अब के गर्छन् रोनाल्डो ?

A+ A A-

विश्वका सर्वाधिक लोकप्रिय खेलाडी क्रिस्टियानो रोनाल्डो आफ्नो देशलाई विश्वकप फुटबलको उपाधि दिलाउन असफल भए । विश्वकप सुरु भएसँगै क्लबविहीन भएका रोनाल्डो अब के गर्छन् त ?

आइतबार रोनाल्डोले लामो स्टाटस लेख्दै आफू करिअरकै सबैभन्दा ठूलो उपाधि देशलाई जिताउन असफल भएको बताए । रोनाल्डोले लेखेका छन्, ‘पोर्चुगललाई उपाधि दिलाउने मेरो करिअरको सबैभन्दा ठूलो र महत्त्वाकांक्षी सपना थियो । मैले धेरै अन्तर्राष्ट्रिय उपाधि जितेँ, तर आफ्नो देशका लागि विश्वको सबैभन्दा ठूलो उपाधि जिताउन सकिनँ ।’

रोनाल्डो सुपर स्टार हुन् । उनले आफ्नो देश र खेलेका क्लबलाई सफल बनाएकै छन् । करिअरकै उत्तरार्द्धमा पुग्दै गर्दा उनी आफ्नो देशलाई विश्वकप जिताउने संकल्पमा थिए । आफ्नो करिअरकै यादगार क्षण बनाउने लक्ष्यमा थिए । तर, मोरोक्कोविरुद्ध विश्वकपको क्वार्टरफाइनल खेलमा १–० गोलले पराजित भएसँगै उनको सपना त्यहीँ टुट्यो ।

बनाए विश्व कीर्तिमान तर सफल भएनन् रोनाल्डो

रोनाल्डोले विश्वकपमा कीर्तिमान भने बनाए । उनले लगातार पाँच विश्वकपमा गोल गर्ने खेलाडीको कीर्तिमान बनाए ।

सन् २००६, २०१०, २०१४, २०१८ र २०२२ गरी पाँचवटा विश्वकपमा गोल गर्ने उनी विश्वका पहिलो खेलाडी हुन् । पाँच विश्वकप गरी उनले ८ गोल गरेका छन् ।

घानाविरुद्ध गरेको त्यो गोल रोनाल्डोका लागि विश्वकपमा अन्तिम गोल बन्यो, जुन खेलमा पोर्चुगलले घानालाई ३–२ गोलले हराएको थियो । त्यसो त कतार विश्वकपमा रोनाल्डोको प्रदर्शन उच्च रहेन । उनले पोर्चुगलबाट पूरै समय खेल्न पाएनन् । घानाविरुद्ध ८८औँ मिनेटमा उनलाई निकाल्दै गोन्सालो रामोसलाई मैदानमा छिराइएको थियो । मुख्य प्रशिक्षक फर्नान्डो सान्तोसले उरुग्वेविरुद्धको दोस्रो खेलमा पनि रोनाल्डोलाई ८२औँ मिनेटसम्म मात्रै खेलाए ।

दक्षिण कोरियासँग समूह चरणको खेलमा २–१ गोलले हार्दा रोनाल्डोले ६५औँ मिनेटसम्म खेल्न पाएका थिए । तर, प्रिक्वार्टरफाइनलमा स्वीट्जरल्यान्डविरुद्ध रोनाल्डो सुरुआती प्लेइङ सेटमै परेनन् । उनको स्थानमा गोन्सालो रामोसले मौका पाए, जुन मौकाको गोन्सालोले भरपूर सदुपयोग गरे ।

रामोसले ह्याट्रिक गोल गर्दै विश्वकपमा पहिलो ह्याट्रिक गर्ने खेलाडीसमेत बने । स्वीट्जरल्यान्डलाई ६–१ ले पोर्चुगलले पराजित गर्दा कप्तान रोनाल्डोलाई खेलको ७३औँ मिनेटमा जोआओ फेलिक्सको स्थानमा मैदानमा प्रवेश गराइएको थियो ।

मोरोक्कोविरुद्धको क्वार्टरफाइनल खेलमा पनि रोनाल्डोले सुरुआती प्लेइङ सेटबाट खेल्न पाएनन् । खेलको ४२औँ मिनेटमा गोल खाएको पोर्चुगलले रोनाल्डोलाई मैदानमा ५१औँ मिनेटमा प्रवेश गराएको थियो । एक गोलले पछि परेको टिमलाई रोनाल्डोले हारबाट जोगाउन सकेनन् ।

मोरोक्कोविरुद्ध हारेलगत्तै रोनाल्डो रुँदै मैदानबाट बाहिरिए । कसैसँग पनि कुरा गरेनन् । त्यो बेला उनको पीडा प्रस्ट रूपमा सबैले अनुभूति गरिरहेका थिए । एक सफल खेलाडी तर पाँचपटकको प्रयासमा पनि देशलाई विश्वकप जिताउन नसक्दा भएको पीडाले उनका आँखा मात्रै रसाएनन्, उनीसँगै कराडौँ समर्थकको मन रोयो । विश्वचर्चित खेलाडी रुँदै बाहिरिँदा धेरैले मन थाम्न सकेनन् ।

हुन त मोरोक्कोविरुद्धको हारको मुख्य दोषी प्रशिक्षक सान्तोस भएको धेरैले आरोप लगाउँदै आएका छन् । रोनाल्डोलाई बेन्चमा नराखी पहिलो रोजाइमै खेलाएको भए पोर्चुगलले जित्ने तर्कहरू आइरहेका छन् । अहिले पनि मुख्य प्रशिक्षक सान्तोसले प्रतिरक्षामा रोनाल्डोलाई बेन्चमा राख्नु रणनीति भएको प्रस्ट्याउँदै आएका छन् । ‘रोनाल्डोलाई बेन्चमा राख्नु रणनीति थियो । स्वीट्जरल्यान्डविरुद्ध धेरै राम्रा खेलेका खेलाडी थिए । मलाई पछुतो छैन ।’

यता, पोर्चुगलका पूर्वकप्तान लुइस फिगोले नै मुख्य प्रशिक्षक सान्तोसको आलोचना गरेका छन् । उनले भनेका छन्, ‘रोनाल्डोलाई बेन्चमा राखेर तपाईंले विश्वकप जित्छु भन्नु नै गलत हो । रोनाल्डोलाई बाहिर राख्नु नै प्रशिक्षक सान्तोसको मुख्य गल्ती थियो ।’

सहानुभूतिको ओइरो

पोर्चुगल विश्वकपबाट बाहिरिएसँगै रोनाल्डोलाई सहानुभूति र हौसला दिनेको लर्को नै लागिरहेका छन् । विश्व जगत्‌का ख्याति प्राप्त व्यक्ति तथा सबैले उनलाई धन्यवाद दिँदै रोनाल्डोले जित्न नसकेको केही नभएको उल्लेख गरेका छन् ।

नेपालका पूर्वक्रिकेट कप्तान पारस खड्काले क्रिस्टियानो रोनाल्डोको फोटो हाल्दै लेखे, ‘हाम्रो पुस्ता भाग्यमानी थियो, तपाईंको जादु, सीप, शक्ति र उपस्थिति देख्न पाउँदा । धन्यवाद क्रिस्टियानो रोनाल्डो ।’

भारतीय क्रिकेट टिमका पूर्वकप्तान विराट कोहलीले पनि क्रिस्टियानो रोनाल्डो भगवान्‌को रूप भएको भन्दै लेखेका छन्, ‘तपाईंले गरेको योगदानलाई कुनै उपाधिले व्याख्या गर्न मिल्दैन । तपाईं खेलाडीका लागि प्रेरणाको प्रतीक हो । तपाईं मेरा लागि सर्वकालीन महान् हुनुहुन्छ ।’

रोनाल्डोलाई फुटबलका महान् हस्तीदेखि सबैले सहानुभूति दिइरहेका छन् ।

सन् १९८५ फेब्रुअरी ५ तारिखमा पोर्चुगलको फुन्चलमा जन्मिएका रोनाल्डो ३७ वर्षका भए । सन् २००३ बाट राष्ट्रिय टिममा डेब्यु गरेका रोनाल्डोले देशका लागि ११८ गोल गरे ।

खेलाडी जीवनकै अन्त्यतिर आएका रोनाल्डोले अहिले नै सन्न्यास लिइसकेका छैनन् । विश्वकपको उपाधि पोर्चुगललाई दिलाउँदै बिट मार्ने उनको लक्ष्य थियो तर त्यो पूरा भएन । युरो कपदेखि नेसन्स कपसम्मको उपाधि पोर्चुगललाई जिताइसकेका रोनाल्डोको अबको भविष्य के होला ? म्याचेस्टर युनाइटेडसँग सम्झौता तोडेपछि उनी क्लबविहीन बनेका छन् । सबैको चासो रोनाल्डोले अब देशका लागि खेल्छन् या खेल्दैनन्, कुन क्लबमा अनुबन्धित हुन्छन् भन्नेतर्फ केन्द्रित हुनेछ ।

प्रकाशित मिति: सोमबार, मंसिर २६, २०७९ १७:१६