सूर्यदर्शन सहकारी ठगीको जम्बो प्रतिवेदन : रवि लामिछानेको नाममा एक करोड निकासा

सूर्यदर्शन सहकारी ठगीको जम्बो प्रतिवेदन : रवि लामिछानेको नाममा एक करोड निकासा

A+ A A-

गीतेन्द्रबाबु (जीबी) राई समूहको सूर्यदर्शन बचत तथा ऋण सहकारी संस्थाबाट हालका उपप्रधान तथा गृहमन्त्री रवि लामिछानेको नाममा एक करोड रुपैयाँ ऋण प्रवाह भएको देखिएको छ । चार्टड एकाउन्टेन्ट अनिल लामिछानेको नेतृत्वमा पोखरा महानगरपालिकाले गठन गरेको अध्ययन समितिले लामिछानेको नाममा एक करोड रुपैयाँ ऋण प्रवाह भएको निष्कर्षसहित सहकारीको आर्थिक अवस्थाको विस्तृत प्रतिवेदन तयार पारेको हो ।

३ हजार ४ सय १९ पृष्ठको यो प्रतिवेदन महानगरपालिकाका प्रमुख धनराज आचार्यले बिहीबार जिल्ला प्रहरी कार्यालय कास्कीलाई हस्तान्तरण गरेका छन् । सहकारीबाट रवि लामिछाने नाम गरेका व्यक्तिको नाममा एक करोड रुपैयाँ ऋण गएको र हस्ताक्षर पनि भेटिएको अध्ययन समितिका सदस्य सहकारी विज्ञ दीपकप्रकाश आचार्यले बताए । ‘हामीले वित्तीय विश्लेषण गरेको हो । उहाँको हस्ताक्षर हो/होइन भन्ने सम्बन्धित निकायले हेर्ने कुरा हो,’ उनले भने, ‘कर्जा माग फारममा हस्ताक्षर छ । एक करोड मागेको फारम छ । मागेअनुसार पैसा गएको छ ।’

महानगरपालिकाले अध्ययन समितिलाई समस्याग्रस्त सूर्यदर्शन सहकारीको वित्तीय अवस्थाको अध्ययन र विश्लेषण गर्ने जिम्मा दिएको थियो । अध्ययनअनुसार १८ हजार ७ सय बचतकर्ताको एक अर्ब ३५ करोड ५३ लाख ५४ हजार रुपैयाँ बचत सहकारीमा देखिएको छ । ४ सय ३३ जना ऋणीलाई एक अर्ब ३१ करोड ५३ लाख ८२ हजार रुपैयाँ ऋण दिइएको छ । यसरी ऋण लिने अधिकांश जीबी राईको नजिक रहेकाहरू र उनी आबद्ध कम्पनी हुन् ।

महानगरपालिकाको अध्ययन समितिले बुझाएको प्रतिवेदन मात्र होइन प्रहरीको केन्द्रीय अनुसन्धान विभाग (सीआइबी)ले तयार पारेको प्रतिवेदनमा पनि लामिछानेको नाममा दुईपटक गरेर एक करोड रुपैयाँ ऋण गएको भेटिएको छ । दुवै अध्ययनले रवि लामिछानेको नाममा रहेको ऋण खातामा २०७८ साल ३१ असारमा ५० लाख रुपैयाँ चेकमार्फत गएको भेटिएको छ । बाँकी ५० लाख रुपैयाँ भने एक महिनापछि असारमा नगद निकालिएको अध्ययनमा देखिएको छ । ऋण लिएको दुई वर्षपछि २०८० साल असारमा ऋणको सावाँ र ब्याज गरेर एक करोड ३० लाख ८८ हजार ७३६ रुपैयाँ गोर्खा मिडिया नेटवर्कको नाममा स्वामित्व हस्तान्तरण गरिएको छ । ऋण निकासी हुँदा वार्षिक ब्याजदर जम्मा १४.७५ प्रतिशत तोकिएको छ जुन १२ महिनालाई भनेर निकालेको देखिन्छ । दुई वर्षपछि रवि लामिछानेको नामको ऋण कम्पनीको नाममा सारिएको कुनै प्रमाण सहकारीको अभिलेखमा छैन ।

गोर्खा मिडिया त्यही कम्पनी हो जसले ग्यालेक्सी फोर–के टेलिभिजन चलाउँछ । सहकारीबाट ऋण लिएको समयमा हालका गृहमन्त्री लामिछाने यो टेलिभिजनका प्रबन्ध निर्देशक थिए । सूर्यदर्शन सहकारीबाट कुनै व्यक्तिले सहकारीबाट ऋण लिनु सामान्य नै हो । तर, जसरी गोर्खा मिडिया नेटवर्क र रवि लामिछानेको नाममा ऋण प्रवाह भएको छ त्यो गैरकानुनी देखिन्छ । सहकारी ऐन, २०७४ को दफा ५० (१)अनुसार सहकारीबाट ऋण लिन सम्बन्धित व्यक्ति सहकारीको सदस्य हुनैपर्छ । लामिछानेले नै सहकारीको सदस्यता बिनै ऋण लिएको पुष्टि भएमा ऐनको दफा १२४ को १ (ग)अनुसार बिगो बराबरको रकम जरिवाना र तीन वर्षसम्म कैद हुन सक्छ ।

सहकारीबाट प्रवाह भएको एक करोड रुपैयाँ माग फारमको हस्ताक्षर रविले गरेका हुन् वा किर्ते भएको हो भन्ने प्रहरीले अध्ययन गर्नेछ । लामिछानेको नागरिकता सहकारीको अभिलेखमा भेटिएको छैन । त्यसैले यो ऋण लामिछाने आफैँले लिएका हुन् वा उनको फर्जी नाम र हस्ताक्षर प्रयोग भएको हो प्रहरीले अध्ययन गर्ने छ । सहकारीबाट पीडित बचतकर्ताले गृहमन्त्री लामिछानेसहित विभिन्न व्यक्ति र कम्पनीविरुद्ध जाहेरी दिँदा प्रहरीले लिन अस्वीकार गरेको थियो । पीडितले निरन्तर दबाब दिएपछि महानगरले समिति बनाएको थियो जसले यसअघि साढे चार सय पृष्ठको प्रारम्भिक प्रतिवेदन बनाएको थियो । २०७२ सालदेखिको सबै आर्थिक कारोबारको फोटोकपी अन्तिम प्रतिवेदनमा समेटिएको छ । प्रतिवेदन प्रहरी, सरकारी वकिलको कार्यालय र जिल्ला अदालत कास्कीमा बुझाइने छ ।

प्रहरी संयन्त्रकै तालुकदार मन्त्रालय सम्हालिरहँदा अपचलनको मुद्दामा अनुसन्धान गर्नुपर्ने दबाब प्रहरीलाई छ । महानगरपालिकाले बुझाएको प्रतिवेदन अध्ययन गरेर अनुसन्धान प्रक्रिया अघि बढाइने कास्की प्रहरी प्रवक्ता डीएसपी वसन्त शर्माले बताए । यो सहकारीको ठगीमा संलग्न रहेको निष्कर्षसहित प्रहरीले २०७९ भदौमा १९ जनाविरुद्ध पक्राउ पुर्जी जारी गरेको थियो । मुख्य नाइके जीबीसहित १४ जना अझै फरार छन् भने पक्राउ परेकाहरू कास्की कारागारमा छन् ।

प्रकाशित मिति: शुक्रबार, वैशाख २८, २०८१ १३:१२