चुनावको मुखमा कानुन मिचेर धमाधम रकमान्तरः अर्थको जवाफ निर्वाचन आयोगमा, थप निर्णय हुन बाँकी

चुनावको मुखमा कानुन मिचेर धमाधम रकमान्तरः अर्थको जवाफ निर्वाचन आयोगमा, थप निर्णय हुन बाँकी

A+ A A-

चुनावको मिति घोषणा भए पनि माओवादी केन्द्रका अध्यक्ष पुष्पकमल दाहाल (प्रचण्ड), भौतिक पूर्वाधार तथा यातायातमन्त्री इस्तियाक राई, अर्थमन्त्री जनार्दन शर्मालगायतका मन्त्री तथा नेताहरूलाई शिलान्यास गर्न भ्याइ-नभ्याइ छ ।

कतिपय बजेटमा उल्लेख गरिएका कार्यक्रमअन्तर्गतका योजनाको शिलान्यास गरिएको छ भने कतिपय बजेटमा उल्लेख नगरिएका र कतिपय रकमान्तर गरी सीमित बजेट सुनिश्चित गरिएका आयोजनको शिलान्यास गरिएको छ ।

जसबाट निर्वाचन आचारसंहिताको दृष्टिकोणले मात्रै नभई आर्थिक उत्तरदायित्व तथा वित्तीय कार्यवधि ऐन २०७६ को पनि उल्लंघन भएको छ । आगामी निर्वाचनलाई प्रभाव पार्ने गरी आर्थिक कार्यविधि तथा वित्तीय उत्तरदायित्व नियमावली २०७७ को नियम मिच्ने गरी अर्थ मन्त्रालयले मनपरी रूपमा रकम वितरण गरेपछि निर्वाचन आयोगले चासो देखाएको छ ।

अर्थ मन्त्रालय स्रोतका अनुसार चालु आर्थिक वर्षको साउन र भदौमा मात्रै करिब ५० अर्ब रुपैयाँ रकमान्तर भएको छ । ‘पहिलो दुई महिनामा नै ५० अर्बबराबरको रकम रकमान्तर भएको छ । असोज लागेपछि पनि धेरै ठाउँबाट माग भएको छ । कतिको सम्बोधन भएको देखिन्छ, कतिको छैन,’ अर्थ मन्त्रालय स्रोतको दाबी छ ।

निर्वाचन आयोगले यस विषयमा चासो देखाउँदै स्पष्टीकरण माग गरेको छ । अर्थ मन्त्रालयले स्पष्टीकरण पेस गरेको छ । तर, आयोगले निर्णय भने लिएको छैन । ‘अर्थ मन्त्रालयले तोकिएको समयभित्र नै स्पष्टीकरण दिएको छ, स्पष्टीकरणउपर थप छलफल र निर्णय हुन सकेको छैन,’ निर्वाचन आयोगका प्रवक्ता शालिग्राम पौडेलले भने । उनले यस विषयमा छिट्टै निर्णय लिने बताएका छन् ।

निर्वाचन आयोग स्रोतका अनुसार अर्थ मन्त्रालयले निर्वाचनका लागि आवश्‍यक पर्ने रकम र अति आवश्‍यक क्षेत्रमा मात्रै रकमान्तर भएको दाबी गरेको छ । निर्वाचन आयोगलाई मात्रै १० अर्ब रुपैयाँ रकमान्तर गरी निकासा गरेको र यस्तै कामका लागि रकम निकास गर्नुपरेको जिकिर अर्थ मन्त्रालयले दिएको स्पष्टीकरणमा छ ।

त्यस्तै, अत्यावश्‍यक क्षेत्रमा पनि रकमान्तर गरेर रकम निकासा गर्नुपरेको अर्थ मन्त्रालयले दाबी गरेको स्रोत बताउँछ । उखु किसानलाई भुक्तानी गर्न भन्दै करिब ८४ लाख रुपैयाँ निकासा गरिएको वाणिज्य मन्त्रालयका अधिकारीले बताएका छन् ।

सरकारको दाबी र स्पष्टीकरणविपरीत नेताहरूले आफ्नो निर्वाचन क्षेत्रकेन्द्रित बजेट रकमान्तर गरेको अथ मन्त्रालय स्रोतको दाबी छ । ‘कतिपय ठाउँमा त रकमान्तर गर्नैपर्छ, तर माननीय मन्त्रीज्यू र अन्य क्षेत्रमा पनि ठूलो रकम माग भएको छ र यसलाई सम्बोधन भएको देखिन्छ,’ अर्थ मन्त्रालय स्रोतले भन्यो ।

स्रोतको दाबीअनुसार अर्थमन्त्री जनार्दन शर्माको निर्वाचन क्षेत्रमा मात्रै करिब १ अर्ब रुपैयाँ रकमान्तर गरिएको छ । रुकुमका विभिन्न क्षेत्रका सडकको स्तरोन्नतिका नाममा करिब ५० करोड रुपैयाँ र चौरजहारी रंगशाला निर्माणमा साढे ११ करोड रुपैयाँ रकमान्तर गरिएको छ ।

सत्तारुढ दलका शीर्ष नेता तथा मन्त्रीहरूको मागका आधारमा ठूलो मात्रामा रकमान्तर भएको अर्थका अधिकारीहरूको दाबी छ ।

प्रकाशित मिति: मंगलबार, असोज ११, २०७९ १९:२१