अनि गगन थापाले सभामुखसँग भने– मलाई निगाहको होइन, हकको समय चाहिन्छ...

A+ A A-

प्रतिनिधिसभाको बजेट अधिवेशन शुक्रबारदेखि सुरु भएको छ । अधिवेशनको पहिलो दिनमा पनि बैठक नियमित कार्यसूचीमा प्रवेश गर्न सकेन । संसद बैठकअघि कार्यव्यवस्था परामर्श समितिको बैठकसमेत बस्न सकेको थिएन । प्रमुख प्रतिपक्षी दल नेपाली कांग्रेस उपप्रधान तथा गृहमन्त्री रवि लामिछाने सहकारीको रकम अपचलनमा संलग्न भएकाले उनीमाथि छानबिन गर्न संसदीय समिति गठन गर्नुपर्ने मागमा थियो । उसले बजेट अधिवेशनमा पनि सो मागबाट पछि हट्ने संकेत देखाएको छैन ।

शुक्रबारको बैठकमा सभामुख देवराज घिमिरेले राष्ट्रपति कार्यालयबाट प्राप्त भएको पत्र वाचन गर्न लागे । तर, कांग्रेस सांसदहरू उठिरहे । सभामुखले निश्चित काम गर्न अघि बढौँ र त्यसपछि छलफल गर्न सकिने बताए । उठेका सांसदहरूलाई आसन ग्रहणको आग्रह बारम्बार गरिरहे ।

‘माननीय सदस्य, निश्चित समय पुगेपछि समय उपलब्ध गराउनेछौँ । दलीय आधारमा समय उपलब्ध गराउनेछौँ । जरुरी पत्रहरू वाचन गर्नेछौँ । सदनको कारबाहीलाई अघि बढाउन मद्दत गरिदिनुहोस्,’ सभामुख घिमिरेले भने ।

सभामुखले राष्ट्रपतिको कार्यालयबाट आएको पत्र पढ्ने व्यहोरा पढ्न लाग्दै गर्दा कांग्रेसका सांसदहरूले टेबल ठोके । उभिइरहेका सांसदहरूको तर्फबाट सभामुख घिमिरेले ३ मिनेटको समय गगन थापालाई दिए ।

‘माननीय सदस्यहरूले के कुरा राख्नुहुन्छ ? कति समय दिनुपर्छ भन्ने कुरा यताबाट टुंगो हुने कि त्यहाँ माननीयहरूले भनेपछि टुंगो हुने हो ?,’ सभामुख घिमिरेले प्रश्न गरे । उनलाई उत्तर दिँदै कांग्रेस सांसद धनराज गुरुङले भने, ‘त्यहाँको कुरा पनि हामीलाई राम्रोसँग थाहा छ सभामुख महोदय ।’ यसमा कांग्रेसका सांसदहरूले पनि साथ दिएका थिए ।

‘यो संसदलाई चलाउने विधि माननीयहरूले माग केके गर्नुहुन्छ ? कति माग्नुहुन्छ ? के गर्नुहुन्छ त्यहाँबाट तय हुने हो कि यहाँबाट तय हुने हो ? त्यस कारण माननीय सदस्य यहाँहरूले आसन ग्रहण गर्नुहोला,’ सभामुख घिमिरेले भने ।

उनले कांग्रेस सांसद थापालाई समय दिएको र अन्य सदस्यलाई आसन ग्रहणको आग्रह गरे । कांग्रेस सांसदले होहाल्ला गरे । ‘कार्यव्यवस्थामा किन छलफल भएन सभामुख महोदय ?,’ भन्ने प्रश्न कांग्रेस सांसदले गरे ।

३ मिनेटको समय पाएका कांग्रेस सांसद गगन थापाले पार्टीको तर्फबाट कुुरा राख्न थाले । उनले पार्टीको तर्फबाट डढेलो नियन्त्रण, सरकारको हेलिकोप्टर किन्ने योजना कहाँ पुग्यो ? बाढीपहिरो नियन्त्रणका कामहरू कहाँ पुगे दलहरू तोडफोड गरेर उथलपुथल कतिसम्म बाँकी छ भनेर सोध्न चाहेको बताए ।

प्रश्नको घाँटी निमोठ्ने तयारी हुँदै छ भन्ने कुराको अनुमान लगाउन सकिने उनले बताए । उपप्रधान तथा गृहमन्त्रीले चार वर्ष अवरोध भए पनि हुन्छ भनेको प्रसंग स्मरण गरे । प्रधानमन्त्रीलाई सदन चल्ने प्रक्रियाबारेमा ज्ञान भएकाले त्यसको अनुभव देखिन्छ भन्ने लागेको उनले बताए ।

सदन अवरोध गर्नुपरेको कारण कांग्रेस नभएको सांसद थापाले बताए । ‘आज सदनमा जे दृश्य देखिँदै छ, त्यसको कारक हामी होइनौँ । जे गर्ने सोच राखिएको छ, त्यसको मूल्य चुकाउनुपर्छ । यसलाई हल्का नठानियोस्,’ सांसद थापाले भने ।

विधेयक पारित होस् र लगानी सम्मेलन गर्न सरकारलाई सजिलो होस् भनेर गम्भीर रहेको सांसद थापाले बताए । सहकारीको रकम हिनामिनामा संसदले छानबिन समिति बनाउनुपर्ने माग पनि उनले गरे । ‘छानबिन समिति बनाउँदै गर्दा त्यहाँ एमाले, माओवादी, रास्वपा, कांग्रेस बस्ने होला । ढिकीजाँतो तपाईंहरूको हातमा छ । तथ्य हामीले बनाउने होइन होला,’ उनले भने ।

समिति बनेर छानबिन गर्दा सबैले थाहा पाउने थापाले बताए । ‘किन डराएको ? किन भागेको ? कहिले प्रहरीलाई बोल्न लगाएको छ, कहिले प्रधानमन्त्रीलाई बोल्न लगाएको छ । महान्यायाधिवक्ताले कुनै प्रभाव र झुकाव राख्न हुँदैन भन्छ कानुनले, यहाँ त महाध्यायाधिक्ता झुक्दाझुक्दा लम्पसार नै पर्नुभयो,’ थापाले भने ।

सांसद थापाले यति भन्दा पाएको ३ मिनेटको समय सकिइसकेको थियो । सभामुखले २ मिनेटको समय थप गरिदिए । ‘समय मलाई नदिए पनि केही छैन अब । किनकि मलाई निगाहको समय चाहिँदैन, हकको समय चाहिन्छ । मेरो पनि यहाँ उभिएर बोल्ने हक छ । म निगाहको समय मात्र माग्न उभिएको होइन,’ थापाले भने ।

१५ भन्दा बढी बुझाउनुपर्ने प्रमाण रहेको उनले बताए । गृहमन्त्रीमाथि कुनै पनि अभियोजन नभएको प्रधानमन्त्री पुष्पकमल दाहाल प्रचण्डले रोस्ट्रमबाट भनेको प्रसंग सम्झदै थापाले 'झुट बोल्ने ?' भन्दै प्रश्न गरे । उनले भने, ‘महान्यायाधिवक्ता कार्यालयको दुरुपयोग गर्ने ? रुपन्देही प्रहरीले अभियोजन गरेको प्रमाणहरू पेस गरौँ ? ऋण लिएको छैन भनेको ठाउँमा लिखित माग फारम भरेका प्रमाणहरू पेस गरौँ ? १ अर्ब रपैयाँ अपचलन गरेको प्रमाण पेस गरौँ,’ कति प्रमाणहरू पेस गरौँ ?’

कांग्रेसलाई संसदीय समितिबाट गलत सावित गर्न भने । सरकार चार वर्ष कुनै तोडफोड नगरीकन ढुक्कले चलाउन आग्रह गरे । छानबिन समिति बनाउन र नेतृत्व पनि सत्तापक्षले गर्न आग्रह गरे । ‘हामी पनि सँगै बसेर हेर्छौं । हामीलाई गलत सावित गरिदिनुस् । हामी सही हो भने हाम्रो कुरा जान्छ । छानबिन समिति बनाऔँ । बाँकी कामहरू अघि बढाऔं भन्दा हेप्न खोज्ने ? पेल्न खोज्ने ? संख्याका आधारमा हेपेर पेलेर सरकारका कामहरू अघि बढाउँछु भनेर ठान्नुभएको छ ? सदन मात्र छ ? अरु पनि छ, ’ उनले भने ।

संसदीय छानबिन समिति नबनेसम्म अबको संसदको काम कारबाही अघि नबढ्ने सांसद थापाले बताए । राज्यका अंगहरूलाई वासिङ मेसिन बनाइएको र सरकारले पखालेर नपखालिने उनले बताए । राजीनामा नदिएर समितिबाट काम गरौँ भन्दा नमानेपछि संसद अवरोध गर्न पुगेको र त्यसबाट उत्पन्न परिणामको जिम्मा सरकारको भएको थापाले बताए ।

थापाको सम्बोधनपछि सभामुख घिमिरेले राष्ट्रपति कार्यालयबाट प्राप्त भएको पत्र पढ्ने कार्यसूचीमा प्रवेश गर्न लागे । तर, कांग्रेस सांसदहरू उभिइरहे र नाराबाजी गर्न थाले । नीति तथा कार्यक्रम पेस गर्न समय निर्धारणलगायतका पत्रहरू पढ्नुपर्ने अनिवार्य व्यवस्था रहेको सभामुख घिमिरेले बताए । ‘सरकारले ल्याएको अध्यादेशलाई संसद सुरु भएको पहिलो दिन नै टेबल गर्नुपर्ने व्यवस्था छ । यी कुराहरू गरिसकेपछि माननीयहरूको मागलाई सम्बोधन गर्न सकिन्छ,’ सभामुख घिमिरेले भने ।

सभामुख देवराज घिमिरेले राष्ट्रपति कार्यालयबाट प्राप्त पत्र वाचन गर्न लागेपछि कांग्रेस सांसद बेल घेर्न पुगेका छन् । उनीहरूले ‘जबर्जस्ती चल्दैन, सहकारी ठगलाई कारबाही गर... संसदीय छानबिन समिति गठन गर...’ लगायतका नारा लगाए ।

प्रकाशित मिति: शुक्रबार, वैशाख २८, २०८१ १७:५०