सुदूरपश्चिममा एमाले र माओवादीले आज छान्दैछन् संसदीय दलको नेता

A+ A A-

सुदूरपश्चिम प्रदेशमा नेकपा एमाले र नेकपा माओवादी केन्द्रले संसदीय दलको नेता चयन गर्दैछन् ।

संसदीय दलको नेता चयनका लागि आज एमालेले दलको बैठक बोलाएको प्रदेश सचिव तथा प्रदेशसभा सदस्य धर्मराज पाठकले जानकारी दिए । पाठकले आज बिहान बस्ने बैठकले दलको नेता छनोट गर्ने बताए ।

‘हामी छलफलमै छौँ,’ उनले भने, ‘सम्भवत आजै पनि दलको नेता चयन गर्छौं ।’ एमालेमा राजेन्द्र रावल र धर्मराज पाठकलाई सम्भावित दलको नेताका रूपमा हेरिएको छ । रावल पोलिटब्युरो सदस्य हुन् भने पाठक प्रदेश सचिव हुन् ।

यस्तै, माओवादी केन्द्रले पहिलो चरणमा प्रदेश पदाधिकारी तथा केन्द्रीय सदस्यहरूको छलफल पछि बस्ने गरी दलको बैठक बोलाएको छ । माओवादीले दिउँसो १ बजेका लागि संसदीय दलको बैठक बोलाएको छ । माओवादी केन्द्रमा खगराज भट्ट र ओमविक्रम भाटले दलको नेतामा दाबी गरेका छन् । भट्ट स्थायी कमिटी सदस्य तथा प्रदेश इन्चार्ज हुन् भने भाट केन्द्रीय सदस्य हुन् । यीबाहेक अन्य केहीले पनि दलको नेतामा दाबी गरेकाले सर्वसम्मत गर्न समस्या भइरहेको माओवादी केन्द्रका नेताहरूले बताएका छन् ।

कांग्रेसको दलको नेता चयन गर्ने विषय भने अनिश्चित बनेको छ । संसदीय दलका विषयमा छलफल सुरु नभएकाले दलको नेता छनोट गर्न अझै एक साता लाग्न सक्ने कांग्रेस प्रदेश महामन्त्री तथा प्रदेशसभा सदस्य मेघराज खड्काले बताए । १९ जना प्रदेशसभा सदस्य रहेको कांग्रेसमा दलको नेताका लागि आधा दर्जन बढी आकांक्षी छन् ।

सुदूरपश्चिम प्रदेशसभामा अहिलेसम्म नागरिक उन्मुक्ति पार्टी र नेकपा एकीकृत समाजवादीले मात्र दलको नेता चयन गरेका छन् । नेकपा एसको दलको नेतामा दीर्घ सोडारी र नागरिक उन्मुक्तिको नेतामा रामेश्वर चौधरी चयन भइसकेका छन् । सुदूरपश्चिम प्रदेशमा प्रत्यक्षतर्फ ३२ र समानुपातिकतर्फ २१ गरी ५३ सदस्यीय प्रदेशसभा छ । सुदूरपश्चिममा कांग्रेसका १९, माओवादी केन्द्रका ११, एमालेका १०, नागरिक उन्मुक्ति पार्टीका ७, नेकपा एसका ४, राप्रपाका १ र स्वतन्त्र १ गरी ५३ सांसद छन् ।

प्रकाशित मिति: शनिबार, पुस १६, २०७९ ०८:५०