बालबालिकालाई मानसिक रोग लागेको कसरी थाहा पाउने ? (भिडियो)

A+ A A-

‘स्कुल जान्नँ’ भन्दै तपाईंको नानीबाबु रुन्छ ? तपाईंलाई छाड्न मान्दैमान्दैन ? याद गर्नुहोस्– मानसिक रोग लागेको हुन सक्छ । मनोचिकित्सक उत्कर्ष कार्की मानसिक रोग लाग्दा ६ वर्षभन्दा मुनिका बालबालिकाले देखाउने व्यवहार यस्तै हुने बताउँछन् ।

यसबेला उनीहरू आफूलाई लागेको कुरा राख्न सक्दैनन् । समस्या पनि प्रष्ट ढङ्गले भन्न सक्दैनन् । कतिले त ‘पेट दुख्यो’ भन्छन् । कतिपयको चाहिँ अनुहारमा चिटचिट पसिना आउँछ । कोही भने अधिक चकचक गर्ने, स्थिर नहुने, पालो कुर्न नसक्ने र एक ठाउँमा बस्न नसक्ने हुन्छन् ।

मनोचिकित्सक कार्की यस्ता लक्षण देखिए तत्काल उपचार गराउनुपर्ने बताउँछन् । उनका अनुसार यी समस्याहरू मानसिक समस्याअन्तर्गत ‘अटिजम स्पेक्ट्रम डिस्अर्डर’ र ‘एडीएचडी’ भएको हुन सक्छ ।

यस्ता समस्या देखिने ६ वर्षभन्दा मुनि (पूर्वबाल्यावस्था) का बालबालिकामा मात्र होइन ६-१२ वर्षका बालबालिकामा पनि मानसिक समस्या देखिन्छ । तर, लक्षण भने उस्तै हुँदैन ।

मनोचिकित्सक कार्की भन्छन्, ‘यो समूहमा भावनात्मक लक्षण देखिने हुन्छ । त्यसअन्तर्गत रिसाउने, उदास हुने, चिटिचिटापन हुने र स्कुल जान नमान्ने हुन्छ । शारीरिक लक्षणमा पेट दुख्ने, सास फेर्न गाह्रो हुने, पटकपटक बेहोस हुने हुन्छ भने मानसिक रूपमा एउटै विचार बारम्बार आउने, विगतका भावना आउने र भविष्यको सोच आउने हुन्छ ।’

कतिपयमा भने व्यावहारिक समस्या पनि देखिने हुन्छ । ‘मेरो हात फोहोर त छैन ? फेरि गएर धुनुपर्छ कि ?’ व्यावहारिक समस्याअन्तर्गत कसैमा यस्तो समस्या देखिने र कसैमा भने सामान तोडफोड गर्न र जिद्धि गर्न मन लाग्ने हुने कार्कीले बताए ।

किशोर किशोरी अवस्थामा भने मानसिक रोगको शिकार भएकाहरूमा आत्तिने, डराउने, लागुऔषध सेवन गर्ने र केहीलाई भने आत्महत्या गर्न मन लाग्ने जस्ता लक्षण देखिने पनि उनले बताए ।

हेर्नुस् भिडियोः