साफ च्याम्पियनसिपको उपाधि बंगलादेशलाई, नेपाल उपविजेतामै सीमित

A+ A A-

नेपाल महिला साफ च्याम्पियनसिप फुटबलको उपविजेता मै सीमित बनेको छ । सोमबार भएको फाइनल खेलमा बंगलादेशसँग ३–१ गोलअन्तरले पराजित हुँदै फेरि एक पटक उपविजेता मै रोकिएको हो ।

दशरथ रंगशालामा भएको फाइनलमा नेपाललाई पराजित गर्दै बंगलादेशले भने ऐतिहासिक उपलब्धी पाएको छ । साफ महिला फुटबलको इतिहासमा बंगलादेश पहिलो पटक च्याम्पियन बनेको हो । पहिलो हाफमा नै दुई गोलले पछि गरेको नेपालले दोस्रो हाफमा एक गोल फर्काए पनि थप एक गोल खाएको हो ।

खेलको १४औँ मिनेटमा बंगलादेशले गोल गर्दै नेपालविरुद्ध १–० गोलको अग्रता बनाएको हो । बंगलादेशकी साम सुन्नेहारले गोल गर्दै बंगलादेशलाई अग्रता दिलाएकी हुन् । खेलको ३६औँ मिनेटमा अनिता बस्नेतले प्रहार गरेको फ्रिकिक बंगलादेशकी गोलकिपर रुप्ना चक्माले मुस्किलले बचाएपछि नेपालले १–१ गोलको बराबरी बनाउने मौका गुमाएको थियो । लगतै नेपालले कर्नर पाएको थियो । अनिता बस्नेतले नै प्रहार गरेको कर्नर बंगालदेशका खेलाडीले गोल लाइनबाट बचाएको थियो ।

खेलको ४१औँ मिनेटमा बंगलादेशले दुई गोलको अग्रता बनायो । बंगलादेशकी श्रीमोती कृष्नारानी सरकारले गोल गर्दै पहिलो हाफसम्म २–० गोलको अग्रता बनाइन् ।

दोस्रो हाफको सुरुआत समयमै सावित्रा भण्डारी मैदानमा प्रवेश गरिन् । उनी अनिता केसीको स्थानमा मैदानमा प्रवेश गरेकी थिइन् । साफ च्याम्पियनसिपको समूह चरणको भुटानविरुद्धको खेलमा खेलेपछि सावित्रा डेंगी संक्रमणको कारण बिरामी परेकी थिइन् ।

खेलको ५२औँ मिनेटमा अनिता बस्नेतले दिएको क्रस पासमा रश्मीकुमारी घिसिङले गोल गर्ने राम्रो अवसर पाएकी थिइन् । तर, उनले गरेको हेड गोल पोष्ट नजिकैबाट बाहिरिएको थियो ।

खेलको ७०औँ मिनेटमा अनिता बस्नेतले गोल गर्दै २–१ गोलको स्थितिमा पुर्‍याइन् । तर, यसको सात मिनेटपछि नै कृष्नारानी सरकारले गोल गर्दै ३–१ गोलको अग्रता दिलाइन् । बाँकी समयमा गोल हुन नसकेपछि बंगलादेशले नेपाललाई पराजित गर्दै उपाधि चुमेको हो ।

प्रकाशित मिति: सोमबार, असोज ३, २०७९ १८:५९