश्वासको मत दिएर सरकारमा सामेल हुने कुरा एउटा भयो । विश्वासको मत दिएर प्रतिपक्षीमा बस्ने अर्को कुरा हो । यो परम्पार छ ।’

prachanda samsad (1)1673336809.jpg

कांग्रेसको समर्थनमा ओलीको आशंका- जाल हो भने माछा नभएको खोलामा फ्याँकेजस्तै हुनेछ

तर यसलाई संविधानविदहरूले भने कांग्रेसले नैतिक मूल्य नष्ट गरेको टिप्पणी गरेका छन् । ‘संसदीय शासन प्रणालीमा प्रतिपक्षी दलले परेको बेला वैकल्पिक सरकार दिन सक्ने र सरकारलाई संसद्प्रति जवाफदेही बनाउन सक्ने सामर्थ राखेको हुन्छ। विश्वासको मतको सरकारी लाइनमा उभिनु उसको संवैधानिक धर्म होइन। कांग्रेसले प्रतिपक्षी दलको सबै राजनीतिक,संवैधानिक र नैतिक मूल्य नष्ट गर्‍याे,’ संविधानविद् भिार्जुन आचार्य भन्छन् ।

संसद् बैठकमा उपस्थित २७० सांसदमध्ये २६८ जनाले प्रधानमन्त्री प्रचण्डलाई विश्वासको मत दिएका छन् । राष्ट्रिय जनमोर्चाका चित्रबहादुर केसी र नेपाल मजदुर किसान पार्टीका प्रेम सुवालले भने विपक्षमा मतदान गरे । ज्येष्ठ सदस्य पशुपतिशमशेर जबरा सभामुखको भूमिकामा रहेकाले मतदानमा सहभागी भएनन् । कांग्रेसका सांसदहरू किशोरसिंह राठौर, अम्बिका बस्नेत र मनोरमा शेरचन भने बैठकमा अनुपस्थित भए । कांग्रेसकै अर्का सांसद टेकबहादुर गुरुङ निलम्बनमा छन् ।

प्रधानमन्त्री प्रचण्डलाई कांग्रेस, एमाले, माओवादी, राष्ट्रिय स्वतन्त्र पार्टी, राप्रपा, जसपा, नेकपा एस, जनमत, नागरिक उन्मुक्ति, लोसपा र तीन जना स्वतन्त्र सांसदले विश्वासको मत दिएका हुन् । १० पुसमा माओवादी केन्द्र, एमाले, राष्ट्रिय स्वतन्त्र पार्टी, राप्रपा, जसपा, नागरिक उन्मुक्ति पार्टी, जनमत पार्टी र दुई स्वतन्त्र सांसदको समर्थनमा संविधानको धारा ७६ को उपधारा २ बमोजिम प्रचण्ड प्रधानमन्त्रीमा नियुक्त भएका थिए ।

सम्बन्धित समाचार